SHAHKÜP 10 - DAÜLANGPÜ LAIHING (BSI)

Mosai Shao Shahkungnyü Ja Yahpü

¹ Hahepak kü Shembüpai ngei kü, “Sheleipü kei yaongshung nyi hatü ha shihhen pü pela hük lingtuh, hatü hapa yah-ei kahshangei aongkei,

² hatü nüngi shelei bhaotükpü yaongshung kü nyangpü shahthü nyangphahen hatü ha pelalei hütuh” shei ephüteke.

³ Hanangkü ngei akacia pü yah-ei pela ling, hatü sheleipü keiha yaongshung nyi lingei notü kahshangei aong.

⁴ Shembüpai hapa yaongshung nyi kü büpai amphong kahshangei thaipü nyih aw kübü vamei epü shelei nyangpü shahkungnyü an nyang, hatü Shembüpai ngei kü ha yahphüteke,

⁵ hatü ngei kahshang leipü nyokei leiyei Shembüpai ngei kü epü keiha ngei lingpü pela kü ha hüpeih, hatü hathü shaangao halei nyüpeih.

⁶ (Israel am Jaakan amei yungkuk kübü Moserah thahshi daipeih hatü halei Aaron diyei mangh vütükpeih hatü büpalei cheha Eleazari büpa nangjei ngongpa vaipeih.

⁷ Hatoueipü jomphong Gudgodah hatü yunglok nyupü Jotbathah thahshi daipeih.

⁸ Hahepak kü Shembüpai Levi am phangi Shembüpalei Vangpüshuwpü Pela kohen, hatü Shembüpa kü ngongpathü kei chongphohen, hatü büpalei men kü moihiman yühen shingvaishi hayaoha jeyei tuhteke. Hathüyü shaang thahshi jomei dousho nyüke.

⁹ Hanangkü Levi ami lebü jatthüi kei kahdok nedang; Shembüpa, ammei Kahvangi lahpükei jomi dangpeyü jomi Shembüpalei ngongpathü vaihen mükjüp dangpeih.)

¹⁰ Sheleipükei ngei nyih pinyi ya pinyi nyuteke, hatü Shembüpai hahepak kao ngei epü kü bangei am nemahtükpih shei ephüteke.

¹¹ Hahepak kü Shembüpai ngei kü, “Leituh hatü ngei jom kü shuohhen shei epü chebü chepa kü lahpü kahdokei jom peiyei yahhen shingvaishi nanglakthü mütuh” shei ephüteke.

Kahvangi Lanei Shuohhen Nyükpü

¹² Shaang, Oh Israel nanglakthü, Shembüpa, ammei Kahvangi am kü mehe yünya shei shejema, Shembüpa, ammei Kahvang kü nyemhen, büpalei lemthü kü kamhen; ammei mongdang hatü laangha kempai büpa kü bamhen hatü büpa chongphohen,

¹³ hatü am meihen shingvaishi ngei shinnyih am kü shuohpü Shembüpalei shahkungnyüthü banghen nyüke.

¹⁴ Vangshothü hatü peü mü shaopü vangshothü, kahdoknyü hatü haleipü lemphüli Shembüpa, ammei Kahvangei nyüke.

¹⁵ Shejao Shembüpai ammei bühipa kü ahshi-üng bampü nangkü büpai lebü jatthü shak kü am jepü khih hatü shaang thahshi amphongü büpai jelangpü nanglak nyüke.

¹⁶ Hanangkü ammei mongdang shuw japtüktuh hatü hajük kü mong vaanei tenyu.

¹⁷ Mehenangkü Shembüpa, ammei Kahvangü kahvangthü khong kü Kahvang, hatü shembüthü khong kü Shembüpa. Büpayü longpü, wong kohpü hatü nyempühanbenüng Kahvang khih. Büpai baong hanei nenonyih hatü yawhdou neyahnyih.

¹⁸ Büpai hashihha hatü vaümnyü khüambaknyeih hatü lakeiloipü shennyakthü kü bamnyeih hatü jom kü hahying hatü ashakviha shuohnyüpeih.

¹⁹ Amphongi lakeiloiyei nyupüthü kü bamtuh; mehenangkü amphong Ijip kahdokei benha vaiyei nyuhampeih.

²⁰ Shembüpa, ammei Kahvang kü nyemtuh hatü büpa chongphotuh. Büpa kü wongshongi shongtuh hatü büpalei men vihtuh.

²¹ Büpayü ammei Kahvang, hatü büpai am shingvaishi longpü hatü nyembenüng yashanyale dükpü ammei müki eeteke.

²² Ammei bühipa Ijip kahdokei pejempüan mon yiüteke, shejao Shembüpa, ammei Kahvangi amphong vangsho lithilen kei dahüteke.