SHAHKÜP 4 - DAÜLANGPÜ LAIHING (BSI)

Mosai Israel am kü Ven Danhen Enyüke

¹ Mosai nanglakthü kü eteke, “Oh Israel am, ngei am kü nyuhpü shahkungnyüthü bangtuh. Am yemmü nyuhen hatü daiyei Shembüpa, ammei ambü ampa Kahvangi am kü shuohpü kahdok yah-aokhen shingvaishi hathü bangtuh.

² Ngei epü kü amphongi meheyao te-ü nevaijü haleipü meheyao teyaktük, shejao ngei am kü shuohpü Shembüpa, ammei Kahvangei shah bangtuh.

³ Baal Peor kü Shembüpai mehe dükpa amphongei müki lekei eeteke. Büpai Peor amei Baal kahvang kü khümpüthü peü jütük,

⁴ shejao am üami Shembüpa, ammei Kahvang kü hingshangi nyutepa, shinnyih thahshi yemmü nyüke.”

⁵ Ammi yahhen nyupü kahdokei dükhen shingvaishi Shembüpa, ngelei Kahvangi ephopükei ngei am kü shahkungnyüthü peü nyuhtepih.

⁶ Hathü kenhingei düktuh hatü lebü jatthüi amphongü longi nahpülangpü, nyingpühingpü jatli shei nyinghen hatü jomi, ha danei, “Hingmei, hapa longpü jatliyü nahpülangpü, nyingpühingpü jatli khih” shei ehen.

⁷ Jeni büpa kü nyükshingkü, Shembüpa, jenei Kahvang jen yopailei nyupükei lebü longpü jatthü yopailei mehe kahvang nyüpa?

⁸ Ngei shinnyih amphong kü shuohpü shahhing shahkung kei lebü longpü üam jatthülei hapa keipü shahkung hatü vanglemthü nyüpa?

⁹ Am kenhingtuh, hatü ammei müki lekei mehe eetepa, ha nebetükhen, nevaijü am yemmü nyupü thahshi ammei mongdang kübü hapa nemahtükhen kentuh. Ammei hühihathü kü ha nyuhtuh.

¹⁰ Büpai ngei kü Sinai Kahshangei, “Jom hapa kahdokei nyupü thahshi ngei kü dhüm shuohhen nyinghen hatü jomei hapeüthü kü hapa nyuhhen shingvaishi nanglakthüi ngei epü banghen thaihütuh” shei eshingkü amphong Shembüpa touei yaongpü deih-ei dangtuh.

¹¹ Vangsho thahshi aw bah-ei awshit vamei phumnyak kei jümpü hepak kü amphong kahshanglalei peiyei yaongteke.

¹² Hahepak kü Shembüpai am kü aw kübü vamei eteke. Amphongi shah epü ngeü mon danteke shejao büpa mekei nyu, büm ne-ee.

¹³ Ammi dükhen shingvaishi büpai vangpüshuwpü shahkungnyüthü an yaongshung nyi kü nyangtü am kü shuohteke.

¹⁴ Jordan yungdang homei ammi yahhen nyupü kahdokei dükhen shahkungnyüthü peü nyuhhen Shembüpai ngei kü ephopeih.

Mükbongjuyungpü Khüei Shahvüng

¹⁵ Aw kübü vamei Shembüpai am kü Sinai Kahshangei shah epü nyih amphongi büpalei büm ne-ee.

¹⁶ Hanangkü am shingvaishi baha nevaijü nyüha kei,

¹⁷ nevaijü kahdoknyü kübü yemhimak nevaijü ouhiyüh,

¹⁸ nevaijü yungmongei nyupü nyah aimü mehe lajei keiyao lingei khümpai ammi mang nethahhen shingvaishi lituh.

¹⁹ Hatü mechem ami phumshangei ngangei veihen, vanghe, lennyü hatü lithathü kü aümei khümhen mü amphong lemnyong kü temühü. Shembüpa, ammei Kahvangi lebü jatlithüi hathü kü khümhen shingvaishi shuohteke.

²⁰ Shejao amphongü shinnyih nyupükei büpalei mükjüp yahpü am vaihen shingvaishi bahpü awbhaong Ijip leipü Shembüpai müei leipeih.

²¹ Am nangkü Shembüpai ngei kü mongshih, hatü kahcheü kohpü kahdok, Shembüpa, ammei Kahvangi am kü shuohpü kahdokei ngei Jordan yung homei nedeishihpih shei eteke.

²² Ngeiyü hapa kahdokei didaihen; shejao amphongi yungdang homei hapa kahdok yahhen yopailei nyüke.

²³ Shembüpa, ammei Kahvangi am mü vangeishuwpü nebetükhen kentuh; Shembüpa, ammei Kahvangi nemongpü kü am nyingi lajei mepa keiyao teling.

²⁴ Mehenangkü Shembüpa, ammei Kahvangü laiyeilungei hahpü aw, hatü mükhühpü Kahvang.

