SHAHPHENBÜTHÜ 6 - DAÜLANGPÜ LAIHING (BSI)

Gideon

¹ Shao Israel nanglakthüi Shembüpa touei mang thah, hatü Shembüpai jomphong Midian amei lak kü vangbong nyet shuoh.

² Midian amü Israel am mü wong kohpüba nyuteke; hanangkü Israel amü Midian am kü nyemei kahshangthü kü hatü yaongsha kü joshing yemei joteke.

³ Mechem Israel ami sheili sheijahen, Midian am hatü Amalek am hatü heongphi kübü lebü jatthüi jom khüei hokhen peiteke.

⁴ Jomphongi jomei kahdokei peiyei baümtap vetü Gaza shinpü thahshi sheili kemei mangtük, hatü Israel am shingvaishi yemlem mi, mohoh, hatü gadu meheyao netuhphongi shemtük.

⁵ Jomphongü shaüshouk peipükei yemhimak hatü ashakshem koei pei; jom hatü ut ieyei neaoki pei, hatü kahmük kemei mangtük.

⁶ Midian am homei Israel am longi tao, hatü Israel ami Shembüpa kü sheühshih shei lenteke.

⁷ Hahepak kü Israel ami Midian am khüei Shembüpa kü len;

⁸ Shembüpai Israel am kü thibü hük shomei jomphong kü, “Shembüpa, Israel amei Kahvangi hapakei enyüke: ‘Ngei amphong Ijip kahdokei aa laphen kü nyupü kübü müei leipeih;

⁹ ngei amphong Ijip amei lak kübü, hatü am kü shüveipüthülei lak kübü yangpeih hatü ngei jom changtüktü am kü hapa kahdok shuohpeih.

¹⁰ Ngeiyü Shembüpa, ammei Kahvang; shaang am nyupü kahdok kü nyupü Amor amei kahvangthü kü tekhüm shei ngei amphong kü etepih, shejao amphongi ngei epü nebangpeih’ ” shei eteke.

¹¹ Hahepak kü Shembüpalei phongshan yiüei Ophrah chingei Abiezer am Joashlei longkhampü phangei peiyei uoteke. Büpalei cheha Gideonü yiü bhitshingei Midian am kü joei wheat hah tenei nyu.

¹² Shembüpalei phongshan büpa touei peiyei, “Wongkoh monglongpü hampa, Shembüpa nüng mü nyüke” shei e.

¹³ Gideoni jangei, “Shejao longpüba, Shembüpa ham mü nyujema, mehekei hami henüng ponghahpa? Hamei bühipai ham kü thamabenüng hajük eküpeyü melei daipa? Shembüpai ham Ijip leipü müei neleiangpü je? Shejao shaang Shembüpai ham yakphong, hatü Midian amei lak kü ham shuohtükteke” shei eteke.

¹⁴ Hahepak kü Shembüpai büpa kü, “Nüngei wong kempai daiyei Midian amei lak kübü Israel am yangtuh; ngei nüng kü hapa kangpü shuohnyüpeih” shei e.

¹⁵ Gideoni jangei, “Shejao Shembüpa, ngei mekei etü Israel am yangaokhen? Ngelei phangü Manasseh kü peü mü wong nekohpü hatü ngeiyü ham shem kü peü mü maanpü shennyak khih” shei e.

¹⁶ Shembüpai büpa kü, “Nüngi aokhen hih; mehenangkü ngei nüng mü nyukahen, hatü nüngi Midian am peü ngümtükhen” shei e.

¹⁷ Gideoni jangei, “Nüngi ngei kü bamei deihjema, ngei mü shah eteipeyü nüng khih shei nyinghen shingvaishi nyangeihepü hük hushih.

¹⁸ Ngei moila koei peiyei nüng touei mangshuoh thahshi nüng hatoueipü telüdai” shei e. Hatü Shembüpai, “Nüng nyokei mangleikei thahshi ngei danei nyukahen” shei e.

¹⁹ Hanangkü Gideoni shemei leiyei yum cheha hük jü, hatü atta dok an yah-ei daw neshihpü aan lingteke. Büpai hapa phai mühdow kü shih, hatü haoyung dük hük kü shihtü koei daiyei hathü Shembüpa kü longkhampü phangei shuoh.

²⁰ Shembüpalei phongshani büpa kü, “Phai hatü aan hapa yaong shangkü haütuh hatü ha shangkü haoyung langeishuoh” shei e. Gideoni hapakei dükteke.

²¹ Hahepak kü Shembüpalei phongshani büpalei lak leipü lenshuohjaangi phai hatü aan kü hong, hatü yaong leipü aw vamei phai hatü aan hahtük, hatü Shembüpalei phongshan büpa toueipü mahdai.

