SHAHKÜP 7 - DAÜLANGPÜ LAIHING (BSI)

Jelangpü Nanglakthü

¹ Mechem Shembüpa, ammei Kahvangi am kü hapa kahdok shuohhen shingvaishi müei leihenshang, büpai am mü longpü hatü wong kohpü jat nyet– Hit am, Girgash am, Amor am, Kanan am, Perizz am, Hiv am, hatü Jebus am amphong toueipü changtükhen.

² Mechem Shembüpa, ammei Kahvangi ammei lak kü hathü lanei shuohhen, hatü neühenshang, amphongi hathü chemjalak kü mahtükhen. Jom mü chingmei teling nevaijü phahji tehu.

³ Jom mü yiük tepong. Ammei yiükhathü jomei yeshangthü kü doi tedeishih nevaijü ammei yeshangthü shing jomei yiükhathü teyah.

⁴ Mehenangkü jomi ammei hapeüthü ngei toueipü lepei jomei kahvang khümhen mülanghen, hatü Shembüpai am khüei mongshihhen hatü ngangahük kü mahtükhen.

⁵ Ammi jom kü hapakei dükeishuoh: Jomei moidüthü bentüktuh; jomei daülangpü yaong shemnyüthü nihtüktuh; jomei Asherah kahvang lajei mangtüktuh, hatü jomei lajeithü aw kü jaktüktuh.

⁶ Mehenangkü amphongü Shembüpa, ammei Kahvang touei daülangpü nanglakthü nyüke. Shembüpa, ammei Kahvangi kahdok shak kü nyupü hangkuli peü mü amphongü büpalei lompü hayaoha nanglak vaihen jelangpeih.

⁷ Amphongü mih mü hayaoha nyeinya nanglak banghpü nangkü Shembüpai am kü bampü nevaijü jepü nevai; mehenangkü amü kahdoknyü kü peü mü maanpü jat nyuhampeih.

⁸ Shejao Shembüpai am kü bampü nangkü hatü büpai ammei bühipa kü lahpü nangkü büpalei laklu wong longpai aa vaihampü kahdok Ijip ongpa Pharaohlei lakmong leipü amphong angei leiteke.

⁹ Shembüpa, ammei Kahvangü Kahvang nyüke; büpayü hingshangpü Kahvang; büpa kü bampüthü hatü büpalei shah bangpüthü kü denshem haja haja kü büpai lahpü bampü hunyüpeih.

¹⁰ Shejao büpa kü jiühitpüthü kü pheiyei nenyui hanghi shuohhen.

¹¹ Hanangkü am kü nyuhpü peü bangtuh hatü shinnyih ngei am kü shuohpü shahkungnyüthü peü bangtuh.

Ven Danpü kü Moihiman

¹² Amphongi hapa shahkungnyüthü bangjema, hatü kenhingei dükjema, Shembüpa, ammei Kahvangi ammei bühipa kü lahpükei büpai am mü lahpü bampü huphahen.

¹³ Büpai am kü bamhen, moihimanhen hatü am nanglak dahühen. Büpai ammei naü uoshing, kahdok kü sheilivungla, betjükvungjük, mohoh khok kü mohoh, mi khok kü mi shei am kü shuohhen shei ammei bühipa kü lahpü kahdokei moihimanphahen.

¹⁴ Nanglak üamiyao am kei moihiman nedanghen; ammi baha nevaijü nyüha hapeü neshiüi nevaijü ammei yemhimak mepaiyao cheha neshiüi nenyuhen.

¹⁵ Shembüpai amphong dinlem nemeipü peü kübü yanghen. Amphong Ijiplei ponghahpükei chamhilem nemeipai nehanghihüpih, shejao büpai ammei vepathü kü hathüi hanghihühen.

¹⁶ Shembüpa Kahvangi ammei lak kü shuohpü jatthü kemei mahtükkemtuh, hatü ammi jom kü yahyang shinshang tehu. Ammi jomei kahvang kü tekhüm; mehenangkü hapai am kü aethitai vaikahen.

¹⁷ Hathü jat ham mü wong kohpüba nyüke hatü hami jom mekei etü changtükaokhen shei ammi ehen aok.

¹⁸ Shejao jom kü tenyem; Shembüpa, ammei Kahvangi Ijip ongpa Pharaoh hatü nanglakthü kü mehe dükshuohpa ha meishi deihhahtuh.

¹⁹ Ammei müki eeshi nyembenüng chamhilem, yashanyale, thamapü dou dükpü hatü Shembüpalei wong longpai am müei leipü deihtuh. Ammi shaang nyempü shennyakthü peü kü Shembüpa, ammei Kahvangi aihük mü dükkahen.

²⁰ Shembüpa, ammei Kahvangi am kü joei nyaiyei daipüthü mangdikem thahshi jom kü cham shomhen.

²¹ Ammi jom kü tenyem; mehenangkü am mü nyupü Shembüpa, ammei Kahvangü longpü hatü nyembenüng Kahvang nyüke.

²² Shembüpa, ammei Kahvangi ha jatthü maani maani shei changtükkemhen. Ammi chemjalak kü jom nemahtükaokhen, hei nevaijema phaüyem laungei am kü hanghiphahen.

²³ Shejao Shembüpa, ammei Kahvangi jom mangmahkem thahshi ammei lak kü lanei yahphahen.

²⁴ Büpai jomei ongthü ammei lak kü yahphahen, hatü ammi vangsho phang kübü jomei men thittükhen. Üamiyao am khüei neyaongaokhen; ammi jom mahtükhen.

²⁵ Ammi jomei kahvangei lajeithü aw kü jaktükhen. Hathü shihpü hon hi nginthü kü amphongi mük tehüh, hatü amphongi laophü shing ha teyah; hei nevaijema hapai aethitai vaikahen, hatü Shembüpa, ammei Kahvang touei hapayü jiühitbenüng nyüke.

²⁶ Ammi laophülei shemei henüng jiühitbenüng yah-ei telei; hei nevaijema hathü keiha amphongao mahtükhen. Hathü kü chemjalak kü jiühittuh hatü yaktüktuh; mehenangkü hathüyü mahtükhen shingvaishi khaatei tuhtükpü nyüke.