²⁵ Ammi hapeü hüpeüthü büh-ei paüm-ei hapa kahdok kü luangi nyupheikü amphongi mang thahjema hatü lajei lemhük kei dangkao lingei Shembüpa tou kü nemeipü dükjema,

²⁶ ammi Jordan yungyen homei yahpü kahdok leipü amphong lomi mahdaihen shei shinnyih ngei kahdok vangsho kü am khüei denpü vaihen nyüknyüpeih. Amphong halei luangi nenyuhen shejao hingmei mü mahdaihen.

²⁷ Am maani mon tuhphongtü kemei lebü jatthü touei haitükhen.

²⁸ Halei amphong daiyei shennyaki lingpü yaong hi pü kahvang, neeeaokpü, nedanaokpü, nehah-aokpü kahvangthü kü khümhen.

²⁹ Shejao ammi halei Shembüpa, ammei Kahvang kü veijema, hatü ammei mong kempai büpa yemjema, ammi büpa danghen.

³⁰ Mechem am shangpong yakying kü nyuhen, hatü hathüi am kü dhaümhenshang, hahepak kü ammi Shembüpa, ammei Kahvang touei mong lepei leiyei büpalei shah banghen.

³¹ Mehenangkü Shembüpa, ammei Kahvangü phahjipü Kahvang nyüke; büpai am netuhphonghen nevaijü nemahtükhen, hatü büpai ammei bühipa mü vangtükpü nebetükhen.

³² Amphong mangbüh shekü peihdaipü nyihthü kü yemhümao, Kahvangi kahdoknyü kü hangkuli lingpü nyih kübü hapakei longpü lemhükao vamla nevaijü hapa keipü lemhük dangkao danla? Vangsho jung hük kübü jung hük dohpü thahshi yemei veihümao.

³³ Amphong kü kei, lebü üam nanglak kao kahvangi aw kü vamei shah eshuohpü danla?

³⁴ Shembüpa, ammei Kahvangi ammei müki eeshi Ijiplei am kü dükpü douthü kei dokei, yashanyalepü hatü thamapü douthü huei, cham peihüei, hokei, büpalei laklu wong longpai longpü hatü nyempühanpü dou dükphongtü laophü shingvaishi jat hük leipü jat hük yangei mülangpükei lebü üpa kahvangiyao hapakei dükla?

³⁵ Shembüpayü Kahvang; büpa kei lebü üpayao neshiü shei am kü nyinghühen shingvaishi Shembüpai am kü hapa hupeih.

³⁶ Büpai am kü nyuh-aokhen shingvaishi büpai vangsho leipü büpalei ngeü am kü danhü; hatü kahdoknyülei büpai aw kübü vamei epü büpalei shah danteke.

³⁷ Mehenangkü büpai ammei bühipa kü bampü nangkü, büpai amphong jeteke, hatü büpalei wong longpai büpai amphong Ijip leipü müei leiteke.

³⁸ Am daishingkü am mü longpü hatü wong kohpü jatthü changtük, hatü shinnyih am nyupü jomei kahdok am kü mükjüp vaishi shuohhen shingvaishi amphong müei leiteke.

³⁹ Kahdok hatü vangsho kü Shembüpayü Kahvang; büpa kei lebü neshiü shei shinnyih ammei mongkü nebetüki tuhtuh, hatü nyingtuh.

⁴⁰ Am hatü ammei hühihathü meishi nyuhen shingvaishi hatü Shembüpa, ammei Kahvangi den shing am kü shuohpü kahdok kü den luangi nyuhen shingvaishi shinnyih ngei am kü shuohpü shahkungthü bangei düktuh.

Shojo Ching

⁴¹ Hahepak kü Mosai Jordan yungyen heongphi kü shojo ching jem jeteke,

⁴² halei shennyak hanei-i büpa mü meheyao nedanteipü neshiüpü shennyak hük nenyingi jütükjema, büpa halei laongei daiyei nyuhen. Büpai hathü shojo ching hükei daiyei yanglem yemhen.

⁴³ Hathüyü shojo chingthü nyüke: Reuben jat shingvaishi jahpan kahjishong kübü Bezer, Gad jat shingvaishi Gilead kahmük kübü Ramoth hatü Manasseh jat shingvaishi Bashan kahmük kübü Kolan nyuteke.

Kahvangei Shahkungnyü Shahsha Appü

⁴⁴ Hapayü Mosai Israel am kü shuohpü Kahvangei shahkungnyü nyüke.

⁴⁵ Hapayü jomphong Ijip leipü vamei daipheikü Mosai jom kü shuohpü shahkungnyü nyüke,

⁴⁶ hatü Jordan heongphi Beth Peor yopai kübü kahji, Ijip leipü vamei daishingkü Mosa hatü Israel ami neütükpü Heshbonei vanglem lempü Amor am Sihon ongpalei kahdokei nyushi shuohpü shahkungnyü nyüke.

⁴⁷ Jomi büpalei kahdok hatü Bashan ongei kahdok, Jordan heongphi kü nyupü Amor am ongpa nyilei kahdok yahteke.

⁴⁸ Hapa kahdok kü Arnon yungnah leipü Aroer kübü Sirion Kahshang (hapayü Hermon),

⁴⁹ hatü Jordan yungyen heongphi kübü heshüphi Dipü Yungching thahshi hatü Pisgah Kahshangla thahshi nyuteke.