ROM SHAHSHA APPÜ 1 - DAÜLANGPÜ LAIHING (BSI)

Selam Shah

¹ Paul, Khrista Jisu chongphobü, phongshan hük vaihen nyükpü hatü Kahvangei shahjangmei shingvaishi khaatei tuhpü,

² mepa büpai laophülei thibüthü homei daülangpü laihing kü yeihshi mebü lah-ei,

³ laophülei Ha, phai phikü David kübü phaakpü,

⁴ Jenei Shembüpa Jisu Khrista, üpa dipü kübü yangei leipü homei daülangpü laanghai büpayü ngan kohpü Kahvang Ha shei hutepa,

⁵ büpalei men kü Kung am peü hinglempai ven danpü touei mühen shingvaishi büpa homei jeni phahji hatü phongshan vaihen dangteke,

⁶ hatü amphongao Jisu Khristalei lompü vaihen nyükpü khongkü nyüke.

⁷ Kahvangi bampü hatü daülangpüthü vaihen nyüklangpü Romei nyupüthü peü touei: Jenei Pa Kahvang hatü Shembüpa Jisu Khrista leipü phahji hatü chingmei am mü nyute.

Menvih Shuoh-ei Phoppü

⁸ Shongpüba kü ngei am peü shingvaishi Jisu Khrista homei ngei ngelei Kahvang kü menvih shuohnyeih; mehenangkü am vaipü jung kahdoknyü peü lemei baongeiyaüei daiteke.

⁹ Düngei ngei phoppü kü nedoh-i am deihei dangpü ngelei denbüyü büpalei Ha jung shahjangmei chongvenpü ngelei laanghai chongphopü Kahvang nyüpeih.

¹⁰ Shompülei Kahvangi mongei ngei am touei peiaokhen shingvaishi phopshan ieyei kü omnyeih.

¹¹ Am wong kohhen nangkü ngei am mü laangha thintho hanei hanteihen ngei am mü ponghünyeih–

¹² ha lappai, am hatü ngei aa kü jen hüki hük hinglempü kü nangthongteihen.

¹³ Ngei lebü Kung am mü dükpü keiha ngei am khong kübüao hanei lepei leihen nangkü ngei am touei peihen deihteke, (shejao shaang thahshi ha bangtükteke); ha nyingtuh, jeihinaüthü hatü nyahinaüthü.

¹⁴ Ngeiyü Greek am hatü Greek am nevaipüthü, nahpülangpüthü hatü ngapathü touei hang kopü am kei leidaiteke.

¹⁵ Hanangkü am Romei nyupüthü kao hapa shahjangmei chongvenhen longi nyakeikenei deihnyeih.

Shahjangmei Ngan

¹⁶ Ngei shahjangmei nangkü veüei nedeihnyih; mehenangkü hinglempüthü peü yemleihen shingvaishi hapayü Kahvangei ngan, shongpüba kü Jehoda am, hatü Greek am shingvaishi.

¹⁷ Mehenangkü shahjang meipü kü Kahvang daülangshemshepü shakei vamteke; hapayü pangpü kübü dohpü ngoishi hinglempü homei daülangshemshepü; hapakei nyangei nyüke: “Daülangpüthü hinglempai mon nyuhen.”

Hangkuli Pungpü

¹⁸ Mehenangkü Kahvang nenyingpü hatü mangthü üami jomei mang homei shahhing bangtük, hathü khüei vangsho leipü Kahvang mongshih shakei vamteke.

¹⁹ Mehenangkü mepa Kahvang jung nyinghen aok, hayü jom shingvaishi lekshi nyüke; mehenangkü Kahvangi jom kü ha lekei huteke.

²⁰ Kahvangi kahdoknyü linghinüng müki ne-eeaokjao büpalei nedohnetenpü ngan hatü Kahvang nyingnyoi büpai lingpü douthü homei lekei nyingteke hatü eeteke. Hanangkü ha shennyakthü shingvaishi yanglem neshiü;

²¹ mehenangkü jomi Kahvang nyingjao jomi büpa kü Kahvang kei dhüm neshuoh nevaijü büpa kü menvih neshuoh, shejao jomei mongdeih yahlak neshiüi leidai, hatü jomei sholi kü vangnyaki madai.

²² Nahpülangpü am shei ehahnyüke, shejao jomü ngapathü leidaiteke;

²³ hatü mechemao nedipü Kahvang müknyinshekhang hangku lepü nevaijü ouhiyüh nevaijü yemhimak nevaijü biühimakthülei lajeithü lepü kü jeiteinyüke.

²⁴ Hanangkü Kahvangi jomei mongdangi lümpü nedaünelang iyjeiphailei douthü kü jom hüki hük mü büm sheih-ei dükhen shingvaishi shuohtükpeih;

²⁵ mehenangkü jomi Kahvangei shahhing shahshem mü jeiteinyüke, hatü Lingbü nangjei lingpü douthü kü khümei chongphoteke, den den kü büpa vihtuh! Amen.

²⁶ Ha tata kü Kahvangi jomphong veübenüng iyjeiphailei kü shuohtükpeih. Jomei nyühathüi dangkao vanglem kü nenyupü lem kü nyongnyongi mükbongjuyung düknyüke,

²⁷ hatü ha aihük mü bahathüiyao vanglem kü jiüpükei nyühathü mü nyuhen tuhtü hüki hük mü iyjeiphaileinyüke. Bahathüi bahathü mü neveüi douten düknyüke, hatü jomi laophülei büm kü hapa pungpü hanghi koei leihahnyüke.

²⁸ Kahvang nyinghen jomphong den nengoi shei veiaokpü nangkü Kahvangi jomphong nedükbenüng dou dükhen mongdang ten kü lanei shuohtükpeih.

²⁹ Jomphong kü lemphüli mang, ten, hahnempü hatü ten dükpai maei nyüke. Jomphongü mükhühmongyung, jüteishangtei, dehilao, ühingnakai, hatü glüpi maei nyüke. Jomi mihla,

³⁰ hatü mih vüshih-ei enyüke; jomü Kahvang jiühitpüthü, mih vüshihpüthü, changmeipü, awdapü, mang yemei dangpüthü, nyühipa khüei yaongpüthü,

³¹ ngapa, hingnelempü, mongdang nejükpü, phahji yahyang neshiüpüthü nyüke.

³² Hapa keipü dou dükpüthü dihen shangpeih shei jomphongi Kahvangei shahkungnyü nyingei nyüke, shejao jomi hathü dükpü mon nevai, shejao hathü dükpüthü kü jomi mongmeishi yahnyüke.