SHAHPHENBÜTHÜ 14 - DAÜLANGPÜ LAIHING (BSI)

Samson Shem Yempü

¹ Nyih hük Samson Timnahlei yiü, hatü halei büpai Philistia am nela hük ee.

² Mechem büpa shemei leipa, büpai chenyü hi chepa nyi kü, “Ngei Timnahlei Philistia am nela hük eepeih; pinnyü ngelei nyüha vaihen yahshih; ngei pinnyü mü shem yemhen hih” shei e.

³ Chenyü hi chepa nyi-i jangei, “Shem am khongkü nevaijü jenei nanglak khongkü nüngi lümpü yiükhila hükao neshiüang je? Nejaptükpü Philistia am kungyiükang yahhen je?” shei e. Shejao Samsoni chepa kü, “Ngei pinnyü-üng yahhen hih; ngei mü jiüteihenü pinnyü mon khih” shei e.

⁴ Chenyü chepai hapayü SHEMBÜPAleipü khih shei nenying; mehenangkü büpai Philistia am khüei dou dükhen lem yempü shiüteke. Hapa nyihhihe kü Philistia ami Israel am shak kü vanglem lemei nyuteke.

⁵ Hanangkü Samsoni chenyü hi chepa nyi mü Timnahlei yiü. Jom yiüei Timnahlei nyalingngupai kah ngoishingkü mailang hük büpa touei ngüngei heih.

⁶ Shembüpalei laangha büpa kü peiyei büpai hapa mailang lakhingi yum cheha hük shaakpükei shaaktük. Shejao büpai mehe dük, ha chenyü hi chepa nyi kü ne-eja.

⁷ Hapheikü büpa yiüei pinnyü mü shah etei, hatü büpai pinnyü lüm.

⁸ Kanja pheikü mechem büpai pinnyü mü shem yemhen nyokei yiüpa, büpai hapa mailang mahng kü lemhaoei heih-ei veishuoh shingkü nyahshai hatü nyahjiü chongjateke.

⁹ Büpai hapa nyahjiü yah-ei lakei notü hahyaki daiteke. Büpai chenyü hi chepa nyi kao maanbaongi shuoh, hatü jijinyi kao hapa nyahjiü mailangei mahng leipü yahpeih shei ne-eshuoh.

¹⁰ Chepai hapa nyüha am shemei yiü, hatü bahalei vanglem aimü yiükyah mo ühteke.

¹¹ Mechem Philistia ami büpa eepa, jomi büpa mü jemhen küphü hapüan shuoh.

¹² Ngei shahlap hük eküshah shei Samsoni jomphong kü e, “Amphong hanei-i mo hahpü nyih nyet kam kü ha ephüjema, ngei büpa kü nyemin ashak hapüan hatü banghpung kü owhen ow hapüan shuohhen.

¹³ Amphongi ngei kü ha ne-ephaaokjema amphongi ngei kü nyemin ashak hapüan hatü banghpung ow hapüan shuohtuh” shei e. Jomi büpa kü, “Nüngei shahlap eshih; hami hapa bangshah” shei e.

¹⁴ Büpai jangei e, “Hahpü am kübü lemhük hahhen dangpeih; Wong kohpü am kübü vüngnyangpü lemhük vampeih.” Shejao nyih jem thahshi jomphongi hapa shahlap ne-eaok.

¹⁵ Nyih alipabü kü jomi Samsonei chenyüha kü, “Ham kü hapa shahlap ephahen ambaha yawhkütuh, hei nevaijema hami nüng hatü ampa am shem awi haptükhen. Anjinyi-i ham lomohhününg nyükpü je?” shei e.

¹⁶ Hanangkü Samsonei chenyühai büpa kü thepei, “Nüngi ngei kü nebam; jiühitnyu khih; nüngi hamei nanglakthü kü shahlap hük eteke, shejao hapa lappü nüngi ngei kü ne-epha” shei e. “Ngei onyü hi opa nyi kü dangkao mangejapih; mehekei ngei nüng kü hapa ephahenang?” shei büpai eshuohteke.

¹⁷ Pinnyüi nyih nyet mo yangkemei thepteke. Hanangkü nyih nyetpabü shompülei pinnyüi ahshi nyeanshuohpü nangkü büpai pinnyü kü ha eteke.

¹⁸ Hanangkü nyih nyetpabü vanghe shüshekü hapa chingnyü kübü shennyakthüi büpa kü e, “Nyahjiü mü vüngnyangpü mehe nyüpa? Mailang mü wong kohpü mehe nyüpa?” Samsoni jomphong kü, “Amphongi ngelei mohoh mü han nehoklangmeyü ammi ngelei shahlap nenyingaokhah shepeih” shei e.

¹⁹ Hahepak kü Shembüpalei laangha büpa kü pei, hatü büpa Ashkelonei yiüei shennyak hapüan jütü jomei büm-ow nyiukei büpa kü shahlap eshuohpüthü kü shuoh. Mongshih-ei büpai chepalei shemei leidai,

²⁰ hatü Samsonei chenyüha shemyem hepak kü büpa mü sheühteipüthü kü shuohphong.