SHAHKÜP 3 - DAÜLANGPÜ LAIHING (BSI)

Israel ami Og Ongpa Neüpü

¹ Hapheikü jen Bashan kahdok lemei aong, hatü Bashan amei Og ongpai büpalei veshanthü kemei müei Edreilei jen mü hokhen peiteke.

² Shejao Shembüpai ngei kü, “Büpa kü tenyem; mehenangkü ngei büpa hatü büpalei veshanthü kemei hatü büpalei kahdok nüngei lak kü shuohtepih. Heshbonei vanglem lempü Amor am Sihon ongpa kü lingpükei büpa kao lingeishuoh” shei eteke.

³ Hanangkü Shembüpa, jenei Kahvangi Bashan amei Og ongpa hatü büpalei veshanthü kemei jenei lak kü shuohteke. Hükao aoei netuh-i jeni jom jütükkem.

⁴ Hahepak kü hükao ne-aophongi jomei jilathü kemei hahtükteke. Bashan kü Og ongpalei ongching Argob kahdok jilathü pejem thahshi hahtük.

⁵ Ha jilathü kemei pe longi shaoshi showtük hatü penyüsha lingei nyiam yah-ei shalat lingtüktü nyuteke; ha mü chemi penyü neshowpü jilathüao longi nyuteke.

⁶ Heshbon ongpa Sihon kü dükshuohpükei jeni jomei jilathü mangtük, hatü baha, nyüha hatü hashih naüha kemei jütük.

⁷ Shejao yemhimak kemei hatü jila kübü dounyünangba kemei shetei leiteke.

⁸ Hanangkü ha shan mü jeni Amor am ongpa nyi leipü Jordan heongphi, Arnon yungyen kübü Hermon Kahshang thahshi yahteke.

⁹ (Hermon Kahshang kü Sidon ami Sirion shei nyükteke, Amor ami Sinir shei nyükteke.)

¹⁰ Bashan am Og ongpalei kahdok kemei Gilead hatü Bashan kübü kahmükthü, Selekah hatü Edrei thahshi kahjishong kübü chingthü peü jeni yahteke.

¹¹ Rephaim am khongkü Og ongpayü peü mü shoumpü shiüteke. Büpalei mahngshungü yangkü meter ali, ba kü meter nyi shei nyiami lingpü nyuteke. Hapayü shaang thahshi Ammon amei ching Rabbahlei nyüpeih.

Heongphi Jordan kü Uopü Jatthü

¹² Jeni hahepak kü yahpü kahdokü Reuben hatü Gad jat nyi kü Arnon yungyen yopai kübü Aroer hatü phaüshang kahdok Gilead hatü haleipü jilathü omei hükkei bhaoei shuohpeih.

¹³ Aopü Gilead kahdok hatü Og ongpalei ongching Bashan kahdok ngei bhaosheipü Manasseh phang kü shuohpeih. (Bashan kü Argob kahmükü Rephaim amei kahdok shei ehampeih.)

¹⁴ Manassehlei hapeü Jair-i Argob kahmük kemei Geshur hatü Maakah viong thahshi yahteke. Hathü chingthü kü büpalei men menteke hatü shaang thahshi hathüyü Jair chingthü shei nyüknyeih.

¹⁵ Ngei Manasseh jat Makir phang kü Gilead shuoh.

¹⁶ Shejao Reuben hatü Gad phang nyi kü ngei Gilead kübü Arnon yungyen thahshi shuohpeih. Yungyen jiam thahshi jom pehephi viong, hatü apshaphi kü Jabbok yungyenü Ammon am mü viong nyuteke.

¹⁷ Jomei viong heshüphi kü Jordan yungyen thahshi pehephi kü Galil yungching kübü shadaipü apshaphi kü Dipü Yungching ngoishi hatü heongphi kü Pisgah Kahshangla thahshi nyuhen.

¹⁸ Hahepak kü ngei amphong kü hapakei epeih, “Shembüpa, ammei Kahvangi amphong kü hapa kahdok shuohteke. Shejao hokaokhen shennyakthü kemei hokhen shingvaishi Jordan yung homei ammei jeihinaüthü Israel am shekü daituh.

¹⁹ Ammei nyühihathü hatü yemhimakthü kemei (ammei yemhimakthü longi nyüke shei ngei nyingnyüke) ngei am kü shuohpü jilathülei nyuhenaok.

²⁰ Shembüpai amphong kü hamü dükpü keiha Shembüpai jom kü Jordan heshüphi kü shuohpü kahdok mangyah thahshi hatü jom halei chingmei kü manguo thahshi amphongi ammei jeihinaüthü Israel am kü sheühtuh. Hapheikü mon ngei am kü shuohpü kahdokei nyokei leihen.”

²¹ Hahepak kü ngei Joshua kü, “Sihon hi Og ongpa nyi kü Shembüpa, ammei Kahvangi dükshuohpü lemphüli nüngei müki lekei eeteke. Ammi homei daihen ongchingthü peü kü Shembüpai aihük mü dükhen.

²² Ammi jom kü tenyem; mehenangkü Shembüpa, ammei Kahvangi am khüambakei hokkahen” shei eteke.

Mosai Pisgah Leipü Kanan kü Veinyüke

²³ Hahepak kü ngei Shembüpa kü,

²⁴ “Oh Jeiyong Shembüpa, nüngi nüngei chongphobü kü laklu wong longpü huhen chongpangteke. Nüngi dükpükei yashanyale dou dükaokhen mü kahdok hatü vangsho kü lebü kahvang neshiü!

²⁵ Shembüpa, ngei Jordan yungyen homei heih-ei kahcheü kohpü kahdok, nethe meipü phaüshang kahmük hatü Lebanon kü veishah” shei eteke.

²⁶ Shejao amphong nangkü Shembüpai ngei kü mongshihpeih, hatü ngei epü kü nebangpha. Shembüpai ngei kü, “Hajük-üng, sheyü hapa jung shei ngei kü te-epha” shei ephüteke.

²⁷ Pisgah shangchingei aongei heong, heshü, apsha, pehe peü philei veituh. Nüng Jordan yung homei nedaiaokhen vaipü nangkü hapa kahdok kü nüngi müklai luei veituh.

²⁸ Shejao Joshua kü kangpü dousho koeishuoh; büpa kü mongnang thongeishuoh, hatü wong kohhütuh; mehenangkü büpai hapa nanglakthü yung homei müei daihen, hatü nüngi eepü kahdok mükjüp yahhühen.

²⁹ Hanangkü hamphongi Beth-Peor yopailei kahjilei nyuteke.