SHAHPHENBÜTHÜ 3 - DAÜLANGPÜ LAIHING (BSI)

Lebü Jatthü Kahdokei Nyupü

¹ Hathüyü Kanan kü vehok hokpü chemao mangnyingpü Israel am kü dokhen shingvaishi Shembüpai tuhphongpü jatthü nyüke.

² Büpai hathüyü Israel am denja pheihathü shelei vehok hokpü nenyingpüthü kü nyuhhen shingvaishi dükteke.

³ Hathüyü Philistia am vanglem lempüthü nga: Kanan am, Sidon am, Hiv am peü Lebanon Kahshang kü Baal-hermon kahshang kübü Lebo Hamath thahshi nyupüthü shiüteke.

⁴ Jomü Mosa homei chebü chepa kü Shembüpai shuohpü shahkungthü nebanghen hi banghen shei nyinghen shingvaishi doknüng tuh.

⁵ Hanangkü Israel ami Kanan am, Hit am, Amor am, Perizz am, Hiv am hatü Jebus am mü nyu,

⁶ hatü jomi jomei yiük yah, hatü jomei yiükhathü doi deishih hatü jomei kahvangthü kü khümteke.

Othniel

⁷ Israel ami Shembüpa, jomei Kahvang betüktü mepa Shembüpa touei mang nyu, ha dükei mang thah, hatü Baal hatü Asherah kahvangthü kü khüm.

⁸ Hanangkü Shembüpai Israel am kü mongshih, hatü büpai jom Aram-Naharaim amei ongpa Kushan Rishathaimei lak kü shuoh, hatü Israel am büpalei lakmongei vangbong shet nyuteke.

⁹ Shejao mechem Israel ami Shembüpa kü lenei phoppa, Shembüpai jom yanghen shingvaishi Kenazlei cheha, Kalebei chenaü Othniel shahphenbü shomei jom yangteke.

¹⁰ Shembüpalei laangha yiüei büpa kü bak, hatü büpa vehokei dai, hatü Shembüpai Aram amei Kushan-Rishathaim ongpa Othnielei lak kü shuoh-ei büpa neütük.

¹¹ Hanangkü Kenazlei cheha Othniel mangdi thahshi vangbong pinyi kahmük kü chingmeivangmei nyuteke.

Ehud

¹² Israel ami shao Shembüpa touei mang thah, hatü Shembüpa touei mehe mang nyu ha dükpü nangkü Israel am khüei Shembüpai Moab amei Eglon ongpa wong kohhü.

¹³ Amon hatü Amalek am mü khaaitü büpai Israel am neütüktü jomi Jeriko ching omei yahlang.

¹⁴ Hanangkü Israel ami Moab am Eglon ongpa chongphoei vangbong anpüshet nyuteke.

¹⁵ Shejao mechem Israel ami Shembüpa kü lenei phoppa, Shembüpai jom yanghen shingvaishi laknyongi dükpü Benjamin am Geralei cheha Ehud shom. Israel ami Moab am Eglon ongpa touei bom kotü Ehud shom.

¹⁶ Shaang Ehudi nyonghidah kü nah kohpü yanlu hük feet hük mü bhaoei ling, hatü büpai hapa lakdah philei ashak mongei phümteke.

¹⁷ Büpai Eglon ongpa kü bom shuoh; Eglonü longi nitshi nyuteke.

¹⁸ Ehudi hapa bom shuohpheikü büpai hapa kopüthü kü shemei leidaihen eteke.

¹⁹ Shejao Ehudi Gilgal yopai leipü yaongnaüya touei lei, hatü Eglon touei nyokei leiyei, “Oh Ongpa, ngei nüng kü ehen shahjo shahhing hük nyüpeih” shei e. Hanangkü ongpai chongphobüthü kü chem biendaishih shei eshuohpü nangkü jom peü vamdaikem.

²⁰ Ongpa monha vüngmakpü jaandokpa ongshemei uoshi nyushingkü Ehudi büpa yopailei heihei, “Nüng kü Kahvang leipü shahjang hük nyüpeih” shei eshuohshingkü ongpai büpalei uoshing leipü yaongjashingkü,

²¹ Ehudi büpalei lakdahphi bhagphangei phümpü yanlu tukei ngaiyei ongpalei vom kü hümteke.

²² Yan hak mü metao omshi shüteke, hatü ngaümpheilei peiteke; Ehudi yan netuklang hatü ha cheüi jümlangteke.

²³ hatü Ehud chingshelei vamtü shak lemei sha latphongtü lüdai.

²⁴ Büpa lüdaipheikü chongphobüthü peiyei veishuohshingkü jaandokpa shemshathü küpei lattüktü eeteke. “Maaipa dungnukei shüei nyiumei nyaaishang” shei jomi etei.

²⁵ Hanangkü jomi baong yemshing ngoishi danei nyuteke, shejao mechem büpai dungnuk sha ne-api nyudaishuohpa, jomi sabi yah-ei shem apei shüei veishuohshingkü jomei ongpa aangshungei diyei shükshi chongjateke.

²⁶ Jom danei nyupü hepak kü Ehudü lüdaitü nyu. Büpa yaong lajei lemei heih-ei Seirah lemei lüdai.

²⁷ Mechem büpa om leipa, büpai phaüshang kahmük Ephraimei amit vüng, hatü büpai mütü Israel am kahshang leipü leiteke.

²⁸ “Ngei phei mükei! Mehenangkü Shembüpai ammei vepa Moab am ammei lak kü shuohteke” shei büpai e. Hanangkü jomi Ehud phei müei daiyei Moab amei Jordan yung taenshing yomlang, hatü jom yungdang homei nedeishih.

²⁹ Hahepak kü jomphongi wong kohpü Moab veshanthü haja an hükshing jütük; shennyak hükao neyang.

³⁰ Hapa nyih Israel ami Moab am neütük, hatü kahmük kü vangbong büali thahshi chingmeivangmei nyuteke.

Shamgar

³¹ Haphei kübü shahphenbüyü Anathlei cheha Shamgar nyuteke. Büpai Israel am yang, hatü büpai mohoh atpü lüngi Philistia am kho vok jüteke.