SHAHPHENBÜTHÜ 21 - DAÜLANGPÜ LAIHING (BSI)

Benjamin am Shingvaishi Nyühathü

¹ Mechem Israel am Mizpahlei thaipa, jomi vangpüshuwpü hük ling: “Jen üamiyao laophülei yiükha Benjamin am kü doi nedeishihpih” shei showteiteke.

² Israel nanglakthü Bethelei heih-ei om dhüshi Kahvang touei ngeüwong anei shahyaki thepei,

³ “Oh Shembüpa, Israel amei Kahvang, shinnyih Israel am khong kübü jat hük bhanghili mahdaihen mü henüng mehekei vamhünya?” shei eteke.

⁴ Nepphei dhom mü nanglakthüi moidü hük lingtü halei lanei jakpü moila hatü mongjempü moila shuoh.

⁵ Hahepak kü Israel ami, “Shembüpa touei jen Israel jatthü thaipülei mepa jat neompa?” shei etei. Mehenangkü jomi Shembüpa touei Mizpahlei thaishingkü neompü jat jütükkemhen shei vangeishuwteke.

⁶ Shejao Israel ami jomei jeihinaü Benjamin am kü shinshangei deih hatü jomphongi, “Shinnyih Israel kübü jat hük mahdaiteke.

⁷ Benjamin am yemmü aoei nyupüthü kü nyüha shuohhen nangkü mekei eteihenang; mehenangkü jeni jom kü jenei yiükha doi nedeishihpih shei Shembüpa touei vangteitükteke” shei etei.

⁸ Hahepak kü jomphongi, “Mizpahlei Shembüpa touei thaishingkü neompü Israel jat khongkü nyüla?” shei phe. Hahepak kü jomphongi Jabesh-Gilead kübü üpayao shahthai shingei neomangpih shei nying.

⁹ Mechem men nyükpa, Jebesh Gilead kübü veshan hükao neom.

¹⁰ Hanangkü khongi veshan haja anpünyi Jabesh Gilead leipü nyühathü hatü hashihthü omshi jütuh shei etü shom.

¹¹ Amphongi hapa düktuh: “Pai mü ngühpü nela nevaipü thahshi nyüha hatü baha kemei jütuh” shei e.

¹² Jomphongi Jebesh Gileadei nyupü nanglakthü khongkü pai mü ngühpü nela jom kho ali heü, hatü jomi hathü Kanan kahdok Shiloh baümtapei müei lei.

¹³ Hahepak kü khongi Rimmon yaongvakei nyupü Benjamin am touei chingmei appü baongei deishih.

¹⁴ Hanangkü Benjamin am hahepak kü nyokei lei, hatü jomphong kü, Jebesh Gilead leipü nejütüki yangei leipü nelathü shuohteke, shejao hapai jomphong peü kü neben.

¹⁵ Nanglakthüi Benjamin am kü mong kü nemei-i deih; mehenangkü Shembüpai Israel jatthü mongjempü mangtük.

¹⁶ Hanangkü khong kü mübüthüi, “Benjamin am nyühathü kemei jütükpheikü shaang aoei nyupü bahathü kü mekei etü nyüha shuohhenang?

¹⁷ Yemmü nyupü Benjamin ami jomei mükjüp tuhhen vongbong; shejüang Israel kü jat hükei li nemahdaihen” shei etei.

¹⁸ Shejao jeni jom kü jenei yiükha doi nedeishihaokhen; mehenangkü jeni, “Benjamin am kü doi deishihpü shennyak kü thaüvaü hettuh” shei vangeishuwei etükteke.

¹⁹ Shejao veituh, Shembüpalei vangbong dohpü mo Shilohlei Bethel kü pehephi lemei Bethel kübü Shekhemei daipü lem kü heongphi, hatü Lebonah kü apshaphi kü nyuhen shei jomphongi e.

²⁰ Hanangkü jomphongi Benjamin am kü, “Daituh hatü nyalingngupai kahlei danei nyutuh,

²¹ hatü veishi nyutü mechem Shiloh nelathü oei longteihen vamkahenshang hahepak kü nyalingngupai kah leipü vamei laophülei nyüha vaihen Shiloh nelathü hükbaong yepei ammei Benjamin kahdokei leihahtuh” shei eshuohteke.

²² Hahepak kü jomei chepa chejei ami ham touei shah yemei peiküjema, hami jom kü, “Chingmeilemlingei hami hathü tuhhahshah; mehenangkü hami hathü vehok hepak kü hamei nyüha vaihen yepei leipao nevai, hatü jomü ammi ham kü yahphopü nevaipai ammi lahteitükpü mangpü nevaikahen shei etuh” shei eshuohteke.

²³ Benjamin ami hapakei dük; jomi laophü shing nyüha vaihen oei nyupü nela hük baong yepei jomei kahdokei leiyei ching ja lingei chingchingei nyu.

²⁴ Hahepak kü Israel ami hapa tuhtü laophülei shem, jat hatü mükhiphang hatü mükjüp yemei leidaikem.

²⁵ Hathü nyih kü Israel kü ong nenyu; peüi laophü kü mehe mei, hapa mon dükhamteke.