RUTH 4 - DAÜLANGPÜ LAIHING (BSI)

Boaz-i Ruth mü Shem Yempü

¹ Hapheikü jila peshaden shahthai shingei aongei halei uoshi nyu. Mechem büpai epü showsheipü shennyak peijapa, Boaz-i, “Küphüpa, hatouei heihkei hatü uotuh” shei e. Hanangkü büpa heih-ei uoteke.

² Hahepak kü Boaz-i jila leipü mübüthü jom an müei deiyei büpai hathü kü, “Hamü uotuh” shei e, hatü jomphong uoteke.

³ Hapheikü büpai showsheipü shennyak kü, “Moab leipü Naomi nyokei leiteke, hatü pinnyü jenei jeihinaü Elimelekhei kahdok yuhüei enyüke.

⁴ Hanangkü ngei nüng kü ha nang ephahen shei deihpeih. Nüngi hamü uoshi nyupüthü nyushi hatü jenei nanglak mübüthü nyushi nüngi ha shaktuh. Nüngi mongjema ha shaktuh; nüngi nemongjema ngei kü eshih, ngei nyinghahhen hih; mehenangkü ha shakhenü nüng-üng shongpüba vaihen, ngeiyü nüng phei kübü mon” shei e. Hanangkü büpai, “Ngei shakhen hih” shei e.

⁵ Hahepak kü Boaz-i, “Nüngi Naomilei lak leipü kahdok yahhinüng nüngi didaipü shennyakei men nedoh-i nyuhen hatü büpalei mükjüp nyuhen shingvaishi yimpi ami tuhpü vaümnyü Moab lapeü Ruth-ao yahhen vongbong” shei e.

⁶ Ha eshuohpü nangkü ha showsheipü shennyaki, “Shejema ngei neshakaok-ü; mehenangkü ngelei hapeüthüi hapa mükjüp neyah-aok-ü; hayü vongshüh vaihen khih. Ngei neaok-ü, nüngi shakhahtuh” shei e.

⁷ Shaang hathü nyih kü Israel kü mükjüp shakteipü hatü jeiteipü vanglem hükü yupü ami shakhahpü am kü lathuh hukei shuohhamteke. Hapa keiha Israel kü shahphen shuohteipü vanglem nyuteke.

⁸ Hanangkü hapa showsheipü shennyaki Boaz kü, “Nüngi shakhahtuh” shei etü büpalei lathuh hukei Boaz kü shuoh.

⁹ Hahepak kü Boaz-i mübüthü hatü nanglakthü peü kü, “Shinnyih amphongi denpü vaiyei ngei Naomilei lak leipü Elimelekh hatü cheha Kilion hi Mahlon nyilei mükjüp kemei ngei yahlangnyeih.

¹⁰ Shao ngei Mahlonei chenyüha Moab lapeü Ruth-ao ngelei nyüha vaihen, hatü didaipü shennyakei men kü büpalei mükjüp nyuhen; büpalei jeihinaü khong kübü hatü büpa nyupü jila kübü büpalei men nemahdaihen shingvaishi hathü yahnyüpeih; shinnyih amphongü hapa kü denbüthü nyüke” shei eteke.

¹¹ Hahepak kü mübüthü hatü peshadenei uopüthüi, “Hami hapa kü denpü shuohnyeih. Nüngei shemei peiküpü nyühayü Israel kü nanglak longi dahüpü Rachel hatü Leah nyi kei Shembüpai nyemleihü. Nüngü Ephrathah kü moihiman kohpü hatü Bethlehem kü men-e nyemleima.

¹² Shembüpai hapa nyüha homei nüng kü shuohpü hapeüthü homei nüngei shemongü Judah hi Tamar nyilei cheha Perez kei nyemnyuma” shei eteke.

Boaz hatü Hühihathü

¹³ Hanangkü Ruth-ü Boazlei shembünyü lei. Mechem jiji chemi nyupa, Shembüpai pinnyü büm nekongi leihü, hatü yeshang hük büh.

¹⁴ Hapheikü hapa nyühai Naomi kü, “Nüng mü showsheipü neshiüi netuhphongpü Shembüpa men longtuh. Israel kü büpalei men men-e nyemlei!

¹⁵ Büpai nüngei yangnyu ja leiyei linghen, hatü nüng viüei nyupü hepak kao büpai nüng junghen. Nüngei lipeü üpai nüng kü bamnya, hatü üpa kü nüngi nethe nyet angpü mao nyeinya bamnya pinnyüi nüng kü hüpeü hük angphüteke” shei e.

¹⁶ Hahepak kü Naomi-i naü yah-ei pinnyülei shüngdok shangkü haütü naü kü jung.

¹⁷ Chingyow yüpi kübü nyühathüi naü kü men hük, “Naomi kü naü hük angjateke” shei menteke. Jomphongi büpa kü Obed shei men. Büpayü Davidei chepa Jesselei pa nyuteke.

Bülem

¹⁸ Hapayü Perezlei bülem: Perez-ü Hezronei chepa nyu,

¹⁹ Hezronü Ramei chepa nyu, Ramü Amminadabei cheha nyu,

²⁰ Amminadabü Nahshonei chepa nyu, Nahshonü Salmonei chepa nyu,

²¹ Salmonü Boazlei chepa nyu, Boaz-ü Obedei chepa nyu,

²² Obedü Jesselei chepa nyu, Jesseyü Davidei chepa nyuteke.