RUTH 1 - DAÜLANGPÜ LAIHING (BSI)

Elimelekh am Shem Moablei Daipü

¹ Shahphenbüthüi vanglem lempü nyih kü kahmük kü münghishaü hük pei, hatü Judah kahdok Bethlehem leipü shennyak hük chenyüha hatü cheha yeshang nyi mütü kansho hük shing Moab kahdokei nyunüng dai.

² Hapa shennyakei menü Elimelekh, hatü chenyühalei menü Naomi hatü yeshang nyilei menü Mahlon hatü Kilion nyuteke. Jomphongü Judah kahdok Bethlehem leipü Ephrath am nyuteke. Jom Moab kahdokei daiyei halei nyu.

³ Shaang Naomilei chepaha Elimelekh didaitü cheha nyi mütü pinnyü tuhphong.

⁴ Jijinyi-i Moab lapeü yiük yah; hükei men Orpah hatü hükpalei men Ruth nyuteke. Jom halei vangbong an hükshing nyupheikü,

⁵ Mahlon hatü Kilion nyiphen didai, hatü Naomi monha baha hatü hapeü nyi neshiüi tuhphong.

Naomi hi Ruth Nyi Jerusalemei Leipü

⁶ Mechem pinnyü Moab kahdokei nyupa, Shembüpai laophülei nanglak kü hahying moihiman longi shuohnyuja shei danei Naomi hatü cheha nyilei nyüha nyi müei Moab leipü layaongei leihen tem.

⁷ Pinnyü mü hapa nyüha nyi shei jom nyushing kübü layaongei Judah kahdokei leipü lemei dai.

⁸ Shejao Naomi-i cheha nyilei nyüha nyi kü, “Anyü hi ampa am mü nyunüng leituh. Anjinyi-i anjilei baha hatü ngei kü bampü hupükei Shembüpai anji kao bampü nyemhupha.

⁹ Anjinyiphen kü lebü baha shemei nyiushemmei kü nyuhen Shembüpai nyemyahpha” shei e. Hapheikü pinnyüi jiji kü om kü jüp, hatü jom peü wongmü thep,

¹⁰ hatü pinnyü kü, “Henjiyao nüng mü nüngei nanglakthü touei leikahen hih” shei e.

¹¹ Shejao Naomi-i, “Lamei nyi shemei leidaituh. Anji mehenüng ngei mü leikahen? Anjilei baha vaihen mü ngei shao yeshang hapeü bühaokhen je?

¹² Lamei nyi shemei leidaituh; baha ja danghenao ngei longi viüdaiteke. Shaang thahshi ngei shing monglemhen nyüpeih shei paoh deihjao hatü sheya dangkao baha dangei yeshang hapeüthü bühjao,

¹³ jom nethe leipü thahshi anji danaokhen je? Jom danei shem neyemi nyuaokhen je? Hapakei nevaipih, ngelei lamei nyi. Anji meyü ngei kü-üng nyeinya shahyaki deihnyüke; mehenangkü Shembüpalei lak ngei khüei noteke” shei e.

¹⁴ Ha eshuohpü nangkü shao jiji nyeinya thep. Hapheikü Orpah-i chenyei kü om kü jüptü nyu-e shei etü shemei leidai, shejao Ruth-i pinnyü kü khaaiteke.

¹⁵ Hanangkü Naomi-i pinnyü kü, “Veituh, anüngnyü jomei nanglak hatü jomei kahvang yemei leidaiteke. Nüngao pinnyü mü leituh” shei e.

¹⁶ Shejao Ruth-i jangei, “Nüng tuhphongtü nüng mü yanei leihen ngei kü tenyeanpha. Nüng melei daihen ngeiyao halei daihen, nüng melei nyuhen ngeiyao halei nyuhen. Nüngei nanglakü ngelei nanglak, nüngei Kahvangü ngelei Kahvang.

¹⁷ Nüng melei di, ngeiyao halei dihen. Dipai ji neyanhü pheikü lemhük kei vaijema Shembüpai nemei-i nyemdükpha!” shei e.

¹⁸ Mechem Naomi-i Ruth-ü heiyao heiyao pinnyü mü daihen mongshan temdaiteke shei nyingpa, pinnyüi pinnyü kü meheyao ne-eshuoh.

¹⁹ Hanangkü jijiphen Bethlehem mangngoi thahshi dai. Mechem jiji Bethlehem ngoijapa, hapa jila kü nyupüthü peüi baongeiyaüei etei, hatü nyühathüi, “Hapayü hingmei Naomi je?” shei etei.

²⁰ Pinnyüi jomphong kü, “Ngei kü hajük kü Naomi shei tenyükpha, shejao Mara shei nyükshih; mehenangkü Jeiyong Kahvangi ngelei yangnyu shahyaki leitükpeih.

²¹ Ngei hatoueipü maei kotü daipeih, shejao Shembüpai ngei kong mü nyokei leishihpeih; Shembüpai ngei kü hajük nemei-i dükjü, hatü Jeiyong Kahvangi ngei hajük lomohhüjü mehekei ngei kü Naomi shei nyükphünya?” shei eteke.

²² Hanangkü Naomi-i Moab am yiükha Ruth müei Moab kahdok leipü nyokei lei. Jiji barley hah vetei pangpü hepak kü Bethlehem ngoiteke.