SHAHPHENBÜTHÜ 19 - DAÜLANGPÜ LAIHING (BSI)

Levi amei Yiükphü

¹ Hathü nyih kü Israel kü ong nenyu. Shaang Levi am phaüshang kahmük Ephraim kü chingshoukei nyupü shennyak hüki Judah kahdok Bethlehem leipü yiükphü hük yah.

² Shejao büpalei yiükphüi büpa kü loh-ei Judah kahdok Bethlehemei chepa am shemei büpa mü yanei leiyei lenyang ali hükshing nyuteke.

³ Hahepak kü chepahai pinnyü yawh-ei müei leihen dai. Büpai laophülei chongphobü hatü gadu nyi müei dai. Mechem büpa chepa amei shem ngoijapa, pinnyüi büpa chepa amei shemei müei shüjashingkü chepai büpa eeyei mongongshi ombomei yah.

⁴ Nelanyülei chepai büpa kü themei nyuhen eteke; hanangkü büpai jom shemei hah-ei yingei shiyei chongei nyih jem thahshi themteke.

⁵ Nyih alipabü lomi paoei leidaihen tem, shejao nelanyülei chepai büpa kü, “Lemhük hahying hahtuh; hapheikü mon leituh” shei e.

⁶ Hanangkü jijinyiphen hahyinghen uoteke. Hapheikü nelanyülei chepai, “Sheyayü paümdaituh, hatü hüshemei hahyingtuh” shei e.

⁷ Mechem hapa shennyak leidaihen yaongjapa, nelanyülei chepai telei shei yawh-ei tuh; hanangkü büpa ha ya paümteke.

⁸ Nyih ngapabü kü mechem büpa leidaihen tempa, nelanyülei chepai, “Lemhük hahying hah-ei hüshemei nyutuh, hatü hamhahphei thahshi nyutuh” shei e. Hanangkü jijinyiphen hahyingei themteke.

⁹ Hapheikü mechem hapa shennyaki büpalei yiükphü hatü büpalei chongphobü layaonghen temjapa, chepai, “Veituh, sheyü om dhüdaiteke; sheyayü hei-üng paümdaituh hatü hüshemei nyutuh. Ngenep lomi paoei leituh” shei e.

¹⁰ Shejao yahük nyeinya paümhen nelümi hapa shennyak büpalei yiükphü hatü büpalei chongphobü shei gadu nyi kü uotü layaongei daiyei Jebus (Jerusalem) ngoiteke.

¹¹ Mechem jomphongi Jebus yoei peipa, chongphobüi büpalei shembüpa kü, “Jenphong sheyayü hapa Jebus chingei paümdaishah” shei e.

¹² Shejao büpalei shembüpai büpa kü, “Israel am nevaipü kung amei chingei nepaümpih. Jeni hapa ching peih-ei maani daiyei Gibeah ngoishah” shei e,

¹³ hatü büpai shao chongphobü kü, “Jenphong daiyei Gibeahlei nevaijü Ramahlei paümshah” shei e.

¹⁴ Hanangkü Jebus peih-ei daishingkü Benjamin amei kahmük Gibeah yopailei vanghe shüdai.

¹⁵ Jomphong halei paümhen hakteke. Jomphong chingmongei shüei chingshongei uoshi nyu, shejao ha ya paümhen üpaiyao jomphong müei nelei.

¹⁶ Mechem jomphong chingshongei nyupa, bajei hük kahlei shapü aong. Büpa shongeiyü phaüshang kahmük Ephraimei nyuhamteke, shejao hahepak kü Gibeahlei nyu. (Lebü nanglak kempeyü Benjamin jat nyuteke.)

¹⁷ Büpai veishuohshingkü chingshongei yenthüng kamteipü eeyei hapa bajeipai, “Amphong melei dainya? Meleipü peiküpa?” shei phe.

¹⁸ Hatü büpai büpa kü, “Hamphongü Judah kahdok Bethlehem leipü ngei nyushing phaüshang kahmük Ephraim kü chingshouk hükei leilem kü hakküpeih. Ngei Judah kahdok Bethlehemei nyunyeih, hatü ngei shem yemei leinyüpeih, shejao üpaiyao ham shemei paümhen shüshah shei ne-ephai yaongnyüpeih.

¹⁹ Hamei gadu kü ühhen het, hatü ngei, ngelei yiükphü hatü ngelei chongphobüi hahhen hahying hatü yiü koshi nyüpeih. Nadang lemphü koshi nyüpeih” shei e.

²⁰ Hapa bajeipai, “Ham shemei shükei; ammi napü lemphü ngei shuohhen hih. Chingyangshongei tepaüm” shei e.

²¹ Hanangkü büpai jomphong müei shüei gaduthü kü het üh, hapheikü yenthüi lakhüh shephutü bhaong hahteke.

²² Mechem jom hapakei hahyingtü jaüteiyei nyupa, ngangahük kü ching leipü shennyakten hanei peiyei shem shümei yahtü sha kü daüpei khungteke. Jomi hapa bajeipa kü, “Nüngei shemei ngoiyei nyupü shennyak chingshelei ngaishih; hami büpa mü mükbongjuyung dükhen hih” shei e.

²³ Shejao hapa bajeipai chingshelei vamei jomphong kü, “Ngelei küphüthü, chingmeilemlingei henüng keipü douten tedükkei jomphongü ngelei yen hih” shei e.

²⁴ “Veituh, pai mü ngühpü ngelei yiükhathü hatü büpalei yiükphü hamü nyüpeih. Ngei jomphong müei anphapeih hatü amphongi mehe dükhüpüshang jomphong noteituh hatü dükeishuoh. Shejao hapa shennyak kü henüng nebahnevai douten tedükkei” shei e.

²⁵ Shejao shennyakthüi büpai epü neyah. Hanangkü hapa Levi shennyaki büpalei yiükphü müei anei jomphong kü shuoh, hatü jomphongi pinnyü müei daiyei vangnyak mükbongjuyung dükei vangngaiteke. Sheyü vangngai meijapü nangkü jomphongi pinnyü leishih.

²⁶ Nepnüng dhom mü hapa nyüha leiyei pinnyülei shembü ngoipü bajeipalei shem shakung tüngei vangngaipü thahshi shükshi nyu.

²⁷ Mechem pinnyülei shembü sheyü layaongei leihen sha apei vamjapa, büpalei yiükphü hapa shem sha tüngei shakung kü laki düktü doei shükshi chongjateke.

²⁸ Büpai pinnyü kü, “Leidaishah, yaongtuh” shei phuk, shejao shah nejangshuoh. Hanangkü büpai pinnyülei mahng yah-ei gadu kü haütü ching yemei lei.

²⁹ Mechem büpa shem ngoipa, büpai longkhoih hük yah-ei yiükphülei büm phaihan anpünyi anei vettü Israel phang anpünyi ieyei kü phaihan hükbaong shomteke.

³⁰ Hapa eetü shennyak peüi, “Ijip kübü Israel am vamei daipü nyih kübü shinnyih thahshi hapa keipü dou mangvam nevaijü hami henüng mang-eepih. Hayü meishi deihtü eteihen khih. Jeni ha kü lemhük payü dükhen khih. Shejao mehe dükhenang?” shei etei.