ROM SHAHSHA APPÜ 3 - DAÜLANGPÜ LAIHING (BSI)

¹ Shejema Jehoda am hük vaipü nangkü mehe vangmei nyüpa nevaijü japtükpü kü mehe nanglei nyüpa?

² Lem peü kü longi nyüpeih! Shongpüba kü jom kü Kahvangei shah shuohpeih.

³ Jom hanei am hingnelemjao mehe shepa? Jom hingnelempai shahhing Kahvang wong nekoh-i leihüaokhen je?

⁴ Hapakei nevai! Shennyak peü shahshem epüthü; Kahvangü shahhing. Hapakei nyangei nyüke: “Hanangkü mechem nüngi shah ehen, nüng jiüpeih shei huteke, hatü nüng shahphen shingkü dahshakteke.”

⁵ Shejao jen nedaünelangpai Kahvang nyeinya daülangshemshepü huaokjema, jeni mehe ehenang? Kahvangi jen kü hanghi shuohpeyü nejiü shei eaokhen je? (Ngei hayü hangkulei shahlem aimü enyeih.)

⁶ Mechemao hapakei nevai! Kahvangü shahhing nevaijema, mekei etü büpai kahdoknyülei shahphenaokhen?

⁷ “Shejao ngei shahshem epai Kahvangü shahhing shei büpalei müknyinshekhang nyeinya longhüjema, mehekei ngei kü shaang thahshi mang shennyak shei nyonghünya?” shei hanei ami shah dakteihen aok.

⁸ “Shejema mei vamhen shingvaishi jeni ten dükshah” shei mehekei ne-enya? (Hanei ami hami ha epeih shei vüshih-ei eteke.) Jomphongü nyonghühen shangteke!

Üpaao Daülangpü Neshiü

⁹ Shejema mehe? Jenphongü mih mü meipü je? Lanshei nevai! Jehoda hatü Kung am nyiphen aihük mü mangei ngan phangkü nyüke shei jen peü kü huteke.

¹⁰ Hapa nyangei nyüke: “Daülangpü üpaao neshiü, hükao neshiü;

¹¹ danaokpü üpaao neshiü, Kahvang yempü üpaao neshiü.

¹² Peü lemnyong kü lüdaiteke, jom chemi yahlak neshiüi leidaiteke; bampü hupü hükao neshiü, hükao neshiü.”

¹³ “Jomei shah-ü apshi nyupü mahngchong; jomei yeijaangi lueilemnyüke.” “Biüei leü jomei ju kü nyüke.”

¹⁴ “Jomei ju kü thaüvaü, hatü shahyakpai maei nyüke.

¹⁵ Iy yenhühen jomei la shülangi moknyüke;

¹⁶ jomei lemthü kü benpülangpü, hatü mongmang nyüke,

¹⁷ hatü chingmei lem jomi nenyingnyu.”

¹⁸ “Jomei müksho kü Kahvang nyempü neshiü.”

¹⁹ Shahkungnyüi mehe enya, hayü shahkung phangkü nyupüthü kü enyeih shei jeni nyingnyüke, shejüang peüei ju nentükhen, hatü kahdoknyü kempü Kahvang touei shahphenhen.

²⁰ Mehenangkü shahkungi epü douthü dükpai hangku üpaiyao büpa touei dahshakei neaokpih; mehenangkü shahkungnyü homei mang nyingpü peinyüpeih.

Hinglempü Homei Daülangshemshepü

²¹ Shejao shaang, shahkung mü lenei Kahvang daülangshemshepü shakei vamteke, hatü hayü shahkung hatü thihivamthüi denpü shuohnyüke.

²² Hapayü vaipüthü peü kü Jisu Khrista kü hinglempü homei peipü daülangshemshepü nyüke. Mehenangkü baong hanpü neshiü;

²³ mehenangkü peüi mang thahteke hatü Kahvang müknyinshekhang nengoinyu;

²⁴ shejao jomphong shaangü Khrista Jisu kü angei leipü homei büpalei phahji thinthoi jom dahshakhüteke.

²⁵ Kahvangi hapayü büpalei iy kü hinglempü homei mang tükhen shingvaishi jakpü moila hük keiha shuohpeih. Büpai hapayü büpa daülangshemshepü huhen shingvaishi dükpeih; mehenangkü Kahvangi laophü nenteiaokpai shelei thahpü mangthü kü hanghi neshuoh.

²⁶ Büpai hayü shaangpü hepak kü büpayü daülangshemshepü hatü üpai Jisu kü hinglem büpai dahshakhünyeih shei huhen shingvaishi ha dükteke.

²⁷ Shejema changmeihen melei nyüke? Ha neshiüpih! Mepa shahkungi? Shahkungnyü dükpai je? Nevai, shejao hinglempü shahkungnyü homei.

²⁸ Mehenangkü shahkungnyüi shuohpü douthü ne-omi shennyak hük hinglempai dahshaknyeih shei hami enyüpeih.

²⁹ Kahvangü Jehoda amei monha Kahvang je? Büpayü Kung ameiyao Kahvang nevaipü je? Hih, Kung ameiyao nyüke.

³⁰ Kahvang hük mon vaipü nangkü büpai japtükpüthü hinglempai hatü nejaptükpüthü hapa aihük hinglempai dahshakhühen.

³¹ Shejema jeni hinglempai hapa shahkungnyü yaktükhen je? Lanshei nevai! Shelangmao jeni ha shahkung nonyüpeih.