SHAHPHENBÜTHÜ 11 - DAÜLANGPÜ LAIHING (BSI)

¹ Gilead am Jephthahyü monglongpü veshan hük nyuteke. Chepayü Gilead nyu, hatü chenyüyü büm yupü nyüha hük nyuteke.

² Gileadei chenyühai shao lebü yeshanghathü büh, hatü mechem jom longpa, jomi Jephthah changtük. Jomi büpa kü, “Nüngi opalei mükjüp meheyao yahnüng neaok; mehenangkü nüngü lebü nyühalei hapeü khih” shei eteke.

³ Hanangkü Jephthah büpalei jeihinaüthü toueipü paüei daiyei Tob kahdokei nyu. Halei büpai shennyaktenthü mü khaaitü büpa mü müshi longtei.

⁴ Kanja hük angpheikü Ammon ami Israel am khüei hok.

⁵ Mechem Ammon ami Israel am khüei hokpa, Gilead am mübüthüi Tob kahdok leipü Jephthah müei leihen dai.

⁶ Jomi büpa kü, “Leishah, hatü Ammon am khüei hokhen nüng hamei mübü vaikütuh” shei e.

⁷ Shejao Jephthah-i Gilead am mübüthü kü, “Ammi ngei kü longi jiühit, hatü opalei shem kübü ngei changtükpeih; shaang am shanghah vongshüh pongpü nyih kü ngei yemei mehekei peikünya?” shei e.

⁸ Gilead am mübüthüi büpa kü, “Nüngi epeyü vaiteke, shejao shaang ham nüng touei nyokei leikünyeih; Ammon am khüei hokhen ham mü nyokei leishah, hatü nüngü Gileadei nyupüthü peü shak kü shangjing vaihen” shei e.

⁹ Jephthah-i Gilead am mübüthü kü, “Ammi ngei Ammon am khüei hokhen müei leiyei Shembüpai ngei kü aokpü danghüjema, hingmei ngei ammei mübü vaihen je?” shei phe.

¹⁰ Gilead am mübüthüi jangei, “Shembüpayü jen aa kü denbü nyukahen, hatü nüngi epükei hamphongi dükhen” shei e.

¹¹ Hanangkü Gilead am mübüthü mü Jephthah nyokei lei, hatü nanglakthüi büpa jom shak kü mübü hatü shangjing vaihü, hatü Jephthah-i Mizpahlei Shembüpa touei hathü shah kemei e.

¹² Hapheikü Jephthah-i Ammon ongpa touei phongmokbü shomei, “Ammi hamei kahdok khüei hokhen mü jen aa kü mehe nyüpa?” shei phe.

¹³ Ammon ongpai Jephthahlei phongmokbüthü kü jangei, “Mehenangkü Israel am Ijip kahdok leipü leishingkü hamei kahdok Arnon kübü Jabbok, hatü Jordan thahshi yahlangpeih. Shaang hapa chingmei kü nyokei leishih” shei e.

¹⁴ Shao chem Jephthah-i Ammon ongpa touei phongmokbüthü shomei,

¹⁵ büpa kü, “Jephthah-i hapakei enyüke: Israel ami Moab kahdok nevaijü Ammon amei kahdok neyah-angpih.

¹⁶ Shejao mechem jom Ijip kahdok leipü vamei leipa, Israel ami jahpan homei Hakla Yungching hatü Kadesh homei leipeih.

¹⁷ Hahepak kü Israel ami Edom ongpa kü phongmokbüthü shomei, ‘Ammei kahdok homei daihen uwshih’ shei epeih, shejao Edom ongpai ha nemongpeih. Jomi Moab ongpa kao hapakei phepeih, shejao büpaiyao nemongpeih. Hanangkü Israel am Kadeshlei nyupeih.

¹⁸ Hanangkü jomi jahpan homei bakei Edom hatü Moab kahdok kü kaüei daiyei Moab kahdok heongphilep ngoiyei Arnon yungdang phihük lemei baümtap vepeih. Jomi Moab kahdok kü nehet; mehenangkü Arnonü Moab amei viong nyuteke.

¹⁹ Hapheikü Israel ami Heshbonei vanglem lempü Amor am Sihon ongpa touei phongmokbüthü shomei, ‘Ammei kahmük homei hami hamei kahdokei leishah’ shei phe.

²⁰ Shejao Sihoni Israel am kü jomei kahmük homei leihen nemong. Büpai büpalei veshanthüang peü thaiyei Jahazlei baümtap vetü Israel am mü hokpeih.

