SHAHKÜP 17 - DAÜLANGPÜ LAIHING (BSI)

¹ Ammi Shembüpa, ammei Kahvang kü eela kohdaipü nevaijü kaw kohdaipü mohoh nevaijü mi yah-ei moila teshuoh; mehenangkü Shembüpai hapa kü jiühitnyeih.

² Shembüpai am kü shuohpü jila kü chemi nyupü nyüha nevaijü baha hüki Shembüpa, ammei Kahvangi vangeishuwpü mangtüktü mang thahjema,

³ hatü ngei epü nebangi lebü kahvangthü kü khümei, chongphoei nevaijü vanghe kü, lennyü kü nevaijü lithathü kü khümpü jung,

⁴ ammi danjema, ha meishi baong yemei veituh. Hapayü hingmei khih, hatü Israel kü hapa keipü mang dou dükpü khih shei yao-aokjema,

⁵ ünyü üpai hapa mang dou dükpa, ammei ching penyüsha haolei deiyei yaongi shükei jütüktuh.

⁶ Denpü nyi nevaijü jem nyujü mon shennyak hük jühen aok, shejao denpü hük mon nyupü kü üpayao jütükhen neaok.

⁷ Denpü shuohpü shennyakthüi shongei lak shih-ei panghen, hatü hapheikü mon nanglakthü peüi lakhüngei yaongi shükei jühen. Hapakei dükpai am touei nyupü mang daütükhen.

⁸ Ammi shahphenpü uoshingei nedanteipü hanei koei peipüiy-aongmashateipü nevaijü mophimo heanlem nangkü aetteipü, nevaijü üpteilenteipü nang ammi shahphen neshuoh-aokhen mü vamjema, Shembüpa, ammei Kahvangi jepü khümshingei yah-ei deituh,

⁹ hatü Levi am ngongpathü hatü hahepak kü nyuhampü shahphenbüthü touei deituh hatü jomphongi shahphen shuohhen.

¹⁰ Shembüpai jepü khümshingei jomi shuohpü shahphen aimü ammi dükhen.

¹¹ Jomi shuohpü shahphen aimü düktuh hatü ha kübü nyonghidah kü teleplük.

¹² Shembüpa, ammei Kahvang chongphopü shahphenbü nevaijü ngongpa kü üpai ven nebanghen jütükhen; hapakei dükpai Israel kübü mang daütükhen.

¹³ Peüi ha jung danhen hatü nyemhen, hatü üpaiyao hapakei nedükkahen.

Ongpa Nang Shahkung

¹⁴ Shembüpa, ammei Kahvangi am kü shuohpü kahdokei shüei hapa yah-ei uopheikü amphongi, “Jen kü ngeihpü shonpü jatthü kei jeniyao ong tuhshah” shei ehen.

¹⁵ Amphong shak kü ong vaihen jepü shennyakü Shembüpa, ammei Kahvangi jephopü shennyak vaihühen kentuh. Büpayü ammei jeihinaü khong kübü vaihen vongbong, shejao Israel am nevaipü kung shennyak hüki am shak kü ong tevaihü.

¹⁶ Ongpai büpa shingvaishi koyei longi ne-anghen nevaijü koyei shakhen shingvaishi nanglakthü shao Ijiplei neleishihhen; mehenangkü Shembüpai am kü, “Am ne-yei hapa lem kü nyokei neleihen” shei eteke.

¹⁷ Ongpai nyüha longi neyahhen; mehenangkü hapai Shembüpa toueipü büpalei mong lepdaihen. Büpai hon hi ngin longi thaiyei netuhhen vongbong.

¹⁸ Mechem büpa ong uoshing kü uohenshang, büpai Levi am ngongpathü leipü shahkung laitap leipü büpa shingvaishi hük nyangei noteihen vongbong.

¹⁹ Hayü büpa mü tuhhen, hatü büpai Shembüpa, büpalei Kahvang kü dhüm shuohhen nyinghen hatü shahkungnyü kü epü shahthü peü hinglemei ven banghen shingvaishi büpalei yangnyu yangkemei ha iehen,

²⁰ hatü büpalei jeihinaüthü mü büpa-üng meipüba shei nedeihhen, hatü shahkungnyü kübü nyonghidah kü neleplükhen. Hajü mon Israel kü büpa hatü büpalei hühihathüi hapa ongching kü yülushi vanglem lemaokhen.