ROM SHAHSHA APPÜ 10 - DAÜLANGPÜ LAIHING (BSI)

¹ Jeihinaü hatü nyahinaüthü, ngelei mongi lümpü, hatü ngei jom shingvaishi Kahvang kü phoppeyü jom yemleihen shingvaishi phopnyüpeih.

² Jom kü Kahvang shing nyakpükenpü nyüke shei ngei denpü shuohaoknyeih, shejao jomi jiüshangpü nyingei neshiü.

³ Mehenangkü Kahvang leipü peipü daülangshemshepü nenyingi laophülei daülangshemshepü linghen yempü nangkü jomi Kahvangei daülangshemshepü neyahnyu.

⁴ Üami hinglem, peüi daülangshemshepü danghen shingvaishi Khristayü shahkung dohpü nyüke.

Yemleipeyü Peü Shingvaishi

⁵ Mosai shahkung leipü peipü daülangshemshepü nang nyangshingkü hapakei enyüke: “Üpai hathü dükhenshang hathü homei yangnyu nyuhen.”

⁶ Shejao hinglempü leipü peipü daülangshemshepai enyüke, “Ammei mongei, ‘Vangsholei üpa aonghen?’ shei te-e” (lappai, Khrista müei yiükahen),

⁷ “nevaijü, ‘Kahdoknyü mongpalei üpa shühen?’ shei te-e” (lappai, Khrista dipü kübü müei ngaihen).

⁸ Shejao hapai mehe enya? “Hapa shah-ü am yopailei, ammei ju hatü ammei mongdangei nyüke” (lappai, hami baongpü hinglempü shah);

⁹ mehenangkü ammei jui Jisu-ü Shembüpa shei lahjema hatü Kahvangi büpa dipü kübü yangei leishihpeih shei ammei mongi hinglemjema, am yanghen.

¹⁰ Mehenangkü shennyaki mongdangi hinglempai dahshaknyeih, hatü jui lahpai yangnyeih.

¹¹ “Büpa kü hinglempü üpaao neveühüpih” shei Laihingi enyüke.

¹² Mehenangkü Jehoda hatü Greek am aa kü baong hanpü neshiü; hapa aihük Shembüpayü peüei Shembüpa, hatü büpa kü nyükpü peü kü moihimannyeih.

¹³ Mehenangkü, “Shembüpalei men kü nyükpü peü yanghen.”

¹⁴ Shejao jomi hingnelempü hük kü mekei etü jomi nyükhen? Hatü jomi nedanpü hük kü mekei etü jomi hinglemhen? Hatü hanei ami büpa jung baonghen neshiüshiüi mekei etü jomi danhen?

¹⁵ Ha nyangei nyüke: “Hatü jom neshom pheikü mekei etü jomi büpa jung baonghen? “Shahjangmei kopüthülei la mekei nethe meipüang!”

¹⁶ Shejao peüi payü shahjangmei nebangang; mehenangkü Isaiah-i enyüke, “Shembüpa, üpai hamei shahjangmei kü hinglempa?”

¹⁷ Hanangkü hinglempeyü danpü leipü peinyüpeih, hatü danpeyü Khristalei shah homei peinyüpeih.

¹⁸ Shejao ngei phenyeih: Jomi nedanangpü je? Hih, jomi danphei. “Jomei ngeü kahdoknyü peüei daiteke, hatü jomei shahthü kahdoknyü dohpü ngoiteke.”

¹⁹ Shao ngei pheshah: Israel ami ha nenyingpü je? Shongpü kü Mosai enyüke: “Ngei amphongü jat nevaipüthü hük kü mükhakhühen; ngadaipü jat hük kü ngei amphong mongshihhühen.”

²⁰ Isaiah-i monglongshi enyüke: “Ngei neyempüthüi ngei dangteke; Ngei jung nephepüthü kü ngei shakei vamei huteke.”

²¹ Shejao Israel am nangkü büpai enyüke, “Helushoei ngei ven nedanpü hatü nyongnyongpü nanglakthü kü ngelei lak haongpeih.”