ROM SHAHSHA APPÜ 8 - DAÜLANGPÜ LAIHING (BSI)

Laangha kü Yangnyu

¹ Hanangkü shaang Khrista Jisu kü nyupüthü shingvaishi nyonghüpü neshiü.

² Mehenangkü mang hatü dipü shahkungnyü kübü Khrista Jisu kü yangnyu Laangha shahkungi jen bümei leihüteke.

³ Mehenangkü phai-i wong nekohhüpü nangkü mepa shahkungnyüi nedükaok, ha Kahvangi laophülei Ha mang phai keiha leihütü mang mahtükhen shompai phai kü büpai mang nyonghüteke.

⁴ Hanangkü phai aimü kampüthü nevai, shejao Laangha kü kampüthüi shahkungnyüi yüpü jen kü jiühüteke.

⁵ Mehenangkü phai kü nyupüthüi phai douthü kü mong shuohnyeih, shejao üami Laangha kü nyu, hathüi Laangha douthü kü mong shuohnyeih.

⁶ Phai kü mong shuohpeyü dipü, shejao Laangha kü mong shuohpeyü yangnyu hatü chingmei.

⁷ Ha vaipü nangkü phai kü mong shuohpeyü Kahvangei vepa; hapai Kahvangei shahkung ven nebangnyu– hingmei büpai nebangaokhen,

⁸ hatü üami phai kü nyu, Kahvang mong hahhühen neaok.

⁹ Shejao amphongü phai kü nenyu; Kahvang Laangha am kü nyupü nangkü amphongü Laangha kü nyüke. Üpa kü Khrista Laangha nenyu, büpayü Khristalei nevai.

¹⁰ Shejao Khrista nüng kü nyujema, mang nangkü büm didaijao daülangshemshepü nangkü laanghayü yemmü nyüke.

¹¹ Dipü kübü Jisu yangei leishihpü büpalei Laangha am kü nyujema, Khrista dipü kübü yangei leishihpü büpai am kü nyupü büpalei Laangha homei ammei phai yangnyu kü yangnyuyem shuohhen.

¹² Shejema, jeihinaü hatü nyahinaüthü, phai-i mongpü kü nyuhen mü jenphongü phai kü hang koshi neshiüpih.

¹³ Mehenangkü amphong phai-i mongpükei nyujema, am dihen, shejao ammi Laanghai büm douthü jütükjema, am yemmü nyuhen.

¹⁴ Mehenangkü Kahvang Laanghai müpüthü peü Kahvangei hapeüthü nyüke.

¹⁵ Mehenangkü amphongi nyipabü nyemhen aa laangha neyah, shejao ungei yahpü laangha yahpeih. Mechem jeni, “Abba! Opa!” shei lenhen,

¹⁶ hapa Laanghai jenei laangha mü jenü Kahvangei hapeüthü shei denpü shuohnyüke,

¹⁷ hatü hapeüthü vaijema, shejema mükjüp yahpü am, Kahvangei mükjüp hatü Khrista mü chemi mükjüp yahpü am leinyüke– ha vaipü nangkü jenao büpa mü müknyinshekhanghen shingvaishi jeni büpa mü hanghinyüke.

Ngoikahen Müknyinshekhang

¹⁸ Shaangpü hepak kü hanghipeyü jen touei shakei vamkahen nyupü müknyinshekhang mü shetteihen shangei neshiüpih shei ngei deihnyeih.

¹⁹ Mehenangkü lingpü douthüi Kahvangei hathü shakei vampü ongyangei dannyüke;

²⁰ mehenangkü lingpü douthü peü laophüi mongpü kü nevai, shejao Kahvangi hapakei nyuhen mongpü nangkü yahlak neshiüi leihüteke,

²¹ shejao nyih hük lingpü douthü shedailaidaiheni shapü kübü bümei leihen, hatü Kahvang hathülei müknyinshekhang bümei hean danghen monglem nyüke.

²² Shaang thahshi lingpü douthü kemei hapeü angshingkü tüngei vaüpükei nyüke shei jeni nyingnyüke;

²³ hatü lingpü douthü mon nevai, shejao üami shongpü Laangha betjükthü angpa, jenao hapeü kei ungei yahhen, hatü jenei büm angei leihen shingvaishi mongei vaüei-eeyei dannyüke.

²⁴ Mehenangkü hapa monglem kü jenphong yangpeih. Shaang eepü monglemü monglem nevai. Mehe eenya ha kü monglempü üpaang?

²⁵ Shejao mehe jeni ne-ee, ha kü jeni monglemjema, jeni ha nenteiaokpai dannyeih.

²⁶ Hapa keiha jen wong nekohpü kü Laanghai jen kü sheühnyeih; jeni mepakei jiüshi phophen jeni nenyingnyu, shejao hapa Laanghai shah mü ngaiyei ne-eaoki chüloh-i hümei jen shing phopnyüke,

²⁷ hatü Kahvang, üpai mongdang yemnya, büpai Laanghalei mong mehe ha nyingnyüke; mehenangkü Kahvangi mongpü keiha hapa Laanghai daülangpüthü shingvaishi phopnyüke.

²⁸ Mehenangkü üami Kahvang kü bam, hatü büpalei mükhong aimü nyük, hathü shingvaishi dou peü mei shingvaishi chemi düknyeih shei jeni nyingnyüke.

²⁹ Mehenangkü üam büpai yeihshi mebü nyingei nyu, hathü shao büpai laophülei Halei deiaei anshi leihen jelangpeih; shejüang büpa shemong longpü kü hashongpa leihen.

³⁰ hatü üam büpai jelang, hathü büpai nyüklang; hatü üam büpai nyüklang, büpai hathü dahshakhü; hatü üam büpai dahshakhü, büpai hathüao müknyinshekhanghüteke.

Khrista Jisu kü Kahvangi Bampü

³¹ Shejema hathü nangkü jeni mehe ehenang? Kahvang jen shing nyujema, jen khühen üpa nyüpa?

³² Büpa, üpai laophülei Ha shümei netuh, shejao jen peü shingvaishi büpa lanei shuoh, büpai büpa mü jen kü lemphüli neyahphahen je?

³³ Kahvangi jelangpü khüei üpai thaüvaüaokhen? Hapayü Kahvangi dahshakhüpeih.

³⁴ Üpa nyonghühen? Üpa di, hih, yangei lei, üpa Kahvangei lakdah philei uotü jen shing phopnya, hapayü Khrista Jisu khih.

³⁵ Khristai bampü kübü üpai jen yantükhen? Hapayü ponghahpü nevaijü shangpong, nevaijü shüveidoidei, nevaijü shaühile, nevaijü bümkong nyupai, nevaijü vongshüh nevaijü vehoki hiang?

³⁶ Ha nyangei nyüke: “Nüngei men kü hami helushoei dipü ponghah; hamphong keyü jütükhen mi kü kei nonyüke.”

³⁷ Nevai, hathü dou peü kü jen kü bampü büpa homei jenü aokpü dangpü mao nyeipeih.

³⁸ Mehenangkü dipai vaijao, yangnyu vaijao, vangsho phongshan vaijao, vanglem lembüthü vaijao, shaang nyupü douthü vaijao, ngoikahen douthü vaijao, nganthü vaijao,

³⁹ shaopü vaijao, chüpü vaijao, lingpü douthü kü mehe vaihen vaijao mepaiyao Khrista Jisu, jenei Shembüpa kü Kahvang bampü kübü jen yantükhen neaokpih shei ngei mongkü pongnyüke.