SHAHKÜP 9 - DAÜLANGPÜ LAIHING (BSI)

Kahvang Khüei Yaongpü Mang Lat

¹ Oh Israel am, bangtuh! Shinnyih ammi Jordan yungdang homei am mü longpü, hatü wong kohpü jatthü vangsho kü shongshi penyü showtükpü chingnyüthü yahhen hepak ngoinyüke.

² Haleipü Anakim amü bümlong wong kohshi nyüke. Ammi jom jung nyingei nyüke hatü “Jom mü üpa yaongaokhen”? shei eteipü danteke.

³ Shejao shinnyih Shembüpa, ammei Kahvangi am shekü awyei-i laiyei hahpükei daihen. Büpai am touei jomphong neütükhen, hatü Shembüpai am kü lahpükei ammi jom changtükhen hatü lomi mahtükhen.

⁴ Shembüpa, ammei Kahvangi am shekü jom changtükpheikü am nyingi, “Ham changpüshapü nangkü hapa kahdok yahhen Shembüpai ham müei leipeih” shei te-e. Hapakei nevai. Am shekü Shembüpai jom changtükpeyü jomei mang nangkü nyüke.

⁵ Hapayü am changpüshapü hatü daülangpü kü hapa kahdok am kü shuohnyu nevai, shejao ha jatthüi mang thahpü nangkü, hatü ammei bühipa Abraham, Isak hatü Jakob hathü kü lahpü jiühühen nangkü Shembüpa, ammei Kahvangi jom changtükpeih.

⁶ Shembüpa, ammei Kahvangi hapa kahcheü kohpü kahdokü am changpüshapü nangkü shuohpü nevai shei nyingtuh; mehenangkü amphongü mong vaanpü nanglakthü khih.

⁷ Jahpanei nyushi ammi Shembüpa, ammei Kahvang mongshihhüpü ha deihtuh hatü tebetük. Am Ijip tuhtü layaongpü nyih kübü shinnyih hatou shing ngoipü thahshi ammi Shembüpa khüei yaonghampeih.

⁸ Sinai Kahshang leiyao am mahtükhen mü ammi Shembüpa mongshihhüpeih.

⁹ Shembüpai am mü lingpü vangpüshuwpü shahkungnyü yaongshung yahhen shingvaishi ngei kahshangei aongei meheyao nehahneyingi nyih pinyi ya pinyi halei nyuteke.

¹⁰ Shembüpai ngei kü büpalei laki kaokei nyangpü yaongshung nyi yahphüteke. Hapa kü Shembüpai amphong kahshangei thaiyei nyushi aw kübü vamei epü shahkungnyüthü peü nyangei nyuteke.

¹¹ Nyih pinyi ya pinyi dohpü lemei Shembüpai ngei kü vangpüshuwpü nyangpü yaongshung nyi yahphüteke.

¹² Hahepak kü Shembüpai ngei kü, “Nüng leituh; mehenangkü Ijip leipü nüngi müei leipü nanglakthüi mang thahteke. Ngei jom kü dükhen eshuohpü yakphongtü jom shingvaishi lajei lingei nyüke” shei ephüteke.

¹³ Shao Shembüpai ngei kü, “Ha nanglakthüyü ahshi-üng mong vaanpüthü khih shei ngei nyingteke.

¹⁴ Ngei lak neyingi jom mahtükhen hatü vangsho phang kübü jomei men thittükhen, hatü ngei nüngü jom mü wong kohpü hatü longpü jat hük leihühen” shei ephüteke.

¹⁵ Hanangkü kahshangei aw bahshi tuhtü haleipü ngei vangpüshuwpü yaongshung nyi notü nyokei lei.

¹⁶ Mechem ngei leiyei veipa, amphongü Shembüpa, ammei Kahvang khüei mang thahtü nyu; am nyingi am shing mohoh cheha lajei lingtü nyuteke. Shembüpai am kü epü lem kü nevai-i lemnyong kü lüdaitü nyuteke.

¹⁷ Hanangkü ngei yaongshung nyiphen yah-ei amphongi eeshi shüktü khih mü nihtük.

¹⁸ Shao amphongi Shembüpa tou mü mehe ten ha dükei mang thah-ei büpa mongshihhüpü nangkü ngei meheyao nehahneyingi nyih pinyi ya pinyi Shembüpa tou kü aümei khüm.

¹⁹ Shembüpa mongshih anpü nangkü ngei longi nyemteke; mehenangkü büpai am mahtükhen mü mongshihteke, shejao shao Shembüpai ngei epü kü bang.

²⁰ Hatü Shembüpai Aaronao jütükhen mü mongshih, shejao hahepak kü ngei Aaron nang kao phop.

²¹ Ngei ammei mang dou mohoh chehayao yah-ei aw kü jaktük. Hapheikü ngei ha khih mü mangei bhihla kei ngümtük hatü ha yah-ei daiyei kahshang leipü yenei shapü yungyenei yaktük.

²² Amphongi Taberah, Massah hatü Kibroth-Hattaavahlei nyushiyao Shembüpa, ammei Kahvang mongshihhüpeih,

²³ hatü mechem Shembüpai am Kadesh-Barnea leipü shompa, büpai amphong kü, “Aongtuh hatü ngei amphong kü shuohpü kahdok yahtuh” shei eteke.

²⁴ Shejao ammi Shembüpa, ammei Kahvang khüei yaong. Ammi büpa kü hingnelem nevaijü ven nebang. Ngei amphong nyinghinüng ammi Shembüpa khüei yaongpeih.

²⁵ Shembüpai am mahtükhen shei epü nangkü nyih pinyi ya pinyi thahshi ngei Shembüpa tou kü aümei khümpeih,

²⁶ hatü ngei Shembüpa kü phopteke, “Oh Jeiyong Shembüpa, nüngei laklu wong longpü nganhilongi nüngi Ijip leipü yangei leipü nüngei nanglakthü temahtük.

²⁷ Nüng chongphobü Abraham, Isak hatü Jakob hathü deih-ei dangtuh. Nanglakthü mong vaanpü, jomei douten hatü jomei mang kü khah-ei kawei teveikei.

²⁸ Hei nevaijema Shembüpai jom kü shuohhen shei lahpü kahdokei müei nepeiaokükhih, hatü büpai jom kü jiühitpü nangkü jom jahpanei jütüknüng müei daipü khih shei Ijip ami deihhen khih.

²⁹ Shejao hathüyü nüngi nüng lompü vaihen shingvaishi jelangpü nanglakthü hatü nüngei laklu wong longpai Ijip leipü nüngi mülangpü nanglakthü khih.”