SHAHKÜP 1 - DAÜLANGPÜ LAIHING (BSI)

Shahsha Appü

¹ Hapayü Mosai Israel am kü Jordan yungyen heongphi kübü jahpanei nyushi epü shahthü nyüke. Jomphongü Jordan kahji Suph yopailei Paran hatü Tophel, Laban, Hazeroth hatü Di-zahab aa kü nyuteke.

² (Seir Kahshang lem kü daijü Sinai Kahshang lem kübü Kadesh-Barnea ngoihen nyih anpühük yahteke.)

³ Jom Ijip tuhtü daipü vangbong pinyi mü len anpühükpabü shongpü nyih kü Shembüpai Israel am nang mehe Mosa kü eshuohpa, ha büpai jomphong kü eshuohteke.

⁴ Hapayü büpai Heshbonei ong vaipü Amor amei Sihon ongpa hatü Ashtaroth hatü Edreilei ong vaipü Bashan amei Og ongpa nyi neüpheikü nyuteke.

⁵ Jordan yungyen heongphi Moab kahdokei Mosai Kahvangei shahkungnyü nih-ei venhen chongpangei nyuhteke.

⁶ “Jen Sinai Kahshangei nyushi Shembüpa, jenei Kahvangi jen kü hei epeih, ‘Amphongi hapa kahshangei nyuhüpüshük nyuteke.

⁷ Ammei baümtapthü bentüktuh hatü phaüshang kahmük Amorlei aongtuh hatü Arabah kü nyupü shennyakthü kahshangthülei heshüphi kahshangla kü, Negeb kü hatü Mediterranean yungkung kü Kanan am, hatü Lebanon hatü longpü Euphrates yungyen thahshi daituh.

⁸ Veituh, hapa kahdokü ngei am kü shuohtepih. Ammei bühipa Abraham, Isak hatü Jakob hatü jomei hühihathü kü Shembüpai shuohhen shei lahpü kahdokei shüei hapa yahtuh’ ” shei eteke.

Jat Mübüthü Jepü

⁹ Mosai nanglakthü kü, “Jen Sinai Kahshangei nyushi mebüüng ngei monhai am müei daihen neaokükhih shei etepih.

¹⁰ Shembüpa, ammei bühipa amei Kahvangi amphongü vangsho lithathü kei dahüpü khih.

¹¹ Shembüpa, ambü ampalei Kahvangi shao haja haja nyemdahü hatü büpai lahpükei am kü moihiman nyemshuoh!

¹² Shejao mekei etü ngei moni ammei mongshang, ammei hanggovih hatü am nedanteipü kemei koaokhen?

¹³ Hanangkü kon kohpü, nyingpü hatü shongnyü shennyak hanei jetuh, hatü jomphongi amphong kü veihen” shei eteke.

¹⁴ “Nüngi mehe dükhen shei deih, hayü meiangke” shei amphongiyao eteke.

¹⁵ Hanangkü ngei ammei jat kübü kon kohpü, nyingpü shennyak yah-ei am shak kü vanglem lemhen jepeih. Hanei-i haja shak kü, hanei-i kho shak kü, hanei-i pinyipüan shak kü, hatü hanei-i an shak kü mübü vaihen jepeih.

¹⁶ Hatü hapa kü ngei ammei shahphenbüthü kü hapakei eshuohpeih: “Ammei nanglak khongkü depülaopü vamküjü meishi bangtuh, hatü ammei nanglaki nanglak aa kü vaijao lakeiloipü am vaijao jiüshi shahphentuh.

¹⁷ Baong hanei shah tephen; üpa vaihenshang vaijao longpü maanpü aihük mü notuh. Üpa kao tenyem; mehenangkü amphongi shahhingi shahphen shuohpeyü Kahvang leipü nyüke. Amphongi nephenaokhen mü wongpü shahhidou nyujema ngei touei deikei hatü hapayü ngei phenhen.

¹⁸ Ammi dükhen lemphüli ngei hahepak kü-üng ekemphei” shei eteke.

Israel am Kadesh Barnealei Nyupü

¹⁹ Hapheikü Shembüpa, jenei Kahvangi jen kü epü keiha jen Sinai Kahshang kübü layaongei ammi eepü longpü hatü nyembenüng jahpan peü homei Kadesh Barnea mangngoi thahshi Amor amei phaüshang kahmük peü homei daiteke.

²⁰ Hapheikü ngei amphong kü, “Shembüpa, jenei Kahvangi jen kü shuohpü Amor amei phaüshang kahmük ngoiteke.

²¹ Veituh, Shembüpa, ammei Kahvangi hapa kahdok am kü shuohteke. Aongtuh hatü Shembüpai ambü ampa amei Kahvangi am kü epü keiha hapa kahdok yahtuh. Am nyemei hanei tenyu” shei eteke.

