ROM SHAHSHA APPÜ 11 - DAÜLANGPÜ LAIHING (BSI)

Israel amü Den Shing Yaktükpü Nevai

¹ Shejema ngei pheshah, Kahvangi laophülei nanglak yaktükpü je? Lanshei nevai! Ngeiyao Israel am, Abraham kübü li, Benjamin phang kübü nanglak hük.

² Büpai yeihshi nyingei nyupü laophülei nanglak Kahvangi neyaktükangpih. Laihingi Elijah nang mehe e, mekei büpai Israel am khüei Kahvang kü phoppa, ammi nyingla?

³ “Shembüpa, jomi nüngei thibüthü jütük, jomi nüngei moidüthü bentük; sheyü ngei monha aoteke, hatü jomi ngei jühen yemnyüke.”

⁴ Shejao Kahvangi büpa kü mehe shahnyok shuohpa? “Ngei laophü shing Baal kahvang kü aümei nekhümpü shennyak haja nyet tuh-ei nyüpeih.”

⁵ Hanangkü shaangao phahjipai jelangpü aopüthü nyüpeih.

⁶ Shejao hapayü phahji homei vaijema, hapayü mechemao dou homei nevai, hei nevaijema phahjiyü hajük kü phahji nevaikahen.

⁷ Shejema meheang? Israel ami mehe yem, ha nedangang. Jelangpüthüi ha dangteke, shejao aopüthü mong vaanteke.

⁸ Hapa nyangei nyüke: “Kahvangi jomphong kü vaükpü laangha, ne-eehen mük, nedanhen dhaong shinnyih thahshi shuohtük.”

⁹ Hatü Davidi enyüke: “Jomei nükdü jom shing hühhihang, hatü tai, huluh yaong hatü hanghi leihütük;

¹⁰ Jomi ne-eeaokhen mü jomei mük shangmang leitüktuh, hatü düngei jomei dok kü shanghah-i chetshi angtuh.”

Kung am Yemleipü

¹¹ Hanangkü ngei pheshah, jom nepao-aoki dohen mü jom huluh shuohpü je? Lanshei nevai! Shejao Israel ami mükhühhühen shingvaishi jom huluh shuohpai Kung am touei yemleipü peipeih.

¹² Shejao jom huluh shuohpai kahdoknyü shingvaishi moihiman vaijema, hatü jom lomohpai Kung am shing moihiman vaijema, jom peü omjü meshük longpü moihiman vaihen!

¹³ Shaang ngei am Kung am kü enyeih. Ngei Kung amei phongshan vaipü nangkü ngei ngelei chongphopü dousho müknyinshekhangnyeih;

¹⁴ hapayü ngelei nanglaki mükhühhühen hatü jom hanei dangkao yanghen.

¹⁵ Jom yaktükpai kahdoknyü mongjemhüpü vaijema, jom yahpeyü dipü kübü yangnyuyem nyuhen.

¹⁶ Shongpü hahying kübü aan moila daülangpü vaijema, aopü aan kemei daülangpü nyüke; hatü tünglang daülangpü vaijema kaothüao daülangi nyüke.

¹⁷ Shejao olive pükao hanei bhagei yaktüktü nüng, olive nganyü kao dakei hapa olive pü tünglang kübü aongpü hahying hahhen hapteke.

¹⁸ Bhagtükpü kaothü nangkü am techangmei. Am changmeijema, tünglang kü sheühpeyü am nevai, shejao tünglangi am kü sheühpeih shei deihtuh.

¹⁹ “Ngei yah-ei haphen shingvaishi kaothü bhagtükpeih” shei ammi ehen.

²⁰ Ha jiüphei. Jomphongü hingnelempü nangkü bhagtükpeih, shejao ammü hinglempai mon yaongnyüpeih. Hanangkü am changmeiyei telei, shejao nyempai nyutuh.

²¹ Mehenangkü Kahvangi nyingnyoi kaothü dangkao yangei netuhjema, hingnelem pheikü büpai am neyangphapih.

²² Shejema Kahvang bampü hatü mongshihpü nyingtuh: dopüthü touei mongshihpü, shejao ammi büpa bampü kü nedoh-i nyujema Kahvang bampü am touei nyüke; hei nevaijema amao bhagtükhen.

²³ Hatü jom Israel amao hingnelempü kü nenyujema jom hapei leihühen; mehenangkü Kahvangi jom shao haphühen aokshi nyüpeih.

²⁴ Mehenangkü am nyingnyoi kü nenyupü olive nganyü kao dakei nyingnyoi kü nejiüi nyingnyoi kü nyudaipü sheipü olive pü kü hapaokjema, meshük nyeishi laophülei olive pü kü nyingnyoi kaothü leiyei hap-aokhenang!

Israel am Peü Yanghen

²⁵ Hanangkü jeihinaü hatü nyahinaüthü, am meheshang, ha mü lenei am nahpeih shei nechangmeihen shingvaishi ammi hapa shahjo nenyingi nyemtenyu shei ngei deihnyüke. Israel am hanei kü mong vaanhen peipeyü denshing nevai, shejao Kung am peü mangpei thahshi mon.

²⁶ Hapakei Israel am peü yanghen; hapa nyangei nyüke: “Zion kübü Yemleipüba peikahen; büpai Jakob kübü mangthü peü yaktükhen.”

²⁷ Mechem ngei jomei mang yah-ei lüdaihen, hapayü ngei jom mü vangteishuwteipü vaihen.

²⁸ Shahjangmei nangkü ammei men kü jomphongü Kahvangei vepathü, shejao jepü philei jomü chebü chepalei men kü bampüthü;

²⁹ mehenangkü Kahvangei thintho hatü büpai nyükpü yahlangnüng neaok.

³⁰ Chem amphongao Kahvangei ven nedani nyu, shejao jom ven nedanpü nangkü shaang ammi phahji dangpeih,

³¹ hapa keiha ammi dangpü phahji jomiyao shaang danghen shingvaishi jom shaang ven nedani nyüke.

³² Mehenangkü büpai peü kü phahjihen shingvaishi Kahvangi ven nedanpü peü khoklat kü küptükteke.

Kahvangei Kihikon

³³ Oh Kahvangei mop meshük longpa! Büpalei kihikon hatü nyingpühingpü meshük chüpa! Büpa shahphenpü mekei yemei neaokbenüng, hatü büpalei lemthü mekei neyaobenüngang!

³⁴ “Mehenangkü üpai Shembüpalei mong nyingpa? Nevaijü büpalei nyuhbü üpa nyuhampa?

³⁵ Nevaijü laklei nyokei danghen mü üpai büpa kü thintho shuohpa?”

³⁶ Mehenangkü douthü peü büpa leipü hatü büpa homei hatü büpa kü nyüpeih. Büpa kü düngei müknyinshekhang vaituh. Amen.