SHAHKÜP 21 - DAÜLANGPÜ LAIHING (BSI)

Lakbü Mahngbü Nenyingpü Shennyak Mahng

¹ Shembüpa, ammei Kahvangi am kü mükjüp vaishi shuohpü kahdok kü shennyak hük jüpü mahng dangjema hatü üpai jüpa nenyingjema,

² ammei mübüthü hatü shahphenbüthü peiyei hapa mahng kü shonpü jilathü aa kü meshük taiteipa shetei veihen,

³ hatü hapa shennyak mahng kü peü mü yopü jila kübü mübüthüi chemao dou mangdükpü mohoh cheha hük,

⁴ yungyen nyupü hatü chemao kah manglingpü hatü chemao sheili mangsheipü kahji hükei müei daiyei hapa mohoh chehalei üng kü vethen.

⁵ Shembüpa, ammei Kahvangi büpa chongphohen Levi am ngongpathü jepü nangkü jom sheshalei heih-ei Shembüpalei men kü moihiman yühen, hatü nedanteipü lemphüli jomphongi shahphenhen.

⁶ Hapheikü shennyak mahng kü yopaipü jila kübü mübüthü peüi hapa mohoh shangkü lak hühhen,

⁷ hatü “Hamei laki hapa iy neyenhüangpih, nevaijü üpai hapa shennyak jüpa, hami nenyingangpih.

⁸ Oh Shembüpa, nüngi yangpü nüngei nanglak Israel amei mang tükshih, hatü hapa shennyak sho mahpülei iy ham kü tehetpha” shei ehen.

⁹ Amphongi Shembüpai mehe epa, ha dükpü nangkü hapa iy yenpü mang am shak kü nenyuhen.

Vehok kü Yeppü Nyüha Hük Nang

¹⁰ Mechem am vehok kü daiyei Shembüpa, ammei Kahvangi am kü aokpü danghühen hatü shennyakthü yepei leihen,

¹¹ ammi yepei leipü khongkü nela meipü ammi lümpü eejema, ammi yahhen aok.

¹² Ammi pinnyü shemei leituh hatü sho chaei kuptüktuh hatü lakdhen ladhen japtüktuh,

¹³ hatü pinnyülei ashakviha jeitüktuh. Pinnyü ammei shemei nyuhen hatü len hük nyühipalei mahng thephen; hapheikü ammi pinnyü mü shem yemhen.

¹⁴ Pheilei ammi pinnyü kü mong nehahjema, pinnyüi mongpülei deishihtuh. Ammi pinnyü mü jemteitükphei vütei-i ammi pinnyü aa kü kei nenohen hatü yutükhen neaok.

Hashongpalei Mükjüp

¹⁵ Shennyak hükei nyüha nyi nyujü büpai hük kü bam, hük kü nebam hatü nyüha nyipheni bahanaü mon ang, shejao hashongpayü büpai nebampü nyühai angpü,

¹⁶ mechem büpai laophülei mophimo hapeüthü kü hanhenshang, büpai bampü nyühalei ha kü jeilongpa hean neshuohhen.

¹⁷ Büpai nebampü nyühalei ha vaijao büpai angpü mophimo kübü phaihan shingnyi shuohhen vongbong. Shennyak hüki laophülei hashongpa nyinghen vongbong hatü vanglem kü nyupükei büpa kü jeilongpa hean shuohhen vongbong.

Ven Nedanpü Hapeü Nang

¹⁸ Shennyak hükei mong vaanpü hatü nyühipai nyuhjao jomphongei shah nebangpü, nyühipa mü khüei yaongpü hapeü nyujema,

¹⁹ chenyü chepai büpa yepei jomei jila kübü penyüsha touei mübüthü touei müei deihen, hatü dokhühen.

²⁰ Jijinyi-i mübüthü kü, “Hamei hapeü-ü mong vaanshi, hatü khüei yaongnyüke. Büpai hami epü kü nebangkünyu. Büpayü mop damteipü hatü yiüi chokteipü shennyak khih” shei ehen.

²¹ Hahepak kü jomei jila kübü shennyakthüi büpa yaongi shükei jütükhen, hatü hapakei am khong kübü mang daütükhen. Israel am peüi hapa danei nyemhen.

Shahkung Lem Loulou

²² Shennyak hüki longi pungpü nangkü jütükjema hatü büpalei büm shejema,

²³ amphongi hapa mahng vangnyak kemei pülei sheüshi tetuhphong. Büpa ha nyih-üng vütüktuh; mehenangkü üpa pü kü sheünya, büpa Kahvangei thaüvaü phangkü nyüke. Shembüpa, ammei Kahvangi am kü mükjüp shuohpü kahdok nyeteinyangei tetuh.