ROM SHAHSHA APPÜ 6 - DAÜLANGPÜ LAIHING (BSI)

Khrista mü Dipü hatü Yangei Leipü

¹ Shejema jenphongi mehe ehen? Phahji nyeinya dahühen shingvaishi jen mang kü nedoh-i nyuhen je?

² Lanshei nevai! Mekei etü jeni mang kü didaishuoh pheikü jeni ha kü nedoh-i nyuei daihen?

³ Jen üami Khrista Jisu kü baptük, büpa dipü kü baptükpeih shei ammi nenyingnyu je?

⁴ Hanangkü dipü kü baptükpai jen büpa mü mahng vüteke; shejüang Pa müknyinshekhangi Khrista dipü kübü yangei leishihpü keiha jenphongao yangnyu ja kü kamhen.

⁵ Hanangkü büpa dipükei dipü kü jeni büpa mü mongjemjema, hingmei büpa yangei leipükei yangei leipü kü büpa mü jen mongjemhen.

⁶ Hapa mang büm mangtükhen hatü hajük kü jen mangei aa nevaihen shingvaishi jenei yangnyu chang büpa mü shophang kü aptükteke shei jeni nyingnyüke.

⁷ Mehenangkü üam ditepa mang kübü bümei leidaiteke.

⁸ Shejao jen Khrista mü diphei vaijema, jenao büpa mü chemi nyuhen shei hinglemnyüke.

⁹ Khrista dipü kübü yangei leipü nangkü mechemao sheyü jen nedihen shei jeni nying; hajük kü dipai büpa shak kü vanglem nelemhen.

¹⁰ Büpa dipeyü denshing chem mon mang kü didaishuohpeih; shejao büpai yangnyu nyupeyü Kahvang kü nyunyeih.

¹¹ Hanangkü ammiyao mang kü didaishuohpeih hatü Khrista Jisu kü Kahvang kü yemmü nyüpeih shei deihhen vongbong.

¹² Hanangkü ammi mangi yahhüpü ven banghen mü mangi ammei didaihen büm kü vanglem telemhü.

¹³ Mangei douhinang vaiyei mang thahhen mü hajük kü ammei phaihan teshuoh, shejao dipü kübü yangei leipü keiha laophü nyingi Kahvang kü shuohtuh, hatü nüngei phaihan Kahvang kü daülangshemshepü douhinang kei shuohtuh.

¹⁴ Ammü shahkungnyü phangkü nevai, shejao phahji phangkü nyupü nangkü mangi am shak kü vanglem nelemhen.

Daülangshemshepü Aa

¹⁵ Shejema mehe? Jen shahkungnyü phangkü nevai, phahji phangkü nyupü nangkü jen mang thahhen je? Lanshei nevai!

¹⁶ Ammi laophü nyingi henyi hük kü ven danpü aa shei lanei shuohjema, dipülei müpü mang, nevaijü daülangshemshepülei müpü ven danpülei aa shei ammi nenyingnyu je?

¹⁷ Shejao Kahvang men vihtuh, mehenangkü am chemü mangei aa vaishi nyujao am kü shuohpü nyuhpüvenpü kü mong kempai ven bangteke,

¹⁸ hatü am mang kübü bümei leiyei daülangshemshepülei aa leiteke.

¹⁹ Ammei nyingnyoi yangnyu wong nekohpü nangkü ngei hangkulei shah-e vanglem aimü enyeih. Mehenangkü chem hepak kü ammi ammei phaihan nedaünelangpü hatü longpüba mangei aa vaihen shingvaishi shuohpükei shaang daülangshemshepülei aa vaihen nangkü daütükhen shingvaishi ammei phaihan shuohtuh.

²⁰ Mechem am mangei aa nyuhampa, amphong daülangshemshepü kübü yandaitü nyuhampeih.

²¹ Shejema ammi shaang veüei deihpü dou dükei nyushingkü ammi mehe nanglei dangpa? Hathü douei dohpütenpeyü dipü nyüke.

²² Shejao shaang amphong mang kübü bümei leiyei Kahvangei aa leiteke, hatü hapalei nanglei ammi dangpeyü daühüpü hatü ha kübü vampeyü yangnyuyem nyüke.

²³ Mehenangkü mangei latü dipü, shejao ang kübü Kahvang thintho-ü Khrista Jisu jenei Shembüpa kü yangnyu nyüke.