SHAHKÜP 13 - DAÜLANGPÜ LAIHING (BSI)

Shahshem Thibüthü Nangkü Epü

¹ Thibü nevaijü mangh tetpü am hanei am touei peiyei amphong kü yashanyalepü nevaijü thamabenüng shah eyei,

² büpai epükei yashanyale nevaijü thamapü dou jiüei vamjema, hatü büpai, “Jeni lebü kahvangthü phei müshah, (ammi mangnyingpü kahvang) hatü jeni hathü kü khümshah” shei eküjema,

³ ammi hapa keipü thibü nevaijü mangh tetpüthülei shah kü hingtelem. Shembüpa, ammei Kahvang kü ammei mongdang kempai hatü ammei laangha kempai büpa kü bamnyüla shei nyinghen shingvaishi dokpü mon nyüke.

⁴ Ammi Shembüpa, ammei Kahvang phei mon mütuh, hatü büpa kü dhüm shuohtuh; büpalei shahkungthü düktuh hatü ven bangtuh; büpa chongphotuh hatü hinglemtuh.

⁵ Hapa keipü thibü nevaijü mangh tetpeyü jütüktuh; mehenangkü jomi Shembüpa, ammei Kahvang, üpai am aa vaihampü Ijip kahdok leipü müei leipa, büpa khüei yaongnyüke. Büpai Shembüpa, ammei Kahvangi epü lem kübü am mülanghen khenyüke. Am toueipü henüng keipü mang daütüktuh.

⁶ Ammei jeihinaü meimei-i, nevaijü ammei yeshang nevaijü yiükha, nevaijü ammi bampü shembünyü, nevaijü ammei mongkhen küphüi, “Jeni lebü kahvangthü kü khümshah” (am nevaijü ammei bühipathüi nenyingpü kahvangthü,

⁷ yopailei nevaijü tailuei nyupü nanglakthülei kahvangthü),

⁸ shei eküjema ammi hathülei shah tebang. Büpa kü phahji nevaijü yahyang shinshang tehu, hatü büpa yangei tetuh.

⁹ Büpa hingmei jütüktuh. Ammi shong hathü kü lak shihtuh; hapheikü nanglakthüi lak shihhütuh.

¹⁰ Hathüyü yaongi shükei jütüktuh; mehenangkü amphong aa vaihampü Ijip kahdok leipü müei leipü Shembüpa, ammei Kahvang toueipü am mülanghen büpai khenyüke.

¹¹ Shejüang Israel am peü hapa danei nyemhen, hatü am khongkü üpaiyao henüng keipü mang dou ne-yei nedükkahen.

¹² Shembüpa, ammei Kahvangi am nyuhen shuohpü kahdokei,

¹³ nemeipü shennyak hanei vamei, “Jen daiyei lebü kahvangthü kü khümshah” (ammi nenyingpü kahvangthü), shei eyei ammei nyushing leipü nanglak hanei lemnyong kü mülangpü khih shei danjema,

¹⁴ ammi hapa meishi baong yemei dokei veituh, hatü hapa hingmei vaiyei am touei henüng keipü jiühitpü dou vampü khih shei yepaokjema,

¹⁵ hapa shingei nyupü nanglakthü hatü jomei yemhimakthü kemei jütüktuh.

¹⁶ Halei nyupü nanglakthülei douhinang kemei shennyakthü thaiteipü shingei thaituh, hatü Shembüpa, ammei Kahvang kü dhaomü jakpü moila keiha hapa jila hatü haleipü douthü kemei jaktüktuh. Hapa shingü den kü lavüngtoiyei tuhhen hatü ne-yei nelinghen.

¹⁷ Hapakei eelatükpü douthü ammei shemei tetuh; shejüang Shembüpai mongshihpü meidaihen; büpai ammei bühipathü kü lahpü keiha am kü phahji, yahyang shinshang huphahen hatü am nanglak longi dahühen;

¹⁸ mehenangkü hayü Shembüpa, ammei Kahvangei ven danei ngei shinnyih am kü shuohpü shahkungnyüthü ven bangei büpa touei jiüpü dükjü mon danghen.