SHAHPHENBÜTHÜ 17 - DAÜLANGPÜ LAIHING (BSI)

Mikahlei Lajeithü

¹ Ephraim phaüshang kahmükei shennyak hükei meni Mikah shei nyu.

² Büpai chenyü kü, “Nüngei ngin kho anpühük yahlangpü nangkü nüngi ngei danshi thaüvaüei danpeihhapa nginü ngei yahpeih; ngelei lakei nyupeih shejao ngei ha nüng kü leiphünyeih” shei e. Hahepak kü chenyüi, “Ngelei hapeü! Shembüpai moihimantuh” shei e.

³ Hapheikü mechem büpai chenyü kü ngin kho anpühük leishuohpa, chenyüi, “Ngelei hapa nginü ngelei hapeü shingvaishi pü lajei hük ngini jümei linghen shingvaishi Shembüpa kü danhünyeih. Hanangkü hapa ngin ngei nüng kü nyokei shuohnyüpeih” shei e.

⁴ Hanangkü mechem büpai hapa ngin chenyü kü nyokei yahshuohpa, pinnyüi ngin kho nyi yah-ei ngin shükbü kü shuoh, hatü büpai lajei hük shükteke, hatü hapa Mikahlei shemei tuh.

⁵ Shaang hapa shennyak Mikah amei lompü khümshing hük nyu. Büpai lajei hatü ngongpalei bhagthuh hanei ling, hatü chehathü khongkü hük büpalei ngongpa vaihüteke.

⁶ Hathü nyih kü Israel kü ong neshiü; peüi laophüi lümpükei dükteke.

⁷ Hahepak kü Judah kahdok Bethlehem kü Judah am phang nethe hük nyu. Büpayü halei nyupü Levi am nyuteke.

⁸ Hapa shennyaki Judah kahdok Bethlehem tuhtü nyushing meipü dangpü touei nyuhen yemei dai. Büpai hapakei yemei daishingkü phaüshang kahmük Ephraimei Mikah am shemei peiteke.

⁹ Mikah-i, “Nüng meleipü peiküpa?” shei büpa kü phe. “Ngeiyü Judah kahdok Bethlehem kübü Levi am hih; ngei nyushing meipü hük yemei daiküpeih” shei e.

¹⁰ Mikah-i büpa kü, “Ngei mü nyushah. Nüngü ngelei pa hatü ngongpa vaikütuh, hatü ngei nüng kü vangbong kü ngin an, ashakviha hatü hahying yahphahen hih” shei e.

¹¹ Hapa Levi am nethepai Mikah mü nyuhen mongteke, hatü büpayü Mikahlei hapeü kei nyu.

¹² Hanangkü Mikah-i Levi am nethepa büpalei ngongpa vaihü, hatü büpa Mikahlei shemei nyu.

¹³ Mikah-i, “Sheyü Shembüpai ngei kü lemphü kü moihimanphahen shei nying; mehenangkü ngelei ngongpayü Levi am nyüpeih” shei eteke.