SHAHKÜP 19 - DAÜLANGPÜ LAIHING (BSI)

Shojo Ching

¹ Mechem Shembüpa, ammei Kahvangi jatthü mahtüktü jomei kahdok am kü shuohhen, hatü ammi jomei chingnyüthü hatü shemthü yah-ei halei uopheikü,

² Shembüpa, ammei Kahvangi am kü shuohpü kahdok kü am shingvaishi jiam kübü chingnyü jem hayaoha hanei tuhtuh.

³ Shennyak hüki hanei am jütükjü halei laongei daiyei sho johen shingvaishi Shembüpa, ammei Kahvangi am kü mükjüp shuohpü kahdok shing jem vaishi hantük hatü lomi thah-aokhen mü lemshong lingtük.

⁴ Shennyak hüki shelei meheyao nedanteipü neshiüpü kü shennyak hük nenyingi jütükjema, büpa sho yanghen shingvaishi laongei daiyei nyuhen nangkü hapayü shahkungnyü nyüke.

⁵ Nyingshah-i shennyak nyi phaüei püyah shaei pü agshingkü ay laoei hükpa küphü kü shüktü jütükjema, büpa yanghen shingvaishi hathü chingnyü jem kü hükei daiyei sho johen.

⁶ Chingnyü hük mon vaijema, lem taidaipü nangkü bhüh yempü ami büpa yephen hatü meheyao shelei nedanteipü ten neshiüjao hatü büpa dihen shangpü nevaijao büpai nenyingi mih jütükpü nangkü jomphongi büpa jütükhen.

⁷ Hanangkü ngei am kü chingnyü jem hayaoha tuhhen epeih.

⁸ Mechem Shembüpa, ammei Kahvangi ambü ampa kü lahpükei ammei kahmük viong dahühenshang, hatü jom kü lahpü kahdok am kü shouhhenshang,

⁹ ammi shao nyeinya chingnyü jem jetuh. (Shinnyih ngei am kü epü shahkungthü kemei dükjema, hatü Shembüpa, ammei Kahvang kü bamjema, hatü büpalei lemthü kü kamjema, büpai am kü hapa kahdokthü shuohhen).

¹⁰ Shembüpa, ammei Kahvangi am kü mükjüp shuohpü kahdok kü mang neshiüpü kü iy neyenhühen hatü shennyak jüpü mangi am nenyonghen shingvaishi ammi hapa düktuh.

¹¹ Shejao shennyak hüki lebü hük mü vepa vaipü nangkü daüpei jütükjema, hatü ha chingnyüthü hükei daiyei jojema,

¹² jomei jila leipü mübüthüi büpa yemnüng shomhen, hatü müei leiyei bhüh yempü am kü jühen shuohtüktuh.

¹³ Büpa kü phahji tehu. Israel kü hapakei jüteipü dohtüktuh; shejüang am meishi nyuhen.

Viong Yaong

¹⁴ Shembüpa, ammei Kahvangi am kü shuohpü kahdokei am she kübü ami sheitükpü chingyowpalei viong shungshep yaong bhiyei techaitük.

Denpü Shuohteipü Vanglem

¹⁵ Shennyak hüki pungteke shei denpü hük moni nyonghühen neaok; maanpeih shei denpü nyi nevaijü jem homei mon pungteke shei ehen aok.

¹⁶ Shennyak hüki shahshemi lebü shennyak hük kü pungteke shei nyonghüjema,

¹⁷ nedanteipü shennyak nyiphen khümshing hükei ngongpathü hatü shahphenbüthü hahepak kü dou dükei nyupüthü touei shahphenhen peihen.

¹⁸ Shahphenbüthüi hapa shahhidou meishi yemei veihen, hatü hapa shennyaki shahshemi küphü nyonghüpü vaijema,

¹⁹ büpai mih kü dükhen shei deihpü hanghi büpa kü dükeishuoh. Ammi hapakei am toueipü mang daütükhen.

²⁰ Aopü nanglakthü peüi hapa jung danei jom nyemhen, hatü am khongkü üpaiyao hajük kü henüng keipü mang dou nedükkahen.

²¹ Henüng keipü kü büm kü büm jei, mük kü mük jei, bha kü bha jei, lak kü lak jei, hatü la kü la jei shei phahji neshiüi nyukahen.