SHAHKÜP 12 - DAÜLANGPÜ LAIHING (BSI)

Phopshem Hük Mon

¹ Hapayü Shembüpa, ammei bühipa amei Kahvangi am kü shuohpü kahdokei nyupü thahshi ammi kenhingei dükhen shahkungnyüthü nyüke.

² Kahshang shaopüthü hatü shangtaothü hatü püdhüm vungdhüm peü kü ammi changtükhen jatthüi jomei kahvangthü kü khümhen linghahpü shingthü peü mangtükkemtuh.

³ Jomei moidüthü, daülangpü yaong shemnyüthü khih mü nihtüktuh hatü jomei Asherah kahvangthü aw kü jaktüktuh; jomei kahvang lajeithü dehtükkemtuh hatü hathü shing kübü jomei menthü thittüktuh.

⁴ Hathü nanglakthüi jomei kahvang kü khümpükei ammi Shembüpa, ammei Kahvang kü tekhüm.

⁵ Am jatthülei kahmük peü khongkü Shembüpai büpalei men tuhhen shingvaishi shing hük jehen; halei nanglakthü peü peiyei büpa kü khümhen.

⁶ Hatouei ammei jakpü moila hatü lebü moilathü, ammei ankhong moila hatü mongmei moila, ammi shuohhen shei lahpü moilathü, ammei mongong moila hatü shongei shaanpü mohoh hatü mi chehathü hatou shingei koei peihen.

⁷ Halei, Shembüpa, ammei Kahvangi ammi dükpü lemphü kü moihimanpü nangkü am hatü ammei shem am kemei chemi hahyinghen hatü mongonghen.

⁸ Mechem hapa hepak ngoihenshang, ammi dükhampükei nedükhen vongbong. Shaang thahshi ammi mongpükei am peüi khümei nyuteke;

⁹ mehenangkü am nyiumeishing hatü Shembüpa, ammei Kahvangi am kü mükjüp shuohpü kahdok mangngoi.

¹⁰ Shejao mechem ammi Jordan yung homei Shembüpa, ammei Kahvangi am kü mükjüp shuohpü kahdokei nyuhenshang, büpai am shinei nyupü vepathü peü kübü nyiumei yahphahen, hatü am halei chingmei nyiushemmei kü nyuhen.

¹¹ Hahepak kü Shembüpai büpa khümhen shingvaishi shing hük jephahen, hatü amphongi ngei epü lemphüli: jakpü moila, lebü lanei shuohpü moila, ammei ankhong moila, hatü ammi Shembüpa kü shuohhen shei lahpü lebü moilathü kemei koei peihen.

¹² Halei amphongi Shembüpa, ammei Kahvang touei ammei hapeüthü, ammei aathü hatü ammei jilalei nyupü Levi am mü mongongtuh; Levi amü jomei kahdok hayaoha neshiü shei deihtuh.

¹³ Ammei jakpü moila ammi mongpü shing kü neshuohhen kenhingtuh.

¹⁴ Am jatthülei kahmük hükei Shembüpai jephopü shingei mon ngei am kü epü lemphüli moilatuh.

¹⁵ Shejao Shembüpa, ammei Kahvangi moihimanphopü keiha am nyushingei yemhimak jüei hahhen aok. Shaokphai hatü meishiyphai hahpü keiha nedaüpü hatü daülangpü yemhimak phai hahhen aok.

¹⁶ Shejao amphongi hathülei iy nehahhen; yung keiha kahdokei yentüktuh.

¹⁷ Amphongi moilapü hahying, ankhong moila, yiü, olive mainga, nevaijü shongei shaanpü mohoh hatü mi, nevaijü Shembüpa kü shuohhen shei lahpü moilathü, nevaijü ammei mongongpü moila hatü lebü moilathü peü am nyushingei nehahhen.

¹⁸ Shembüpa, ammei Kahvang touei am hatü ammei hapeüthü, ammei aathü hatü ammei jilalei nyupü Levi am kemei Shembüpa, ammei Kahvangi jepü shingei hathü moilathü hahhen, hatü halei ammi dükpü lemphüli shingvaishi mongongteihen.

¹⁹ Ammei kahdokei nyupü thahshi Levi am nebetükhen kentuh.

²⁰ Mechem Shembüpa, ammei Kahvangi lahpükei ammei kahmük viong dahühenshang, ammi hahhüpüshük phai hahhen aok.

²¹ Shembüpa, ammei Kahvangi büpa kü khümhen jepü shing am nyushing kübü taishi nyujema, Shembüpai am kü shuohpü mohoh hatü mithü jüei am nyushingei ammi hahhüpüshük hahhen aok.

²² Amphongi shaokphai hatü meishiyphai hahpükei hahtuh. Nedaüpü hatü daülangpü yem nyiphen hahhen aok.

²³ Shejao hapalei iy tehah; mehenangkü yangnyu-ü iy kü nyüke, hatü amphongi phai mü yangnyuyem tehah.

²⁴ Amphongi iy tehah, shejao yung keiha kahdokei yentüktuh.

²⁵ Am hatü ammei hapeüthü meishi nyuhen shingvaishi iy tehah; mehenangkü amphongi Shembüpa touei mehe jiüpa, ha dükhen.

²⁶ Shembüpa kü ammi shuohhen shei lahpü moilathü Shembüpai jepü khümshingei koei peituh.

²⁷ Shembüpa, ammei Kahvangei moidü touei ammi shuohpü jakpü moila kübü phai hatü iy nyiphen shuohtuh. Jakpü moila kübü iy moidü chongei langeishuoh shejao phaiyü amphongi hahtuh.

²⁸ Am hatü ammei hapeüthü meishi nyuhen shingvaishi ngei am kü shuohpü shahkungthü dükhen kentuh; mehenangkü Shembüpa, ammei Kahvang touei mehe mei hatü jiüpa, ha amphongi dükhen.

Lajei Khümpü Khüei Shahvüng

²⁹ Ammi jatthülei kahdok neüei yahshingkü Shembüpa, ammei Kahvangi jom mahtükhen, hatü ammi hapa kahdok yah-ei halei uohen.

³⁰ Shembüpai jatthü mahtükpheikü jomei kahvang nang yemei, “Ha jatthüi jomei kahvang kü mekei khümhampa yo? Hamiyao hapakei khümhen hih” shei baong yemei vongshüh kü nevühen kentuh.

³¹ Ammi Shembüpa, ammei Kahvang kü jomei vanglem aimü tekhüm; mehenangkü jomi jomei kahvang kü khümshingkü Shembüpai jiühitbenüng doulem kemei düknyüke. Jomi laophülei hapeüthü jüei jomei kahvang kü moila shuohnyüke.

³² Ngei am kü epü lemphüli düktuh; ha kü meheyao te-ü, nevaijü haleipü meheyao teyaktük.