SHAHKÜP 5 - DAÜLANGPÜ LAIHING (BSI)

Shahkungnyü An

¹ Mosai Israel am peü chemi nyükei thaihütü jomphong kü eteke: “Oh Israel am, shinnyih ngei ammi danshi epü shahkungnyüthü bangtuh. Hathü nyingei yahtuh hatü dou leiyei düktuh.

² Shembüpa, jenei Kahvangi Sinai Kahshangei jen mü vangpüshuwpü lingteke.

³ Hapayü jenei bühipa am shing mon hapa vangpüshuwpü lingpü nevai shejao shinnyih thahshi yemmü nyupü jenphong peü shing lingpü khih.

⁴ Kahshangei Shembüpai aw kübü vamei amphong mü dhe dhe gongei eteke.

⁵ Hahepak kü amphong aw kü nyemei kahshangei ne-aongpü nangkü ngei, Shembüpa hi am aa kü yaongtü büpai mehe epa, ha ngei am kü eteke.” Shembüpai eteke:

⁶ “Ngeiyü amphong aa vaishi nyupü Ijip kahdok leipü müei leipü Shembüpa, ammei Kahvang.”

⁷ Ngei mü lenei ammi lebü kahvang te-ang.

⁸ Ammi am shingvaishi lajei vangsholei nyupükei, nevaijü kahdokei nyupükei, nevaijü yungmongei nyupükei mepayao teling.

⁹ Ammi hapa kü aümei tekhüm; mehenangkü ngeiyü Shembüpa, ammei Kahvang; ngeiyü mükhakpü Kahvang, ngei kü jiühitei bühipai mang thahpü nangkü jomei hühihathü kü denshem jem ali thahshi ngei hanghi shuohpeih,

¹⁰ shejao üami ngei kü bam, hatü ngei epü bangnya, jom kü denshem haja haja ngei bampü hunyüpeih.

¹¹ Ammi Shembüpa, ammei Kahvangei men angkü tenotei; mehenangkü Shembüpai büpalei men angkü noteipü kü hanghi shuohhen.

¹² Shembüpa, ammei Kahvangi am kü epükei Sabbath nyih daülangi tuhtuh.

¹³ Ammi nyih vok mongkü ammei dou peü düktuh,

¹⁴ shejao nyih nyetpabü-ü Shembüpa, ammei Kahvangei Sabbath nyih nyüke. Hapa nyih kü amphong nevaijü ammei hapeüthü, ammei aathü, nevaijü ammei yemhimakthü nevaijü am mü lakeiloiyei nyupüthüi dou nedükhen. Am keiha ammei aathüiyao hapa nyih nyiumeihen.

¹⁵ Amphongü Ijiplei aa vaihampeih, hatü Shembüpa, ammei Kahvangi büpalei laklu wong longpai am müei leipeih. Hanangkü Shembüpa, ammei Kahvangi hapa Sabbath nyih themhen enyüke.

¹⁶ Shembüpa, ammei Kahvangi am kü shuohpü kahdok kü yüluei nyuhen hatü am meishi nyuhen shingvaishi Shembüpa, ammei Kahvangi epükei anyü hatü ampa kü dhüm shuohtuh.

¹⁷ Amphongi tejü.

¹⁸ Amphongi mükbongjuyung tedük.

¹⁹ Amphongi tegüh.

²⁰ Shahshem denpü shuoh-ei laophülei chingyowpa tevüshih.

²¹ Ammi chingyowpalei nyüha kü mük tehüh. Amphongi chingyowpalei bükhishem, kahdok, büpalei aathü, büpalei mohoh, büpalei gaduthü nevaijü büpalei dou mehe kao mük tehüh.

²² Amphong kahshangei daishingkü aw, phum hatü shangmang kübü vamei Shembüpai amphong peü kü ngeüwong anei shuohpü shahkungnyüthü nyüke. Büpai lebü nevai-i ha shahkungthü shuohpeih, hatü büpai hathü yaongshung nyi kü nyangtü ngei kü yahphopeih.

Nanglakthü Nyempü

²³ Mechem amphongi shangmang kübü ngeü danpa, mechem kahshang kü aw bahpa, amphong mübüthü hatü jat kü shangjingthü ngei touei heih,

²⁴ hatü eteke, “Shembüpa, jenei Kahvangi jen kü büpalei müknyinshekhang hatü nganhilong huphüteke hatü jeni aw kübü büpalei ngeü danteke. Kahvangi shennyak kü shah elangmao hapa shennyak yemmü nyuaokhen khih shei shinnyih jeni nyingteke.”

²⁵ Shejao mehekei shaang jen dihenang? Hapa aw longpai jen hahtükhen khih, jeni shao Shembüpa, jenei Kahvangei ngeü danjema jen didaihen khih.

²⁶ Vanyangyem Kahvangi aw kübü vamei shah epü danpheikü yemmü amphong kei nyuphei je?

²⁷ Yopailei heihtuh hatü Shembüpa, jenei Kahvangi epü lemphü bangkütuh, hatü Shembüpa, jenei Kahvangi nüng kü mehe ephahenshang hamphong kü eshih. Hamphongi ha bangei dükhen hih.

²⁸ Mechem amphongi ngei mü eteipa, Shembüpai ha danei ngei kü büpai ephüteke, “Nanglakthüi mehe nüng kü epa, ha ngei dantepih. Jomphongi epü lemphü meiangke.

²⁹ Jomphong kü henüng thentoimongdang jükei ngei kü nyemei ngei epü bangphei küangü jom hatü jomei hapeüthü peü den kü meishi nyuhen.

³⁰ Leituh, jomphong kü ashakshemei leidaihen eyeishuoh.

³¹ Shejao ngei jomphong kü shuohhen kahdokei jomi dükhen shahkungnyüthü nüngi jom kü nyuhhen shingvaishi ngei nüng kü yahphahen danei chongkei.

³² Hanangkü Shembüpa, ammei Kahvangi am kü epü dükhen kenhingtuh. Büpalei shah nebangi melemeiyao teleplük.

³³ Amphong nyuhen shingvaishi shuohpü kahdokei yangnyu shoshoei daeisheyei yüluei nyuhen shingvaishi Shembüpa, ammei Kahvangi epü lem kü kamtuh.”