ROM SHAHSHA APPÜ 13 - DAÜLANGPÜ LAIHING (BSI)

Vanglem Lembüthü kü Dükhen Dou

¹ Peüi vanglem lembüthü phangkü shütuh; mehenangkü Kahvang leipü nevaipheikü vanglem lembü neshiü, hatü shaang nyupü vanglem lembüthüyü Kahvangi lingpeih.

² Hanangkü üami vanglem lembüthü yaktüknya, Kahvangi jetükpü yaktüknyeih, hatü ha yaktükpüthü shahphenpü danghen.

³ Mehenangkü vanglem lembüthüyü mei dükpü am kü nyem shaopü am nevai, shejao ten dükpü am shing nyüke. Nüngi vanglem lempü am kü nenyemi nyuhünyu hiang? Shejema mehe mei ha düktuh, hatü nüngi jom leipü mong hahpü danghen.

⁴ Mehenangkü büpayü am meihen shingvaishi Kahvang chongphobü nyüke. Shejao ammi nejiüpü dükjema, ammi nyemtuh; mehenangkü vanglem lempü ami angsha kü yanlu nenonyih. Nejiüpü dükpü am kü mongshih vamei hanghi shuohhen Kahvangei chongphobü nyüke.

⁵ Hanangkü hanghi danghen vaipü nangkü phangkü shühen nevai, shejao jiüpü nejiüpü nyingpü kon homeiyao düktuh.

⁶ Ha vaipü nangkü ammiyao lat shuohnyüke; mehenangkü vanglem lembüthüyü Kahvangei chongphobüthü; ha dou shingvaishi nang nekongi dou düknyüke.

⁷ Mih kü hang shuohhen nyupü peü kü ha shuohtüktuh; lat shuohhen am kü lat, douhinang lat shuohhen am kü hapa lat, hatü dhüm shuohhen am kü dhüm shuohtuh.

Hüki Hük mü Bamteituh

⁸ Hüki hük mü bamteihen mü lenei üpa kao meheyao hang sheshi tenyu; mehenangkü üpai mih kü bam shahkungnyü jiühüteke.

⁹ “Nüngi mükbongjuyung tedük; nüngi tejü; nüngi tegüh; nüngi mük tehüh” shei epü shahkungnyüthü hatü lebü shahkung kemei, “Nüngi laophülei chingyowpa kü laophü kü kei bamtuh” shei epü shahkung kü peü kohshi nyüke.

¹⁰ Bampai chingyowpa hük kü nemei-i nedüknyih; hanangkü bampeyü shahkungnyü jiühüpü nyüke.

¹¹ Ha mü lenei ha mehe ammi nyingtuh; shaangü am shipü kübü paohen hepak khih. Mehenangkü jeni shongei vaipü meyü shaangüng yemleipü yopüba nyüke.

¹² Vangnyak luangi daiteke; vangngai yopailei nyüke. Shejema jeni vangnyak douthü tuhphongshah, hatü vangngai ow owshah;

¹³ jeni vangngai kü keiha deiaei meipü kü nyushah; hahngayungpe hatü nükchokyiümok nevai; mükbongjuyung hatü phai mongongmongle nevai; dehilao hatü mükhakmongyung nevai.

¹⁴ Ha nang jeipü Shembüpa Jisu Khrista owtuh; phai-i yahhüpü hüshemhühen phai kü shing teshuoh.