PHILIPPI 2 - DAÜLANGPÜ LAIHING (BSI)

Khrista Maanpü Leipü hatü Longpü

¹ Hanangkü Khrista kü lemhük nangthongpü nyujema, bampü kübü lemhük nyiushemmei nyujema, Laangha kü mongjempü lemhük nyujema, yahyang shinshangpü lemhük nyujema,

² ngelei mongong changhütuh: amphong mong hük, bampü kü aihük, laangha hatü mükhong kü aihük nyutuh.

³ Laophü shing mon hahnemei deihpü, nevaijü laophü shing mon maongnyeipai mepayao tedük, shejao maanpü leipü kü laophü meyü mih-üng meipüba shei ieyeilemtuh.

⁴ Am peüi laophü lomja meihen mon tevei shejao mih meihenao veituh.

⁵ Khrista Jisu kü nyupü aihük chudeih mongdang am kü nyuhütuh.

⁶ Nyingnyoi-i büpa Kahvang vaijao, wongi leetei Kahvang mü hükkeipü shei büpai nedeih,

⁷ shejao laophü nying kong leiyei chongphobü hükei nyingnyoi yah-ei hangku lepü kü bühteke. Hatü hangku nyingnyoi keiha hangku leitü,

⁸ büpa laophü nyingi maanpü leitü dihen, hakei-üng shophang kü dihenao ven bangteke.

⁹ Hanangkü Kahvangi büpa shaopülei longei anshih, hatü men peü shak kü büpa kü men shuoh.

¹⁰ Hanangkü Jisulei men kü vangsho, hatü kahdok shak kü hatü kahmongei nyupü peüi lashüh shüngei aümei khümhen,

¹¹ hatü Pa Kahvang kü müknyinshekhang shuoh-ei jubenyeijaang peüi Jisu Khristayü Shembüpa shei lahhen.

Kahdoknyü kü Vangngai Kei Khangpü

¹² Hanangkü ngei bampüthü, ngei nyushi mon nevai, ngei neshiüpü hepak kü nyeishi ammi düngei ngelei shah bangpükei nyemei kheüei laophülei yemleipü düklangtuh;

¹³ mehenangkü büpai mongpü hatü büpalei meipü mükhong kü dou dükhen am kü dou dükpeyü Kahvang.

¹⁴ Dou peü nenümnümi hatü shah nelahtei-i düktuh,

¹⁵ shejüang kaokdaipü hatü nyongdaipü den kü amphong eela neshiüpü, daülangpü, kawhikang neshiüpü Kahvang hathü vaihen; hapa kü amphong lithathü kei kahdoknyü kü nyahen.

¹⁶ Ammi yangnyu shah kü wongshongi shoungpü homei ngei angsha kü nemok, nevaijü dou nedük shei Khristalei nyih kü ngei changmeiaokhen.

¹⁷ Shejao jakpü moila hatü am hinglempü moila kü ngei yiü cheipü keiha ngei am peü mü mongongnyeih hatü mongmeinyeih,

¹⁸ hatü ha aimü amphongao ngei mü mongongtuh hatü mongmeituh.

Timoti hatü Epaphroditus

¹⁹ Ammei shahjang danei ngei mongmeihen shingvaishi ngei am touei Timoti lomi shomphahen shei Shembüpa Jisu kü monglemnyeih.

²⁰ Am meihen nangkü hingshangi büpai kenei deihpü keiha ngei mü üpayao nenyu.

²¹ Peüi laophü lomja meihen deihpü mon, Jisu Khrista nang deihpü neshiü.

²² Timoti nang ammi nyingei nyüke; mehenangkü pa mü hapeüi keiha büpai shahjang meipü dousho kü ngei mü chongphoteke.

²³ Hanangkü ngelei laphen mepakei nyuhen, ha ngei nyinghinüng büpa shomphahen shei monglempü nyüpeih,

²⁴ hatü ngeiyao lomi peikahen shei Shembüpa kü hinglemnyeih.

²⁵ Shejao ngelei jeihinaü, chemi chongphopü, chemi dükpü veshan, ammei shahjang kobü hatü ngei nadang kü sheühpü Epaphroditus am touei nyokei shomhen vongbong khih shei ngei deihnyüke;

²⁶ mehenangkü büpai am peü deih-ei ongyanghampeih, hatü büpa tüngpü ammi danpü nangkü büpa mongshangei nyuteke.

²⁷ Hingmei büpa dihen mü longi tüngei nyuhampeih. Shejao mongmang hük pheikü hük neheühen shingvaishi Kahvangi büpa kü hatü büpa kü mon nevai ngei kao phahjipeih.

²⁸ Ngei-üng nyeishi büpa shomhünyeih, shejüang ammi shao büpa eeyei mongonghen, hatü ngeiyao mongshang komdaihen.

²⁹ Shembüpa kü mongong longpai mongongei büpa yahtuh, hatü hapa keipü shennyakthü kü dhüm shuohtuh;

³⁰ mehenangkü Khristalei dousho shingvaishi dihen mü nyupeih; ammi ngei kü neshuohaokpü dou kaw thaphen büpai yangnyu lanei shuohpeih.