SHAHKÜP 6 - DAÜLANGPÜ LAIHING (BSI)

Longpü Shahkungnyü

¹ Hathüyü am Jordan yung homei daiyei ammi mükjüp yahhen kahdokei dükhen shingvaishi Shembüpa, ammei Kahvangi ngei kü nyuhtuh shei ephopü shahkungnyüthü nyüke.

² Ammi hapa kahdokei luangi nyuaokhen shingvaishi am hatü ammei hapeüthü halei nyupü thahshi Shembüpa, ammei Kahvang kü dhüm shuohtuh hatü ngei am kü shuohpü büpalei shahkungnyüthü bangtuh.

³ Bangtuh, Oh Israel am, Shembüpa, ammei bühipa Kahvangi am kü lahpükei am meishi nyuhen hatü amma hatü nyahjiü mon yenpü kahdok kü am daeisheyei nyuhen shingvaishi büpai epü kenhingei bangtuh.

⁴ Bangtuh, Oh Israel, Shembüpa, hatü Shembüpa monha jenei Kahvang shei deihtuh.

⁵ Shembüpa, ammei Kahvang kü ammei mongdang kempai, ammei laangha kempai hatü ammei wong kempai bamtuh.

⁶ Shinnyih ngei am kü shuohpü shahkungnyü ammei mong kü jaotuh.

⁷ Ammei hapeüthü kü hapa nyuhtuh. Am shemei uoshingkü, lem kü kamshingkü, shishingkü, hatü paoshingkü hapa jung etuh.

⁸ Ammei lak kü hathü shatuh hatü nyangeihepü hük leshi ammei shangba kü hathü khüamtuh.

⁹ Ammei shem shaden kü hatü ammei peshaden kü hathü nyangtuh.

Ven Nedanpü Khüei Shahvüng

¹⁰ Mechem Shembüpa, ammei Kahvangi ammei bühipa Abraham, Isak hatü Jakob kü lahpü kahdokei am müei shühenshang, hapa kahdok kü ammi nelingpü longpü hatü moihiman chingnyü büpai am kü shuohhen.

¹¹ Ammi neshihpü kü shemthü kemei doumei mon maei, ammi neshopü yungkuk, hatü ammi nesheipü nyalingngupai hatü olive betjük vaümei hah-ei hüshemshingkü,

¹² aa vaishi nyupü Ijip kahdok leipü am müei leipü Shembüpa nebetükhen kenhingtuh.

¹³ Shembüpa, ammei Kahvang kü dhüm shuohtuh hatü büpa kü mon khümtuh, hatü büpalei men kü mon vangeishuwtuh.

¹⁴ Lebü kahvang kü tekhüm, am ngeih-ei shonei nyupü nanglakthülei kahvang kü tekhüm.

¹⁵ Mehenangkü Shembüpa, am mü nyupü ammei Kahvangü mükhühpü Kahvang, hatü am khüei büpa mongshih vamkahen, hatü büpai hapa kahdok kübü am mahtükhen.

¹⁶ Ammi Massahlei dükpükei Shembüpa, ammei Kahvang kü tedük.

¹⁷ Shembüpa, ammei Kahvangi am kü shuohpü shahkungnyüthü banghen nyingtuh.

¹⁸ Shembüpa touei mepa jiüpü hatü meipü nyüpa, ha düktuh, shejüang am meishi nyuhen, hatü Shembüpai ammei bühipa kü lahpü kahcheü kohpü kahdokei shüei hapa yah-aokhen,

¹⁹ hatü Shembüpai epükei ammi vepathü changtükhen.

²⁰ Pheilei ammei hapeüthüi am kü, “Shembüpa, jenei Kahvangi jen kü hathü shahkung peü dükhen mehekei epa yo?” shei phephüshingkü,

²¹ ammi jomphong kü, “Jenü Ijip am Pharaoh ongpalei aa vaihampeih, shejao Shembüpa laklu wong longpai Ijip leipü jen müei leipeih” shei etuh.

²² Ammei müki eeshi Shembüpai Ijip am hatü Pharaoh ongpa hatü jom shem khüei yashanyale, thamapü hatü nyempühanbenüng dükshuohpü eeteke.

²³ Shejao büpai hatouei jen tuhhen shingvaishi Ijip leipü jen müei leipeih, hatü büpai jenei bühipa kü lahpü kahdok jen kü shuohpeih.

²⁴ Hanangkü Shembüpa i jen kü hathü shahkung banghen hatü shaangpükei moihimanei jen yemmü nyuhen shingvaishi Shembüpa, jenei Kahvang kü dhüm shuohhen epeih.

²⁵ Shembüpa, jenei Kahvang touei büpai epü shahkungthü peü hingshangi dükjema, büpai jen kü mong hahhen.