SHAHKÜP 29 - DAÜLANGPÜ LAIHING (BSI)

Moab Kahdokei Shembüpa i Vangpüshuwpü Lingei Leipü

¹ Hathüyü Shembüpai Israel am mü Sinai Kahshangei lingpü vangpüshuwpü mü üei Moab kahdokei Shembüpai Israel am mü vangpüshuwpü linghen Mosa kü eshuohpü laphen nyüke.

² Mosai Israel am peü nyükei jom kü eteke: “Shembüpai Ijiplei Pharaoh ongpa, büpalei lakchongbüthü hatü büpalei kahdok kü mehe dükshuohpa ha peü ammei müki eeteke.

³ Shembüpai nyembenüng cham, yashanyale hatü thamapü dou longi dükshuohpü ammei müki eeteke.

⁴ Shejao shinnyih thahshi Shembüpai am kü danaokhen mongdang, eehen mük hatü danhen dhaong mangshuoh.

⁵ Bong pinyi thahshi Shembüpai am jahpanei müteke, shejao ammei ashakviha, hatü lathuh chang neleidai.

⁶ Ammi hahhen hahying, yinghen yiü, nevaijü nükyiü nenyu, shejao ngeiyü Shembüpa, ammei Kahvang shei am kü nyinghühen shingvaishi ammi napü lemphü shuohpeih.

⁷ Mechem am hapa shing ngoipa, Heshbon amei ongpa Sihon hatü Bashan amei ongpa Og nyi-i jen khüei hokhen vam, shejao jeni neüteke.

⁸ Jeni jomei kahdok yah-ei Reuben, Gad hatü bhaosheipü Manasseh phang nyi kü mükjüp vaishi shuohteke.

⁹ Ammi dükpü lemphü kü aokpü danghen shingvaishi hapa vangpüshuwpü mong shuoh-ei düktuh.”

¹⁰ Shinnyih Shembüpa, ammei Kahvang touei am mübüthü, lakchongbüthü, behethü, bahathü,

¹¹ nyühathü, hashihthü, hatü am mü püyahyungshoei lakeiloiyei nyupüthü am peü hammü nyüke.

¹² Shinnyih am hatouei Shembüpa, ammei Kahvangi am mü lingpü vangpüshuwpü kü shühen hatü vangeishuwhen shingvaishi,

¹³ ammei ambü ampa Abraham, Isak, hatü Jakob hathü kü lahpükei amphong büpalei nanglak hatü büpa ammei Kahvang vaihen shinnyih shahchong sheihen shingvaishi am yaongshi nyüke.

¹⁴ Shembüpai hapa vangpüshuwpü lingpeyü shinnyih hamü yaongpü amphong mü mon nevai,

¹⁵ shejao hamü yaongshi nyupü hatü kahmong nyemhayao omshi nyüke.

¹⁶ Ijiplei jen mekei nyuhampa, hatü lebü jatthülei kahmük homei daipü mekei chongküpa ha am nyingi nyingei nyüke.

¹⁷ Ammi jomei jiühitbenüng lajeithü pü hatü yaong, hon hatü ngin yah-ei lingpü eeteke.

¹⁸ Shinnyih hamü yaongshi nyupü baha, nyüha, shemongsha nevaijü jathili üpaiyao Shembüpa, jenei Kahvang toueipü nelepdaihen hatü ha jatthülei kahvangthü kü nekhümhen kentuh. Hapayü shahyakpü pü tünglang hatü leü nemeipü pü kei nyukahen.

¹⁹ Shinnyih hamü omei nyupü üpaiyao hapa lappü dantüktü laophülei mong vaanei, ngei mongpü lem kü longteijao meihen shei tedeih. Hapai am nemeipü hatü meipü peü aihük mü lomohhen.

²⁰ Hapa keipü shennyak khüei nyukahen. Hapa laitap kü nyangei nyupü thaüvaü kemei büpa kü hethen, hatü vangsho phang kübü büpalei men thittükhen.

²¹ Shembüpai hapa vangpüshuwpü shahkung laitap kü nyangei nyupü thaüvaüthüi ha shennyak shangponghühen shingvaishi Israel am jatthü khong kübü loukei ngaihen.

²² Ngoikahen ammei pheiha deni hatü tailu leipü kung shennyakthüi hapa kahdok kü Shembüpai hapa keipü shangpong yakying hatü lomoh-aühaü shuohpü je shei veihen.

²³ Kahdok bahiyang kemei kü hüm hatü awkaong meli kü kei aw bah-ei kong leidaihen; meheyao nesheiaokhen; meheyao nekohkahen. Hapayü Shembüpai mongshih-ei Sodom hatü Gomorrah, Admah hatü Zeboiim mahtükpükei nyukahen.

²⁴ Mih jatthü peüi, “Mehekei Shembüpai hapa kahdok kü hapakei dükshuohpa? Mehe tata kü hapakei mongshihpa yo?” shei pheteihen,

²⁵ hatü hapa kü jangpeyü, “Hapayü Shembüpa, jomei chebü chepalei Kahvangi jom Ijip leipü müei daipü hepak kü jom mü vangpüshuwpü mangtükpü nangkü,

²⁶ hatü jomi shelei nekhümpü lebü kahvangthü; Shembüpai jom kü tekhüm shei eshuohpü kahvangthü kü khümpü nangkü ponghahnyu khih.

²⁷ Hanangkü hapa laitap kü nyangei nyupü thaüvaüthü koei peihühen shingvaishi Shembüpa mongshih vampü khih.

²⁸ Shembüpa longi mongshihteke, hatü büpa mongshihpai jom jomei kahdok leipü bhiyei lebü kung kahdokei haitükteke hatü halei jom shinnyih thahshi nyüke” shei eteihen.

²⁹ Doujo kemei Shembüpa, jenei Kahvangei, shejao shakei vampü douthü kemei jen hatü jenei hühihathü den kü dükhen shahkungnyü nyüke.