SHAHKÜP 20 - DAÜLANGPÜ LAIHING (BSI)

Vehok Nangkü Shahkung

¹ Mechem amphongi ammei vepathü mü hoknüng daihen hatü koyei, koyei kharithü hatü veshanthü am mü nyeishi eehenshang, ammi jom kü tenyem; mehenangkü Ijip leipü am müei leipü Shembüpa, ammei Kahvang am mü nyukahen.

² Amphong vehok kü layaong shekü ngongpa hük am shekü peiyei veshanthü kü hapakei ehen,

³ “Oh Israel am, bangtuh, shinnyih amphongi ammei vepathü mü hokhen layaongnyüke. Amphong mong temaan nevaijü tenyem, tehan nevaijü mong tesho.

⁴ Mehenangkü am aokpü danghühen shingvaishi Shembüpa, ammei Kahvang amphong mü daikahen hatü ammei vepathü khüei hokhen.”

⁵ Hahepak kü veshan lakchongbüthüi veshanthü kü, “Amphong hamei shemja vetü mangdaüi nyüpü je? Hakei vaijema büpa nyokei leidaituh. Hei nevaijema büpa vehok kü mahdaihen hatü hapa shem mih hanei ami daülanghen.

⁶ Amphong hanei-i nyalingngupai sheitü haleipü betjük mangvaümhahpü nyüpü je? Hapakei vaijema büpa shemei nyokei leidaituh. Hei nevaijema büpa vehokei mahdaihen hatü lebü hanei ami hapa betjük vaümlanghen.

⁷ Amphong hanei-i doi phetü shem mangyemi nyüpü je? Büpa shemei nyokei leidaituh, hei nevaijema büpa vehokei mahdaihen hatü lebü baha hanei ami pinnyü mü shem yemdaihen.

⁸ Hatü veshan lakchongbüthüi hayao ehen, ‘Amphong hanei-i nyemei nevaijü mong hanei nyüpü je? Büpalei jeihinaüthü mong netükhen shingvaishi büpa mü shemei nyokei leidaituh’ ” shei ehen.

⁹ Mechem veshan lakchongbüthüi shah eyei kemhen, jomphongi khong ieyei shing mübüthü jehen.

¹⁰ Mechem amphongi chingnyü hük hahnüng daihenshang, haleipü nanglakthü kü chingmei kü shakei vamhen hepak shuohtuh.

¹¹ Jomi jomei penyüsha apei am touei shakei vamdaijema, jom ammei aa leihen, hatü am shingvaishi lemphü douwong dükhen.

¹² Jomi am touei chingmei kü shakei nevami hokhen yaongküjema, hapa chingnyü shümei yahtuh.

¹³ Mechem Shembüpa, ammei Kahvangi ammei lak kü jom lanei yahphahenshang, haleipü bahathü peü jütüktuh.

¹⁴ Shejao hapa chingnyü leipü nyühathü, hashihthü, yemhimakthü hatü lemphü douhinang am shingvaishi shetei leituh, hatü Shembüpa, ammei Kahvangi vepathülei lak kübü am kü yahphopü lemphü ami noteihen.

¹⁵ (Yopailei nyupü jatthülei chingnyü nevai) shejao tailuei nyupü chingnyüthü peü kü ammi hapakei dükshuohhen.

¹⁶ Shejao Shembüpa, ammei Kahvangi am kü mükjüp vaishi shuohpü jatthülei chingnyüthü kü ngü heepü meheyao yemmü aoei tetuh.

¹⁷ Hit, Amor, Kanan, Perizz, Hiv, hatü Jebus am peü Shembüpa, ammei Kahvangi epükei kemei jütüktuh.

¹⁸ Hei nevaijema, jomi jomei kahvangthü kü khümshing kü dükteipü jiühitbenüng douthü kemei am kü nyuhphahen, hatü ammi Shembüpa, ammei Kahvang khüei mang thahhen.

¹⁹ Mechem ammi hepak luangi chingnyü hük shümhenshang, ammi haleipü betjükpüthü teagtük. Betjükthü hahtuh shejao pü te-ag. Püthüyü ammei vepa nevai.

²⁰ Shejao betjük nejükpü püthü agei hapa chingnyü manglaamdai thahshi shümhen dousho nadang kü noteihen aok.