SHAHKÜP 24 - DAÜLANGPÜ LAIHING (BSI)

Yanpü hatü Leiyei Thaipü

¹ Baha hüki nyüha hük mü shem yemei nyutü büpai nelümhen mü pinnyü kü nemeipü deiaei nyupü nangkü yanhen lai nyangei pinnyü kü shuohtü shem leipü deitükjema,

² hatü pinnyü yanei leipheikü lebü baha hük mü shem yemei nyujü,

³ shao nyipabü chepahai pinnyü nelümpü nangkü yanhen lai nyangei shuohtü pinnyü shem leipü deitük nevaijü pinnyülei nyipabü baha didaijema,

⁴ shongpü bahai shao pinnyü yahhen neaok; mehenangkü pinnyü-ü nedaüpü leidaiteke. Hapayü Shembüpa touei jiühitbenüng. Shembüpa, ammei Kahvangi am kü mükjüp shuohpü kahdokei henüng keipü mang tevamhü.

Ashüanyong Shahkungthü

⁵ Shemshü pa hüki veshan dousho kü shüei vehok kü nedaihen, nevaijü lebü doulem nedükhen. Mehenangkü büpai vangbong hük shemei nyuei büpalei shembünyü mongonghühen vongbong.

⁶ Ammi bheishe hang nangkü yaong shemshak, hakei-üng ngümteipü dokpa yaong dangkao teyah; mehenangkü hapayü hangkulei shünyüshong vetlangpü kei nyüke.

⁷ Shennyak hüki jempü Israel shennyak hük yepei daiyei aa kü kei noteijema hatü yutükjema, shennyak yeppü shennyakü jütükhen vongbong. Am toueipü henüng mang daütükhen vongbong.

⁸ Mechem am kü nemeipü ngomdin vamkahenshang, Levi am ngongpathüi epü jiüshi dükhen kentuh. Ngei jom kü eshuohpükei jiüshi düktuh.

⁹ Am Ijip leipü vamei daiyangkü Shembüpa, ammei Kahvangi Mariam kü mehe dükshuohpa, ha deih-ei dangtuh.

¹⁰ Mechem ammi küphü hanei kü lemhük lushuohhenshang, hapa bheishe hang shingvaishi chüngpü dou yahhen jomei shemei teshü.

¹¹ Chingshelei yaongshi dantuh, hatü büpai ngaiyei nyemyahpha.

¹² Büpayü taopü shennyak vaijema, hapa dou ya baümei tetuh.

¹³ Büpai yanüng ha kü shihen shingvaishi om dhüküjü yah-ei leiyeishuoh. Büpai am kü mongonghen, hatü hapa kü Shembüpa, ammei Kahvangi am kü mongonghen.

¹⁴ Am mü jempü Israel am nevaijü am mü lakeiloiyei nyupü taopa nang shaküpü kü lueilemei teling.

¹⁵ Nyihjeih vanghe mangshü shekü nanglat shuohtüktuh; mehenangkü büpai hapa bhei itnyüke. Hei nevaijema büpai am khüei Shembüpa kü lenhen hatü am mang thahhen.

¹⁶ Hapeüthüi ten dükpü nangkü nyühipa nejühen, nevaijü nyühipalei mang nangkü hapeüthü nemahtükhen; shennyak hük laophülei mang nangkü mon mahhen.

¹⁷ Yenpa-oupa nevaijü hashihhathü kü jiüpü hean ammi aetei teyah, nevaijü bheishe hang nangkü vaümnyülei ashak chüngei teyah.

¹⁸ Amü Ijiplei aa vaihampeih hatü Shembüpa, ammei Kahvangi am bümei leihüpeih shei deih-ei dangtuh; hanangkü ngei hapa shahkung ammi dükhen shuohnyüpeih.

¹⁹ Mechem ammi hah vetei daihenshang, hahbhaong hanei nesheti tuhphongjema, hapa yahhen nyokei telei. Shembüpa, ammei Kahvangi ammi dükpü lemphüli kü moihimanphahen shingvaishi benhayaha, hashihhathü hatü vaümnyüthüi nyemyahhahnüng tuhphongtuh.

²⁰ Mechem ammi olive betjük vaümhenshang, pükaolei aodaipü shao nyipabü shingeimüngei tevaüm; hathüyü benhayaha, hashihhathü hatü vaümnyüthü shing nyüke.

²¹ Mechem ammi nyalingngupai vaümhenshang, aoei nyupü shao nyipabü shingeimüngei tevaüm; hathüyü benhayaha, hashihhathü hatü vaümnyüthü shing nyüke.

²² Ijiplei aa vaihampeih shei nebetüki deihtuh. Hanangkü ngei hapa shahkung ammi dükhen shuohnyüpeih.