ROM SHAHSHA APPÜ 7 - DAÜLANGPÜ LAIHING (BSI)

Shem Yempü Homei Lappü Hük

¹ Jeihinaü hatü nyahinaüthü, ngei shahkungnyü nyingpüthü kü enyeih– shahkungnyü-ü shennyak hük yangnyu nyuyang kü mon shashi nyüpeih shei nenyingnyu je?

² Hapa keiha shem yempü nyüha hük pinnyü yemmü nyupü thahshi mon shahkungnyüi chepaha mü shashi nyüke; shejao chepaha didaijema, chepaha nangkü pinnyü-ü shahkungnyü kübü laidaiteke.

³ Hapa keiha chepaha yemmü tuhtü pinnyüi lebü baha mü nyujema, pinnyü kü jiüshangi mükbongjuyungla shei nyükhen. Shejao chepaha didaijema, pinnyü hapa shahkungi shapü kübü laidai, hatü pinnyüi lebü baha mü shem yemjema pinnyü-ü mükbongjuyungla nevai.

⁴ Ha aimü ngelei küphüthü, shahkungnyü nang keyü Khristalei büm homei amphong didaishuohteke; mehenangkü amphongü Khristalei büm kü phaihan hük nyüke, hatü jen Kahvang shingvaishi betjük jükhen nangkü amphong lebü hük, dipü kübü yangei leipübalei lompü nyüke.

⁵ Mechem jen phai kü nyupa, shahkung homei vamhüpü jenei mangi yahhahhüpai dihen shingvaishi betjük jükhühen nangkü jenei phaihan kü dou dükei nyuteke.

⁶ Shejao shaang jenphongü shahkungnyü kübü bümei leidaiteke; chem jen yepei küppü khoklat kü didaishuohteke; hanangkü nyangei nyupü shahkungnyü chang phangkü jen aa nevai, shejao Laangha yangnyu jalei aa vaihen.

Shahkungnyü hatü Mang

⁷ Shejema jeni mehe ehen? Shahkungnyü mang je? Lanshei nevai! Shahkungnyü nenyulangmeyü mangü meheshang ngei nenyinghah shepeih. Shahkungnyüi paoh, “Nüngi mük tehüh” shei ne-elang meyü mükhühpeyü meheang nenyinghah shepeih.

⁸ Shejao mangi hapa shahkungnyü noteihen laphen dangei ngei kü mükhühpü lemphü vamhüpeih. Shahkung neshiüi mangü mahngchang.

⁹ Ngei chem shahkungnyü neshiüi yemmü nyupeih, shejao mechem shahkungnyü peipa, mang jatongpeih,

¹⁰ hatü ngei di, hatü hapa yangnyu lahpü aihük shahkungnyüi ngei kü dipü koei pei.

¹¹ Mehenangkü mangi shahkungnyü noteihen laphen dangei ngei luhahpeih hatü ha homei ngei jütükpeih.

¹² Hanangkü shahkungnyü-ü daülangpü hatü shahkungü daülangpü, hingshangpü hatü meipü nyüke.

¹³ Shejema mehe mei, hapai ngei kü dipü koei peipü je? Lanshei nevai! Mangü mang shei huhen shingvaishi hatü shahkungnyü homei mangü shethen neaoki nyeinya mang leihühen shingvaishi mehe mei ha homei mangi ngei kü dipü koei peipeih.

Mongei Khüteipü

¹⁴ Mehenangkü shahkungnyü-ü laangha shei jeni nying; shejao ngei payü mang kü aa vaishi yutükpü phai shennyak.

¹⁵ Ngei ngelei dou nyingei neaoknyu. Mehenangkü ngei mehe dükhü, ha nedüknyu, shejao ngei jiühitpü douang düknyüke.

¹⁶ Shaang ngei mehe dou nedükhü, ha dou ngei dükjema, shahkungnyü-ü meipü khih shei ngei enyeih.

¹⁷ Shejao hingmei mü ha dükpeyü ngei nevai shejao ngei kü nyupü mangi dükhünyeih.

¹⁸ Mehenangkü ngei kü, lappai ngelei phai kü mei meheyao nenyu shei ngei nyingnyüke. Mehe mei ha ngei kü dükhüpü nyüpeih, shejao ngei ha dükei neaoknyu.

¹⁹ Mehenangkü ngei dükhüpü mei ngei nedüknyu, shejao ngei nedükhüpü mang ngei düknyüke.

²⁰ Shaang, ngei mehe nedükhü ha ngei dükjema, hayü ngei düknyu nevai, shejao ngei kü nyupü mangi dükhünyeih.

²¹ Hanangkü ngei hapa shahkungi dou dükpü eeteke: Mechem ngei mehe mei, ha dükhünya, mang ngei yopailei nyüke.

²² Mehenangkü ngelei mong mongpalei ngei Kahvangei shahkung kü mongmeinyeih,

²³ shejao ngelei büm kü lebü shahkung hüki ngelei mong kübü shahkung mü hokei ngelei büm kü nyupü mang shahkung kü ngei yepei küptükpü ngei eenyüke.

²⁴ Ngei meshük mongshangpü shennyakang! Hapa dipü büm kübü üpai ngei yangphahen?

²⁵ Jenei Shembüpa, Jisu Khrista homei Kahvang kü menvih shuohtuh! Hanangkü ngelei mongkü ngeiyü Kahvangei shahkung kü aa, shejao ngelei bümü mangei shahkungei aa nyüke.