SHAHPHENBÜTHÜ 15 - DAÜLANGPÜ LAIHING (BSI)

Samsoni Philistia am Neütükpü

¹ Kanja angpheikü wheat hah vetpü hepak kü Samsoni yumha hük yah-ei chenyüha thümnüng yiü. “Ngei shembünyülei dungei shüshah” shei phe. Shejao chenyühalei chepai hapakei shühen nemongshuoh.

² Pinnyülei chepai Samson kü, “Hingmei nüngi pinnyü kü jiühitnyu khih shei ngei nyingpü nangkü pinnyü-ü nüngei küphüthü kü shuohtüktih. Pinnyülei chenaüang nyeishi meipü nevaiang je? Pinnyü jeiyei yahhahtuh” shei eshuohteke.

³ Samsoni jomphong kü, “Shinnyihpü shan keyü ngei mehe Philistia am kü dükhenshang ngei ajükao pungpü nevaikahen” shei e.

⁴ Hanangkü büpa daiyei mahu kho jem yepei nyi nyi yah-ei mei kü khaaiteihütü ha kü awnya shateke,

⁵ hatü ha kü aw bahhütü Philistia amei kah menei nyupü kü veyei deishih, hatü vetei shüngpü hah mon nevai, yaongshi nyupü hah, nyalingngupai hatü olive kah kemei shamtük.

⁶ Hahepak kü Philistia ami, “Üpai hapa dükpa?” shei pheteishingkü jomphongi Timnah am shennyakei cheshongpa, Samsoni chenyüha büpalei küphüthü kü shuohtükpü nangkü dükpüja shei ejateke. Hanangkü Philistia ami aongei chenyüha hatü chepa nyiphen aw kü jakei jütük.

⁷ Samsoni jomphong kü, “Amphongi hapakei dükpü nangkü ngei am kü bhüh yempü nedohpih” shei e.

⁸ Büpai longi nemei-i jom mü hok, hatü jom longi jütük, hatü büpa daiyei Etamei yaongvak hükei yaongshalei joshi nyu.

⁹ Hapheikü Philistia am aongei Judahlei baümtap vetü Lehi ching hahtük.

¹⁰ Judah ami, “Mehekei ham mü hokhen amphong aongküpa?” shei pheshuohjü jomphongi, “Ham kü Samsoni dükphopükei hamiyao büpa yepei dükhen shingvaishi aongküpeih” shei e.

¹¹ Hahepak kü Judah am shennyak haja jem Etam yaongvakei yiüei yaongshalei shüei Samson kü, “Philistia ami jen shangkü vanglem lemnyeih shei nenyingpü je? Nüngi ham kü mehe lingphopa?” shei phe. “Jomi ngei kü dükphopükei ngeiyao jom kü dükshuohpeih” shei e.

¹² Jomphongi büpa kü, “Hamphongi nüng yepei shatü Philistia am kü shuohtükhen shingvaishi peiküpeih” shei eteke. Samsoni jomphong kü, “Amphongei laki ngei nejüpih shei lahtuh” shei e.

¹³ Jomphongi büpa kü, “Hamphongi nüng nejütükpih, shejao yepei shatü mon jomei lak kü shuohhen hih” shei eshuoh. Hanangkü jomphongi vü nyi yah-ei shatü yaongvak leipü yah-ei aong.

¹⁴ Mechem büpa müei aongei Lehi ngoijapa, Philistia ami lenyaki mokei büpa touei heih, hatü Shembüpalei laangha büpa kü pei, hatü büpalei lak kü shapü vü hahtang kü aw bahpükei leidai, hatü büpalei lak kü shapü vü kemei phendaikem.

¹⁵ Hahepak kü büpai gadulei shapmai vang ja hük dangei ha yah-ei büpai shennyak haja hük jü.

¹⁶ Hanangkü Samsoni hapakei kesho lokteke: “Gadulei shahvangi mahng kü mahng chetei shüngteke, Gadulei shahvangi ngei shennyak haja jüteke.”

¹⁷ Mechem büpai ha eyei kempa, büpai hapa gadulei shahvang yaktük, hatü büpai hapa shing kü Ramath-Lehi shei menteke.

¹⁸ Hapheikü Samson longi yung leteke, hatü büpai Shembüpa kü nyükei, “Nüngi hapa aokpü longpü danghüteke, hatü ngei yung lepai dihen khih, hatü nejaptükpü Philistia amei lak kü ngei mahhen je?” shei eteke.

¹⁹ Hanangkü Kahvangi Lehilei kahsha hük aphütü haleipü yung vamhü. Samsoni hapa yung yingtü wong koh. Hanangkü hapa yungkuk kü En-Hakkore shei menteke, hatü hapa shinnyih thahshi Lehilei nyüke.

²⁰ Philistia ami vanglem lempü hepak kü Samsoni vangbong kukha thahshi Israel am müteke.