²² Hahepak kü am peü ngei touei peiyei, “Kahmük thümhen shingvaishi jeni yeih-ei shennyakthü shomshah hatü jen daihen lem hatü jen ngoihen jilathü nang shah-om nyemleikei” shei eküteke.

²³ Hapa chudeih-ü meiangke shei deihpü nangkü jat ieyei kübü shennyak hükbaong heshap jom anpünyi jeteke.

²⁴ Jomi phaüshang kahmük ngoishi daiyei Eshkol kahjiao ngoiyei kahmük dokteke.

²⁵ Hapa kahdok leipü betjükao jomi vaümei jen kü leiyei, “Shembüpa, jenei Kahvangi jen kü shuohpü kahdokü meiangke” shei shah-om aokküteke.

²⁶ Shejao ammi hapa kahdokei ne-aonghüi Shembüpa, ammei Kahvangi epü kü khüei yaong.

²⁷ “Ammi hüki hük mü, Shembüpai jen kü jiühitnyu khih; büpai jen Amor amei lak kü nyemmah shei Ijip leipü müei daipü khih” shei langmaan.

²⁸ “Jen halei mehekei aonghenang? Nyempai mong mahdaiteke. Jeni shompü shennyakthüi jen kü, ‘Halei nyupü shennyakthüyü jen mü wong kohpüba hatü shaopüba, jom nyupü chingthüyü penyü vangsho mao shaoshi showtüktü nyüke. Hamphongi halei Anakim am dangkao eetepih’ ” shei eküteke.

²⁹ Shejao ngei amphong kü, “Jom kü tenyem” shei etepih.

³⁰ Shembüpa, ammei Kahvangi am mühen, büpai ammei müki eeshi Ijiplei hatü jahpanei lingpükei am shingvaishi büpai hokkahen.

³¹ Büpai laophülei hapeü müpü keiha Shembüpa, ammei Kahvangi lemyang kemei kü hapa shing thahshi müteke.

³² Shejoongpa ammi Shembüpa, ammei Kahvang kü hingnelem.

³³ Büpai düngei am kü yanüng aw shemnyüi hatü nyihnüng phum shemnyüi am metouei baümtap veyei nyuhen, hatü am dailem huei shehong lemei mülangmao ammi büpa kü hingnelem.

Shembüpa i Israel am Hanghihünyüke

³⁴ Mechem Shembüpai ammi eelapü danpa, büpa mongshih hatü vangteke,

³⁵ Jephunnehlei cheha Kaleb mü lenei hapa mang hangkuthü üpayao ngei ambü ampa kü shuohhen shei lahpü kahdokei neshüaokhen.

³⁶ Büpai ngei kü mong kemei hinglemei nyuteke, hanangkü ngei büpa hatü büpalei hühihathü kü büpai daiyei thümpü kahdok shuohhen hatü büpai hapa kahdok eehen:

³⁷ Amphong tata kü Shembüpai ngei kao mongshih-ei, “Nüngi dangkao hapa kahdokei neshüaokpih” shei ephopeih.

³⁸ Shejao ammei sheühbü Nunei cheha Joshua-i mütü hapa lahpü kahdokei shüaokhen, hanangkü büpa kü mongnang thongeishuoh.

³⁹ Maanpü hashihthü vepathüi wüpei küplanghen khih shei amphongi epüthü, üam mang hi mei shao mangnying, hathüi hapa kahdokei shüaokhen. Ngei jom kü hapa kahdok shouhhen, hatü jomi hapa kaamlanghen.

⁴⁰ Shejao amphongü shinei leiyei Hakla Yungching kübü lem kü daiyei yingnyü philei daituh.

⁴¹ “Hami Shembüpa khüei mang thahteke. Shembüpa, hamei Kahvangi epükei ham daiyei hokhen hih” shei ammi eteke. Hanangkü phaüshang kahdokei daiyei yopai-i hokaokhen shei am peüi ve-ow temei daiteke.

⁴² “Shejao Shembüpai ngei kü, hathü kü vehokei nedaihen eyeishuoh; mehenangkü ngei jom mü nenyupih, hatü jomei vepathüi jom neühühen” shei ephüteke.

⁴³ Hanangkü ngei am kü ha eteke, shejao ammi ha nebang. Ammi Shembüpa khüei yaong, hatü am changmeiyei phaüshang kahdokei hokhen layaongteke.

⁴⁴ Phaüshangei nyupü Amor am vamei Seir kübü Hormah thahshi nyahlangi changpükei am changei deiteke.

⁴⁵ Am nyokei leiyei Shembüpa tou kü thepeiyoungpü kü dhaong neshangang.

⁴⁶ Hanangkü amphong Kadeshlei nyih longi nyuei hepak kemei halei yaktükpeih.