SHAHKÜP 34 - DAÜLANGPÜ LAIHING (BSI)

Mosa Dipü

¹ Hapheikü Mosai Moab kahji leipü Jeriko homei Nebo Kahshang Pisgah shangtao thahshi aongteke. Halei Shembüpai büpa kü kahdok kemei Gilead kübü Dan thahshi,

² Naphtali amei kahmük kemei; Ephraim hatü Manasseh amei kahmükthü kemei; Judah amei kahmük heshüphi Mediterranean Yungching thahshi;

³ Negeb hatü Jeriko kahji, palm pü nyupü chingnyü kübü Zoar thahshi hushuohteke.

⁴ Hahepak kü Shembüpai büpa kü, “Hapayü ngei Abraham, Isak hatü Jakob hathü kü ngei ammei hühihathü kü shuohhen shei lahpü kahdok nyüke. Ngei nüng kü ha huphünyeih, shejao nüng halei nepeiaokhen” shei eshuohteke.

⁵ Hanangkü Shembüpai epükei Shembüpa chongphobü Mosa Moab kahdokei didai.

⁶ Shembüpai büpa Moab kahdok Beth-Peor mü khangpü kahjilei vüteke, shejao shinnyih thahshi üpaiyao büpalei mahngchong metouei nyu, nenyingnyu.

⁷ Mosa dishingkü büpalei nyübüh vangbong kho hük mü kukha shiüteke, shejao büpalei mük hatü büm meishi nyuteke.

⁸ Moab kahjilei Israel ami theppüyoungpü nyih mangpeih thahshi Mosa kü nyih hapüan thahshi mahng thepteke.

⁹ Shaang, Nunei cheha Joshuayü kihikon, laanghai maei nyu; mehenangkü Mosai büpa kü jeihen laki shüngei je. Hanangkü Shembüpai Mosa kü mehe etepa, ha Israel ami bangei dükteke.

¹⁰ Israel kü Mosa kei thibü üpayao nevamangpih; Shembüpai büpa mü dhe dhe gongei eteihampeih.

¹¹ Shembüpai Mosa shomei Ijip ongpa, büpalei lakchongbüthü, hatü kahmük kempü kü yashanyalepü hatü thamapü dou dükpükei lebü thibü üpayao nedükangpih.

¹² Mehenangkü Israel am touei Mosai dükpü keiha üpaiyao nganhilong hatü nyempühanpü dou nedükangpih.