ROM SHAHSHA APPÜ 14 - DAÜLANGPÜ LAIHING (BSI)

Nüngi Mih kü Shahtephen

¹ Vaipü kü wong nekohpüthü mongongshi yahtuh, shejao büpalei mongdeih nangkü shah tedaktei.

² Hanei ami vaipeyü lemphü hahhen nejü-ünyih, shejao hanei ami vaipü kü wong nekohpai haohilai mon hahnyüpeih.

³ Lemphü hahpü shennyaki nehahpüba kü naamei tedeih, hatü nehahpübai lemphü hahpü shennyak nenyonghühen vongbong; mehenangkü Kahvangi büpa yahnyüpeih.

⁴ Hanei amei chongphobü kü shahphenhen nüng üpaang? Jomei shembü touei jom yaonghen nevaijü dohen. Büpa yaonghen, mehenangkü Shembüpai büpa yaonghüaokhen.

⁵ Hanei ami nyih hanei meyü nyih hanei shongnyü kei deihnyeih, shejao hanei ami nyihthü peü aihük kei deihnyeih. Peüi laophü laophülei mongei deihpü kü mongkü pongei nyutuh.

⁶ Üami nyih hük kü hayaoha dhüm shuohnya, Shembüpa kü dhüm shuoh-ei yahtuh; shao üami hahnya, Shembüpa kü dhüm shuoh-ei hahtuh; mehenangkü jomi Kahvang kü dhüm shuohnyüke; üami nehahnya, Shembüpa kü dhüm shuohpai tehah, hatü Kahvang kü menvih shuohtuh.

⁷ Jen nyingi jen shing nenyunyih, hatü jen nyingi jen shing nedinyih.

⁸ Jen yem nyujema, jeni Shembüpa kü nyunyeih, hatü jen didaijema, jeni Shembüpa kü dinyeih; shejema jen yemmü nyujao, dijao jenü Shembüpalei.

⁹ Ha tata kü büpayü dipü hatü yemmü nyupü nyiphenei Shembüpa vaihen shingvaishi Khrista di hatü yangei leipeih.

¹⁰ Mehekei nüngi laophülei nyahinaü hatü jeihinaü kü shahphen shuohnya? Nevaijü mehekei nüngi laophülei jeihinaü nevaijü nyahinaü kü ne-ienelemnya? Mehenangkü jen peü Kahvangei shahphenpü uoshing touei yaonghen.

¹¹ Hapa nyangei nyüke: “Ngeiyü hingmei mü yemmü nyupü Kahvang shei Shembüpai enyüke. Peüi ngei touei lashüh-i shüngei aümei shahen; yei peüi Kahvang lahhen.”

¹² Hanangkü jen peüi laophü laophülei nang Kahvang kü shah-om shuohhen.

Nüngi Mih Huluh Teshuohhü

¹³ Hanangkü jen hüki hükei shah nephenshah, shejao ha nang jeiyei mih-ei lem kü huluh yaong nehaühen nevaijü lem nebangteihen deihshah.

¹⁴ Shembüpa Jisu Khrista kü nedaüpü menüngao neshiü shei ngei nyingnyüke hatü mongkü pongnyüke; shejao hayü nedaüpeih shei deihpüthü keyü nedaüpü vainyüke.

¹⁵ Nüngi hahpai jeihinaü hatü nyahinaü huluh shuohhüjema, nüngü hajük kü bampü kü nekamnyu. Nüngi hahpai jeihinaü hanei üam shing Khrista di, jom telomohhü.

¹⁶ Nüngi mei shei deihpü kü ten kei te-ehü.

¹⁷ Mehenangkü vangsho ongchingü hahbenüng hatü yingbenüng nevai, shejao daülangshemshepü, chingmei hatü Laangha Daülangpü kü mongongpü nyüke;

¹⁸ mehenangkü üpai hapakei Khrista chongphonya, büpai Kahvang mong hahhünyeih hatü shennyaki meiangke shei yahnyeih.

¹⁹ Shejema mepai chingmeivangmei vamhünya, hatü hüki hük lingei leinya ha kü jeni changshah.

²⁰ Hahying nangkü nüngi Kahvangei dou temangtük. Lemphüli daülangpü nyüke, shejao nüngi hahpai mih huluh shuohhüpeyü nejiü.

²¹ Nüngei jeihinaü hatü nyahinaü huluh shuohhü leimeyü phai nehahpü nevaijü yiü neyingpü nevaijü meheyao nedükpü meipüba.

²² Nüngi hathü dou nangkü mepa kü hinglem hayü Kahvang anji aa kü mon tuhtuh. Laophüi jiüpeih shei deihpü kü laophü nyingi nenyonghüpüthü moihiman.

²³ Shejao laophüi hahpü kü jü-üpüthü nyongtükteke, mehenangkü jomi hinglempai ha nehah; mehenangkü mepa mepa hinglempü kübü nevam hayü mang.