SHAHKÜP 30 - DAÜLANGPÜ LAIHING (BSI)

Moihiman Nevaijü Thaüvaü Jehen Epü

¹ Shaang ngei am kü moihiman hük nevaijü thaüvaü hük jehen shuohnyüpeih. Mechem hathü douthü kemei am kü vamkahen hatü Shembüpa, ammei Kahvangi mih jatthü touei am haitüktü am jom mü nyuhenshangkü, ngei am kü jehen shuohpü deih-ei dangtuh.

² Hatü ngei shinnyih am kü epükei mechem am hatü ammei hühihathüi Shembüpa, ammei Kahvang touei nyokei leihen hatü ammei mongdang kempai, laangha kempai büpalei shah banghenshang,

³ Shembüpa, ammei Kahvangi am kü phahjiei deihhen hatü jatthü touei haitükpü amphong thaiyei leihen hatü am dahüshehühen.

⁴ Amphong vangsho phangkü tailu kahdokei changtüklangmao, haleipao Shembüpa, ammei Kahvangi thailanghen hatü müei leilanghen.

⁵ Büpai amphong ambü ampa amei kahdokei müei leihen hatü ammi hapa kahdok yahhen. Büpai amphong ambü ampa mao nyeinya dahüshehühen hatü nanglak longi dahühen.

⁶ Ammei mongdang kempai hatü ammei laangha kempai, amphongi büpa kü bamhen hatü kahdok kü yüluei nyuhen shingvaishi Shembüpa, ammei Kahvangi am hatü ammei hühihathü kü ven danpü dhentoimongdang yahphahen.

⁷ Shembüpa, ammei Kahvangi am kü jiühitpü hatü shüveipü vepathü kü thaüvaü kemei shuohhen.

⁸ Amphongi shao Shembüpalei ven danhen hatü shinnyih ngei am kü shuohpü büpalei shahkungthü noteihen.

⁹ Shembüpa, ammei Kahvangi ammei lakdou lemphü kü dahüshehühen, ammi hapeü longi bühhen, yemhimak longi anghen hatü ammei kah kü hahying longi vamhen. Shembüpai ammei bühipa kü dahüshehühen mongpü kei büpai amphong dahüshehühen mongonghen.

¹⁰ Shejao ammi shahkung lai kü nyangei nyupükei Shembüpalei shah banghen, hatü ammei mongdang kempai hatü laangha kempai Shembüpa, ammei Kahvang touei nyokei leihen vongbong.

¹¹ Shinnyih ngei am kü shuohpü shahkungthüyü longi wongpü nevaijü ammi nedükaokshampü nevai.

¹² “Hami hapa danei ven banghen shingvaishi hapa yahkününg üpa vangsholei aonghenang?” shei ammi phehen mü hapayü vangsholei nenyu.

¹³ Nevaijü, “Hami hapa danei ven banghen shingvaishi hapa leikününg üpa yungching homei daihenang?” shei ammi phehen mü hapayü yungching dangei neshiü.

¹⁴ Hapakei nevai, hapayü ammi banghen shingvaishi am mü hakei-üng ammei ju, hatü ammei mongdangei nyüke.

¹⁵ Veituh, shinnyih ngei ammi jehen shingvaishi ten nevaijü mei, hatü yangnyuyem nevaijü dipü tuhphünyeih.

¹⁶ Mehenangkü ngei shinnyih am kü Shembüpa, ammei Kahvang kü bamhen, büpalei lemthü kü kamhen, hatü büpalei shahkungthü hatü vanglemthü noteihen shuohnyüpeih; shejüang am yangnyu nyuhen hatü dahenshehen, hatü Shembüpa, ammei Kahvangi ammi yahhen nyupü kahdokei am kü moihimanphahen.

¹⁷ Shejao ammei mong lepei lüdaitü ven nedanjema, hatü lebü kahvangthü kü khümhen nyokei lüdaijema,

¹⁸ am hingmei mü mahhen shei shinnyih ngei am kü baongnyüpeih. Ammi Jordan yung homei yahhen nyupü kahdokei den luei nenyuhen.

¹⁹ Shinnyih ngei vangsho hatü kahdok kü am nangkü denpü vaihen nyüknyeih; ngei am touei yangnyuyem hatü dipü, moihiman hatü thaüvaü tuhphünyeih. Am hatü ammei hapeüthü yemmü nyuhen shingvaishi yangnyuyem jetuh,

²⁰ hatü ammi Shembüpa, ammei Kahvang kü bamtuh, büpalei shah bangtuh hatü büpa kü wongshongi shoungtuh. Mehenangkü Shembüpayü ammei yangnyu nyüke, hatü büpai ammei bühipa Abraham, Isak hatü Jakob kü shuohhen shei lahpü kahdokei vangbong longi nyuhen.