SHAHPHENBÜTHÜ 12 - DAÜLANGPÜ LAIHING (BSI)

Jephthah hatü Ephraim am

¹ Ephraim am Zaphonei heih-ei Jephthah kü, “Ammon am khüei hokhen shingvaishi chemi daihen ham kü nenyüki nüng mehekei daipa? Hanangkü hami nüng mongei uohütü nüngei shem awi haptükhen hih” shei e.

² Shejao Jephthah-i jomphong kü, “Ham kü nemei-i dükpü nangkü ngei hatü ngelei nanglakthüi Ammon am mü longi nemeitei-i nyuhampeih. Ngei am kü nyükteke, shejao ammi ngei jomei lak kübü neyangpeih.

³ Ammi ngei neyangphahen khih shei mechem ngei veiaokpa, ngei ngelei yangnyu lanei shuohtü viong peih-ei Ammon am khüei hoknüng daipeih, hatü Shembüpai ngelei lak kü jom yahphopeih. Shinnyih ngei mü hoknüng mehekei amphongü aongküpa?” shei e.

⁴ Hahepak kü Jephthah-i Gilead am kemei nyükei thaitü Ephraim am mü hokteke. Gilead amü Ephraim hatü Manasseh am mü neshepnekhai-i yandaipü am hih shei eteke.

⁵ Ephraim am nyaiyei Jordan yung homei daihen lem yomlang. Mechem Ephraim am yanglem yemei, “Ngei Jordan yung homei leishah” shei eshuohhenshang, Gilead ami büpa kü, “Nüngü Ephraim am je?” shei phe. Üpai “Nevaipih” shei ejahenshang,

⁶ jomi büpa kü, “Shibboleth” shei etuh shei ehamteke; mehenangkü jomei ju kü hapa shah ngeü jiüshi nevamaokpü nangkü, “Sibboleth” shei epüthü peü yepei jütükkem. Hahepak kü Ephraim am haja pinyi thahshi mahteke.

⁷ Jephthah-i Israel am vangbong vok thahshi shahphen. Hapheikü büpa di, hatü jom ching Gileadei mahng vü.

Ibzan, Elon hatü Abdon

⁸ Büpa pheikü Bethlehem am Ibzani Israel am müteke.

⁹ Büpalei yeshangthü hapüan hatü yiükhathü hapüan nyu. Büpai yiükhathü peü lebü phang kü doi deishih, hatü büpalei yeshangthü shingvaishi lebü phang kübü yiükha hapüan leiteke. Ibzani Israel am vangbong nyet thahshi müteke.

¹⁰ Hapheikü Ibzan di, hatü Beth-lehemei büpalei mahngchongei mahng vüteke.

¹¹ Büpa pheikü Zebulun am Eloni Israel am vangbong an thahshi müteke.

¹² Hapheikü Zebulun am Elon di, hatü Zebulun amei kahdok Aijalonei mahng vüteke.

¹³ Büpa pheikü Pirathon leipü Hillelei cheha Abdoni Israel am müteke.

¹⁴ Büpa yeshang pinyi hatü hüpeüthü baha hapüan gadu pejempüan müteipüthü nyuteke. Abdoni Israel am vangbong shet thahshi müteke.

¹⁵ Hapheikü Pirathon am Hillelei cheha Abdon di, hatü büpa Amalek amei phaüshang kahmük Ephraim amei kahdok Pirathonei mahng vü.