²¹ Hahepak kü Shembüpa, Israel amei Kahvangi Sihon hatü büpalei veshanthü kemei Israel amei lak kü shuoh, hatü jom neüpeih; hanangkü Israel ami hapa kahmük kaamei yahlangpeih.

²² Jomi Amor amei kahmük Arnon kübü Jabbok hatü bhih kahdok kübü Jordan thahshi yahlangpeih.” shei e.

²³ “Hanangkü shaang Shembüpa, Israel amei Kahvangi laophülei nanglak Israel am shingvaishi Amor am changtükpeih. Amphongi jomei shing aethen mehe jiüpü nyüpa?

²⁴ Ammi ammei Kemosh kahvangi yahphopü neyahhen je? Hapa keiha Shembüpa, hamei Kahvangi mehe shuoh, ha hami yahhen.

²⁵ Amphongü Zipporlei cheha Moab ongpa Balak mü meipeih shei deihnyu je? Büpai chemao Israel am khüei dela nevaijü hokla?

²⁶ Vangbong kho jem thahshi Israel ami Heshbon, hatü Aroer kü, hatü hathü kü shinpü chingthü hatü Arnon yungkung kü nyupü chingnyüthü peü Israel ami yah-ei nyuhampeih. Hajükpü hepak yangkü neyahlangi mehekei nyupa?

²⁷ Ngei am mü pungei meheyao nedük, shejao ammi ngei mü hokpü nangkü pungei nyüke. Shembüpa, Shahphenbüi Israel hatü Ammon am nyi aa kü nedanteipü nyemphenkei” shei e.

²⁸ Shejao Ammon ongpai Jephthah-i shompü shah kü mong neshuoh.

Jephthah-i Lahpü

²⁹ Hahepak kü Shembüpalei laangha Jephthah kü pei. Büpai Gilead hatü Manasseh homei dai, hatü Gilead kü nyupü Mizpah homei büpai Ammon am khüei hokhen dai.

³⁰ Jephthah-i Shembüpa kü, “Nüngi ngelei lak kü Ammon am yahphüjema,

³¹ ngei Ammon am vehok neütü leishingkü mepa shongei ngelei shem kübü ngei mü pongteinüng vamkahenshang, ngei nüng kü hapa yah-ei jakpü moila shuohhen” shei vangei e.

³² Hapheikü Jephthah-i Ammon am khüei hokhen dai, hatü Shembüpai büpalei lak kü Ammon am shuoh.

³³ Büpai Aroer kübü Minnith kü shinpü moidoi kü nyupü chingnyüthü kukha Abel-Karamim thahshi hahteke. Hanangkü Israel ami shennyak longi jüei Ammon am neüteke.

Jephthahlei Yiükha

³⁴ Mechem Jephthah-i shem yemei Mizpahlei leijapa, büpalei yiükha phaam kaongei phaukteiyaki chepa ombomei vamjateke. Pinnyü-ü büpalei halomnyü; pinnyü mü lenei yeshang nevaijü yiükha üpa-ao nenyu.

³⁵ Mechem büpai pinnyü eepa, büpai mongshangei laophülei ashak shaaktük hatü lenei, “Oh ngelei yiükha! Nüngi ngelei mongdang mangtükteke! Mehenangkü ngei Shembüpa kü vangpüshuwpü hük lingpeih, hatü ngei ha mangtüknüng neaok” shei e.

³⁶ Pinnyüi büpa kü, “Nüngi Shembüpa kü vangtükpü vaijema, nüngi vangtükpükei ngei kü ha düktuh; mehenangkü Shembüpai nüngei vepa Ammon am kü bhüh yemhüteke.

³⁷ Shejao pinnyüi chepa kü, ‘Ngei kü hapa dou hük mon dükshih. Ngei küphüthü mü kahshangei aongei jomphong mü longteihen, hatü jomphong mü young hanteihen shingvaishi lenyang nyi hanshih; mehenangkü ngeiyü shem neyemi nela den mü didainyu khih’ ” shei e.

³⁸ Büpai, “Daituh” shei e, hatü lenyang nyi shingvaishi büpai pinnyü deishih. Hanangkü pinnyüi küphüanaüthü mü kahshangthülei aongei nela den didaihen khih shei youngeinangei theptei.

³⁹ Lenyang nyi angpheikü pinnyüi chepa yemei lei, hatü chepai lahtükpükei pinnyü jüei moila shuoh. Pinnyü pai mü ngühpü nela yangnyu nyuteke.

⁴⁰ Hanangkü Gilead am Jephthahlei yiükha nebenelakhen shingvaishi Israel nela vangbong ieyei nyih ali daiyei youngeinangpü vanglem chongpangteke.