PHILIPPI 4 - DAÜLANGPÜ LAIHING (BSI)

Shembüpa kü Mongongtuh

¹ Hanangkü ngei bampü hatü ongyangpü ngelei jeihinaü hatü nyahinaüthü, ngelei mongong hatü ngelei athen, Shembüpa kü hapakei wongshongi yaongtuh, ngei bampüthü.

² Ngei Euodia hatü Sentekhe nyi kü Shembüpa kü mong hük leiyei mongjemhen khümnyeih.

³ Hih, ngei am kao phenyeih, ngei mü pang hük paipü, hapa nyüha nyi kü sheühtuh; mehenangkü shahjang meipü dousho nangkü ngei mü jiji hatü Klement hatü chemi chongphopüthüi kheyei düktepih, hatü jomei men yangnyu laitap kü nyangei nyüke.

⁴ Shembüpa kü düngei mongongtuh; shao ngei enyeih, “Mongongtuh.”

⁵ Amphong inpünyaipü peü kü nyinghütuh. Shembüpa yopailei nyüke.

⁶ Menüng kao am mongtok tevai, shejao lemphüli kü phoppai hatü yüpai menvih shuohpü mü ammi yüpü Kahvang kü nyinghütuh,

⁷ hatü nyingpühingpü peü kü nyeipü Kahvang chingmeilemlingi Khrista Jisu kü ammei mong hatü sholi yomhen.

⁸ Shompülei, bampüthü, mepa shahhing, mepa dhüm kohbenüng, mepa jiüshangpü, mepa daülangpü, mepa bamhübenüng, mepa menvihbenüng nyu, meibenüng nevaijü menvih shuohbenüng lemhük dangkao nyuküjema, henüng keipü douthü deih-ei dangtuh.

⁹ Ammi nyingpü, yahpü hatü danpü hatü ngei kü eepü douthü dükei nyutuh, hatü chingmei Kahvang am mü nyukahen.

Thintho Shing Men Vihpü

¹⁰ Shaang dohpülei ngei nangkü am hakaei deihpü nangkü ngei Shembüpa kü longi mongongnyeih; hingmei, ammi ngei shing hakaei deihteke, shejao ngei ha huhen hepak mei nedangpeih.

¹¹ Mehenangkü ngei sheühpü napü nangkü ha enyu nevaipih; mehenangkü mehe laphen kü nyuhenshang ngei ha kü hüshemei nyuhen nyingpeih; mehenangkü mehe laphen kü nyuhenshang ngei ha kü hüshemei nyuhen nyingtih.

¹² Maani nyuhen ha mehe ngei nyingtih, hatü changshi nyuhen ha mehe ngei nyingtih. Mehe laphen vaihenshang peü kü hüshemei nyuhen nevaijü aeiyei nyuhen, changshi anghen hatü taoei nyuhenao ngei nyingtih.

¹³ Ngei wong kohhüpüba homei ngei dou peü dükaokhen.

¹⁴ Ngei shangpongpü kü ammi sheühpü kü mongmeinyeih.

¹⁵ Shongei shahjang meipü pangpü nyihthü kübü mechem ngei Macedonia kübü daipa, am Philippi am mü lenei üam attoiyao shuohpü hatü yahpü kü ngei mü nehantei shei ammi nyingei nyüke.

¹⁶ Ngei Thesalonikalei nyushi dangkao ngei napü hepak kü shan hük mü nyeishi ammi ngei kü sheühpü shomteke.

¹⁷ Ngei thintho napü kü nevai, shejao am kü nyeinya mop yemhen.

¹⁸ Ngei kü changshi yahphütih, hatü changtü aoei nyüpeih; ngei kü changshi shuohteke, hatü ammi shompü thintho Epaphroditus leipü dangtepih. Hathüyü vong meipü moila Kahvang mongongbenüng jakpü moila khih.

¹⁹ Khrista Jisu kü müknyinshekhang mop aimü ngelei Kahvangi am napü peü hüshemhühen.

²⁰ Kahvang jenei Pa kü denden kü müknyinshekhang vaituh, Amen.

Dohpü Selam Shah

²¹ Khrista Jisu kü daülangpüthü peü kü selam ete. Ngei mü nyupü küphüthüi selamja.

²² Daülangpüthü peüi am kü selamja, anyei vaishi ongshemei nyupüthüi.

²³ Shembüpa Jisu Khristalei phahji ammei laangha mü nyute.