RUTH 2 - DAÜLANGPÜ LAIHING (BSI)

Ruth-i Boaz mü Pongteipü

¹ Shaang Naomilei chepaha Elimelekhei jeihinaü hük longi men-e shemmei hük meni Boaz shei nyuteke.

² Nyih hük Moab am Ruth-i Naomi kü, “Üami ngei kü shinshangei deihphahenshang ngei jomei kahlei shaei hahdhei yemei aongküpeih” shei e. Naomi-i pinnyü kü, “Lamei, shatuh” shei e.

³ Hanangkü pinnyü shaei hah vetpü am pheilei hahdhei yemei dai. Hapakei daishingkü Elimelekh am shem Boazlei kahlei peiteke.

⁴ Hahepak kü Boaz-i Bethlehem leipü shaei hah vetpüthü kü, “Shembüpa am mü nyutuh!” shei e. Jomphongiyao büpa kü, “Shembüpai nüng kü moihimantuh” shei jangei e.

⁵ Hahepak kü Boaz-i hah vetpüthü kü mübü vaipüba kü, “Antepa nyühayü üamang?” shei phe.

⁶ Hapa shennyaki, “Pinnyü-ü Naomi mü leipü Moab am khih.

⁷ Pinnyüi ngei kü, ‘Chingmeilemlingei hah vetpüthü phei kü hahdhei yemhahshah’ shei ephopeih. Pinnyü kahlei shaei dhom mebü shaang thahshi ajükao nyiunemei-i dou düknyu khih” shei e.

⁸ Hanangkü Boaz-i Ruth kü, “Lamei, ngei epü bangtuh. Nüng mih-ei kahlei hahdhei yemnüng tedai; haleipü nedai-i ngelei dou dükpü nelathü mü nyutuh.

⁹ Jom metou shing vetkahen veishi nyutuh, hatü hathü pheikü mütuh. Nüng kü meheyao hanghi teshuoh shei ngei nethethü kü etüktih. Nüng mechem yung lekahen, leiyei nethethüi shoei tuhpü yungdük leipü yung yingtuh” shei e.

¹⁰ Hapakei eshuohpü nangkü pinnyüi aümei shatü, “Ngei keipü kung am nüngi nyinghen mü nüngei mük kü mehe bamhübenüng ngei kü eeaokpa?” shei e.

¹¹ Boaz-i jangei, “Nüngei baha didaihinüng nüngi ampahalei chenyü kü mehe dükpa; mekei nüngi anyü hi ampa hatü ammei kahmük tuhphongtü nüngi shelei nyingei nenyupü nanglakthü mü nyunüng peipa ha jung peü ngei kü ekütepih.

¹² Nüngi mehe dükpa, ha kü Shembüpai nüng kü nyemshempha. Shembüpa, Israel Kahvang, üpalei kaokhiyang phangkü loihen nüng peitepa, büpai nüng kü thintho changshi nyemyahphama” shei e.

¹³ “Nüngi ngei kü longi bampü huteke, ngelei shembü” shei pinnyüi e. “Nüngi ngei nyiushem meihü hatü ngei nüng chongphopü nelathü mü hükkeipü nevaijao nüngi ngei mü inyainyiami bampai eteke.”

¹⁴ Hahyingpü hepak kü Boaz-i pinnyü kü, “Halei heihkei hatü aan yah-ei yiüthi kü hüngtü hahtuh” shei e. Mechem pinnyüi hah vetpüthü mü uopa, büpai pinnyü kü ngoutükpü hahying hanei shuoh. Pinnyüi hapa moh-ei hahtü shao maani aoteke.

¹⁵ Mechem pinnyüi shao hahdhei yemhen daipa, Boaz-i hah vetpüthü kü, “Pinnyüi hahbhaong kübüao nyemyahhah; ha kü amphongi meheyao te-eshuoh.

¹⁶ Amphongi hahbhaong kübüao lakshüm maei pinnyüi nyemthaihahnüng shüei tuh-eishuoh, hatü pinnyü kü telohshuoh” shei e.

¹⁷ Hanangkü Ruth-i om dhüshi hahdhei thaiyei nyu. Hapheikü pinnyüi hapa barley hah tenshingkü dok an hükshing nyuteke.

¹⁸ Pinnyüi ha kotü jila yemei lei, hatü pinnyüi meshük thaiaokpa chenyüi ha eeteke. Hapheikü pinnyüi changei hahtü ju-ao kopü om-aok pinnyü kü shuoh.

¹⁹ Chenyei-i pinnyü kü, “Nüng shinnyih hahdhei melei thaipa? Nüng üamei kahlei thempa? Nüng kü hajük mong shuoh-ei jungpü shennyak kü Kahvangi moihimantuh” shei e. Hahepak kü Ruth-i Naomi kü pinnyü üamei kahlei thempa ha jung ejateke. “Shinnyih ngei dou dükei thempü kah shembülei menü Boaz khih” shei e.

²⁰ “Shembüpai büpa kü moihimantuh” shei Naomi-i Ruth touei e. Büpai shinnyih thahshi yemmü nyupü hatü didaipü am kü phahji yahyang hupü nedoh-i nyüke. Pinnyüi shao, “Hapa shennyakü jenei showsheipü shennyak hih” shei e.

²¹ Hahepak kü Moab lapeü Ruth-i “Hah vetei mangkem thahshi nüngi ngelei hah vetpüthü mü nyutuh shei büpai ngei kü ephopeih” shei e.

²² Naomi-i Ruth kü, “Lamei, nüng shingvaishiyao hathü nelathü mü daipü meipeih; mehenangkü mih-ei kahlei shajema nüng kü nemei-i dükphahen aokpeih” shei e.

²³ Hanangkü barley hatü wheat hah vetei mangkem thahshi Ruth-i Boazlei hah vetpü nelathü mü khaaishi nyu, hatü pinnyüi nedoh-i chenyei mü nyuei dai.