SHAHKÜP 8 - DAÜLANGPÜ LAIHING (BSI)

Peihdaipü Moihimanthü Deih-ei Danghen Epü

¹ Am nyuaokhen, daeisheyei nyuhen hatü ammei bühipa kü Shembüpai lahpü kahdok thahei yah-aokhen shingvaishi shinnyih ngei am kü shuohpü shahkungnyüthü peü düktuh.

² Shembüpa, ammei Kahvangi bong pinyi thahshi jahpanei am müei daiyei ammei mong kü deihpü nyinghen hatü ammi büpalei shahkung ven bangüla shei shanghah shomei am kü dokpü deih-ei dangtuh.

³ Büpai amphong aeiyeileyei ang, hatü am hatü ammei bühipai mechemao manghahpü manna hahhen shuohteke. Shennyaki aani mon yangnyu nenyunyih shejao Shembüpalei ju kübü vampü shah ieyei mon yangnyu nyunyüpeih shei am kü nyuhhen shingvaishi hapa dükteke.

⁴ Bong pinyi thahshi ammei ashakviha chang neleidai, nevaijü ammei lakhila nepouk.

⁵ Pa hüki laophülei hapeü kü nyuhpü venpükei Shembüpa, ammei Kahvangi am kü nyuh-ei venpeih.

⁶ Hanangkü Shembüpa, ammei Kahvangei shahkungnyüthü bangtuh, büpalei shahkung kü kamtuh hatü dhüm shuohtuh.

⁷ Mehenangkü Shembüpa, ammei Kahvangi amphong kahcheü kohpü kahdok, yungnyü, shoha hatü yunglok vamei kahji hatü kahshangthü kü yenei shapü kahdok;

⁸ atta hatü barley, nyalingngupai, adhajük, pomegranat betjük, olive mainga hatü nyahjiü vampü kahdok;

⁹ taoeinangei nevaijü aeiyeileyei nenyupü; yaongü nyiam kei hatü kahshangthü leipü langdüknyiam yah-aokpü kahdokei müei leinyüke.

¹⁰ Mechem amphong moh-ei hüshemei hahhenshang, am kü kahcheü kohpü kahdok Shembüpa, ammei Kahvangi yahphopü nangkü menvih shuohtuh.

Shembüpa Nebetükhen Shahvüng

¹¹ Shembüpa, ammei Kahvang nebetükhen lituh, hatü büpalei shahkungthü hükao neshaihen kenhingtuh.

¹² Mechem amphongi moh-ei hahtü hüshemhen, hatü bükhishem meipü vetü nyuhen,

¹³ mohoh hatü mithü, ammei hon hi ngin, hatü ammei mophimo nyeinya dahenshang,

¹⁴ aa vaiyei nyupü Ijip kahdok leipü müei leipü Shembüpa, ammei Kahvang betüktü nechangmeihen kenhingtuh.

¹⁵ Büpai am leü kohpü biünyü biütam, yiüjikaungkang nyupü jahpan homei müpeih. Yung neshiüpü kahdokvan kü büpai am shing yaong kübü yung vamhüpeih.

¹⁶ Jahpanei büpai am kü ambü ampai mechemao nehahpü manna hahhen shuohpeih. Pheilei am kü moihimanphahen shingvaishi büpai am kü shanghah shomei dokpeih.

¹⁷ Am nyingi, “Hamei wongi ham shemmei leipeih” shei ehen aok.

¹⁸ Shejao hayü Shembüpa, ammei Kahvangi shemmei leihüpeih shei deihtuh, hatü büpai shinnyih thahshi ammei bühipa kü lahtükpü lakshing düknyüpeih.

¹⁹ Amphongi Shembüpa, ammei Kahvang betüktü lebü kahvang phei müei daiyei khümjema hatü chongphojema, amphong hingmei mahkemhen shei shinnyih ngei am kü shahvüng shuohnyüpeih.

²⁰ Shembüpa, ammei Kahvangei shah nebangjema, ammi eeshi Shembüpai lebü jatthü mahtükpükei amphongao mahtükhen.