SHAHKÜP 27 - DAÜLANGPÜ LAIHING (BSI)

Yaongshung kü Kahvangei Shahkung Nyangpü

¹ Hahepak kü Mosa hatü Israel am mübüthüi nanglakthü kü eteke: “Shinnyih ngei am kü shuohpü shahkungnyüthü peü bangtuh.

² Mechem am Jordan yungdang homei Shembüpa, ammei Kahvangi am kü shuohpü kahdokei shühenshang, yaong longpü hük haongtuh hatü ha meishi jintuh.

³ Shembüpa, ammei bühipa Kahvangi am kü lahpükei mechem Jordan homei Shembüpa, ammei Kahvangi am kü shuohpü amma hatü nyahjiü yenpü kahdokei shühenshang, shahkungthü peü hapa kü nyangtuh,

⁴ hatü mechem amphong Jordan homhenshang ngei shinnyih am kü epükei hathü yaongthü Ebal Kahshangei haongtuh hatü meishi jintüktuh.

⁵ Hatouei yaong yah-ei Shembüpa, ammei Kahvang kü moidü hük lingtuh; hathü kü amphongi nyiam meheyao teshih.

⁶ Shembüpa, ammei Kahvang kü kahmong yaong nebhaoktüki shoei moidü lingtuh hatü halei Shembüpa, ammei Kahvang kü jakpü moila shuohtuh.

⁷ Halei mongjempü moila shuohtuh hatü Shembüpa, ammei Kahvang touei am hahyingei mongongtuh,

⁸ hatü amphongi haongpü yaongthü kü hapa Kahvangei shahkungthü peü meishi lekei nyangtuh.”

⁹ Hahepak kü Mosa hi Levi am ngongpathüi Israel nanglakthü peü kü, “Nentuh, Oh Israel am hatü bangtuh! Shaang amphongü Shembüpa ammei Kahvangei nanglak leiteke.

¹⁰ Shembüpa, ammei Kahvangei ven bangtuh hatü shinnyih ngei am kü shuohpü büpalei shahkungthü noteituh” shei eteke.

Ven Nedanpü kü Thaüvaü

¹¹ Ha nyih-üng Mosai nanglakthü kü eteke:

¹² Mechem amphong Jordan yung homhenshang, hathü jatthüi Gerizim Kahshangei yaongtü nanglakthü kü moi nyükhen; Simeon, Levi, Judah, Issakhar, Joseph hatü Benjamin,

¹³ hatü hathü jatthüi Ebal Kahshangei yaongtü thaüvaü lenhen: Reuben, Gad, Asher, Zebulun, Dan hatü Naphtali,

¹⁴ Levi ami nanglakthü peü kü ngeüwong anei hapa ehen:

¹⁵ Üpai shennyakei laki yaong hi pü yah-ei Shembüpai jiühitpü yaongnaüya lingei joei ha kü khümnya, hapa shennyak kü thaüvaü hettuh. Hahepak kü nanglak peüi, “Amen” shei ehen.

¹⁶ “Nyühipa kü dhüm neshuohpü shennyak kü thaüvaü hettuh”. Hahepak kü nanglak peüi, “Amen!” shei ehen.

¹⁷ “Chingyowpalei viong yaong chaiteipü shennyak kü thaüvaü hettuh” Hahepak kü nanglak peüi, “Amen!” shei ehen.

¹⁸ “Mükphüngpa lemnyong kü müpü shennyak kü thaüvaü hettuh”. Hahepak kü nanglak peüi, “Amen!” shei ehen.

¹⁹ “Üami benha kü, hashihha kü, hatü vaümnyü kü shahhing nenonya, hapa shennyak kü thaüvaü hettuh.” Hahepak kü nanglak peüi, “Amen!” shei ehen.

²⁰ “Laophülei palei nyüha mü mükbongjuyung dükei üpai laophülei pa veühühenshang, hapa shennyak kü thaüvaü hettuh”. Hahepak kü nanglak peüi, “Amen!” shei ehen.

²¹ “Yemhimak mü jemteiyei mükbongjuyungpü shennyak kü thaüvaü hettuh” Hahepak kü nanglak peüi, “Amen!” shei ehen.

²² “Laophülei nyahinaü mü, pa hük nevaijü nyü hük ha nyahinaü mü mükbongjuyungpü shennyak kü thaüvaü hettuh.” Hahepak kü nanglak peüi, “Amen!” shei ehen.

²³ “Laophülei nyühalei nyü mü mükbongjuyungpü shennyak kü thaüvaü hettuh.” Hahepak kü nanglak peüi, “Amen!” shei ehen.

²⁴ “Laophülei chingyowpa joei jütükpü shennyak kü thaüvaü hettuh.” Hahepak kü nanglak peüi, “Amen!” shei ehen.

²⁵ “Mang neshiüpü shennyak jühen shingvaishi yawhdou yahpü shennyak kü thaüvaü hettuh.” Hahepak kü nanglak peüi, “Amen!” shei ehen.

²⁶ “Kahvangei shahkungthü nebangpü shennyak kü thaüvaü hettuh.” Hahepak kü nanglak peüi, “Amen!” shei ehen.