²² Hapheikü mechem Gideoni hapayü Shembüpalei phongshani epü khih shei deih-ei dangpa, büpa nyemei, “Oh Shembüpa Kahvang! Ngei Shembüpalei phongshan dhe dhe gongei eetepih!” shei e.

²³ Shejao Shembüpai büpa kü, “Mong aümtuh; Nüng tenyem, nüng nedipih” shei e.

²⁴ Hatouei Gideoni Shembüpa kü moidü hük ling hatü hapa kü, “Shembüpayü Chingmei” shei men. Abiezer phang amei Ophrah shei epü shingei hapa shinnyih thahshi haongshi nyüke.

²⁵ Ha ya Shembüpai Gideon kü, “Ampalei mohoh chebaong hükpapa vangbong nyet lomdaipü yahtuh, hatü ampalei Baal kahvangei moidü, hatü hatoueipü Asherah kahvangei lajeithü bentüktuh;

²⁶ hatü hapa shangtao kü Shembüpa, ammei Kahvang kü moidü hük lingtuh, hatü nüngi bentükpü Asherah kübü pü kü nyipabü mohoh chebaong yah-ei lanei jakpü moila shuohtuh” shei eteke.

²⁷ Hanangkü Gideoni büpalei chongphobüthü jom an mütü Shembüpai büpa kü epükei dük, shejao büpai hapa nyihnüng dükhen jomei ching am hatü jom shem am kü nyempü nangkü büpai ha yanüng dükteke.

Gideoni Baal Kahvangei Moidü Bentükpü

²⁸ Mechem jom ching am dhomi lomi paoei veipa, Baal kahvangei moidü, hatü Asherah kahvangei lajei bentüktü halei vepü moidü shangkü nyipabü mohoh chebaong jakshi eeteke.

²⁹ “Ha üpai dükpa?” shei jom jom phetei. Jomi yemshingkü Joashlei cheha Gideoni dükpü khih shei dangteke.

³⁰ Hahepak kü ching ami Joash kü, “Anha hatouei müei deikei, jütükhen hih; mehenangkü büpai Baal kahvangei moidü hatü hatoueipü Asherah kahvangei lajei bentükteke” shei e.

³¹ Shejao Joash-i büpa mü shah dakteipüthü kü, “Amphongü Baal kahvang khüambakei yaonghen je? Amphongi büpa yanghen je? Üami büpa khüambakei yaongnya, vangngai shekü dikemhen. Baal-ao kahvang vaijema, büpa laophü nyingi nyemyang; mehenangkü bentükpü moidüyü büpalei khih” shei e.

³² Hanangkü ha nyih mü leitü Gideon kü, “Jerubbaal” shei nyük; mehenangkü Joash-i, “Baal kahvang büpa nyingi nyemyang, mehenangkü bentükpü moidüyü büpalei khih” shei eteke.

³³ Hahepak kü Midian am, Amalek am hatü heongphi kübü jatthü kemei thaitü Jordan yungdang homei heih-ei Jezreel kahjilei baümtap veteke.

³⁴ Shembüpalei laangha Gideon kü pei, hatü büpai amit vüngei Abiezer am phang büpa phei mühen nyük.

³⁵ Büpai Manasseh amei kahmük kemeilei phongmokbüthü shomei hokhen daikei shei nyük, hatü büpai Asher, Zebulun hatü Naphtali am peü touei phongmokbü shom hatü jomphongao büpa mü daiyei om.

³⁶ Hahepak kü Gideoni Kahvang kü, “Israel am yanghen shingvaishi nüngi ngei noteihen hih shei epeih.

³⁷ Meiteke, ngei nüng kü hahshü shingei inyaipü mimum haüshi tuhphahen; nepnüng dhom mü veishingkü mimum kü mon nyien hetei, lebü kahdok üvah-i chongküjema, nüngi epükei Israel amü ngei homei yanghen khih shei ngei nyinghen” shei eteke.

³⁸ Hingmei-üng ha vam. Mechem Gideoni nepnüng dhom mü paoei hapa mimum yüpshuohpa, chilimji hük maei nyienyung vamteke.

³⁹ Hahepak kü Gideoni Kahvang kü, “Chingmeilemlingei ngei kü mang tükshih; ngei shao shah hük eshah. Hapa mimumi-üng shao chem dokei veishah. Shaangü mimum mon üvah-i tuhphongtü kahdok mon shieyei tuhshih” shei e.

⁴⁰ Ha ya Kahvangi hapakei dük: Mimum mon üvah-i tuhtü kahdok peü nyieni shiedaitü chongjateke.