NEHEMIAH 5 - DAÜLANGPÜ LAIHING (BSI)

Taopathü Nangkü Nehemiah-i Dükpü

¹ Shaang jempü jeihinaü Jehoda am khüei nanglakthü nyüha baha hanei langmaanteke.

² Hanei ami, “Hapeüthü omtü ham longi nyüpeih, ham yemmü nyuhen nangkü hahhen hahying danghen vongbong” shei e.

³ Hanei ami, “Münghishaü hepak kü hami hamei kah, nyalingngupai kah, hatü hamei shemthü phutükkempeih” shei e.

⁴ Shao lebüthüi, “Kah hatü nyalingngupai kahthü kü ongpai thaipü kahphulat shuohhen lop luhen khih” shei e.

⁵ “Hamao jeihinaüthü mü iy hük phai hük vaijao hatü hamei hapeüthüao jomei hapeüthü kei-üng meishi tuhtü hamei hapeüthü-ü aa leihen khih. Hamei yiükhathü haneiyü aa vaishi yutükteke, shejao hamei kah hatü nyalingngupai kahthü kemei mih-ei vaidaipü nangkü sheyü lem neshiü” shei eteke.

⁶ Mechem jom langmaanpü ngei danpa ngei longi mongshih.

⁷ Ngelei mongei lemhük payü dükhen khih shei deihtü mübüthü hatü lakchongbüthü kü, “Amphongü jeihinaüthü kü shüveinyu khih!” shei eteke. Hanangkü hapa nang eteinüng shahthai longpü hük nyükei,

⁸ Jom kü, “Jeni aokpü thahshi jenei jeihinaü Jehoda am lebü kung jatthü kü yutükpü shakei leiteke, shejao shaang ammi jempü jeihinaü Jehoda am jom nyingi am kü yuhen mü ammi dou düknyüke!” shei eteke. Jomi shah leihen nedangpü nangkü nenmü nyudai.

⁹ Hanangkü shao ngei jom kü, “Ammi mehe düknya hayü nejiüang. Jenei vepa jatthüi ne-ienelempü neponghen shangmü ammi jenei Kahvang nyempü kü nekamhen je?

¹⁰ Ngei hatü ngelei jeihinaüthü, ngelei chongphobüthüi nanglakthü kü lop hatü hah lushuoh-ei nyüpeih. Jeni dou kü dou bhüei yahpü tuhtükshah.

¹¹ Jom kü lomi jomei kah, nyalingngupai kah, olive kah hatü shemthü hatü dou kü dou bhüei yüpü peü neyah-i leitükkemshah” shei e.

¹² Jomphongi, “Nüngi epükei hami dükhen hih. Hami jomei kahphei shemshing peü nyokei leishuohhen hih, hatü hajük kü bheishe hang neyüpih” shei e. Hapheikü ngongpathü nyükei thaihütü mübüthü hatü lakchongbüthüi mehe lah, ha dükhen shei vanghüteke.

¹³ Ngeiyao ngelei shünglok sheyei dheütü, “Hapa lahpü üpai nedükhenshang Kahvangi jomei shem, mophimo hapakei dheüei yaktüktuh, hatü lakkong tuhtuh” shei e. Hahepak kü halei nyupü peüi, “Amen!” shei e, hatü Shembüpalei menlong, hatü nanglak peüi jomi lahpükei dük.

Nehemiah-i Nanglak kü Bampü

¹⁴ Nyeinya vaishi Artaxerxes ongpai vanglem lempü bong kukhapabü kü Judah kahdokei ngei kü jomei governor vaihen jepü hepak kübü büpai vanglem lempü bong hapüanpünyipabü thahshi– bong anpünyi kü ngei nevaijü ngelei jeihinaüthü üpaiyao governor kü shuohpü hahying nehah.

¹⁵ Ngei shekü nyupü governorthüi nanglakthü kü hanggovih longi kohü, hatü jom leipü hahying hatü yiü yah, hatü ha mü lenei nyih kü ngin pha pinyi yahhamteke. Jomei chongphobüthüi dangkao nanglakthü kü shüveihampeih. Shejao ngeiyü Kahvang kü nyempai hapakei nedükangpih.

¹⁶ Haleimü ngei nyingi bham lingei leihen dousho kü lanei shuohpeih. Ngelei chongphobüthü peü halei dou düknüng thaipeih; hami shing hükao neyah.

¹⁷ Jen shonei nyupü jatthü kübü peipüthü mü lenei Jehoda nanglak hatü lakchongbüthü düngei kho hük mü pinyipüan thahshi ngelei nükdülei hahhampeih.

¹⁸ Nyih hük shingvaishi tempülempeyü mohohbaong hük, meipü mi vok hatü ngei shing ou shukhampeih, hatü nyih an ieyei kü meipü yiüja lemphü shuohhampeih, shejao nanglakthüi hanggovih kotü ponghahpü eepü nangkü ngei governor kü hanpü hahying neyü.

¹⁹ Ngei nanglakthü shingvaishi hathü peü dükpü kü ngei kü phahjiei deihte, Oh ngelei Kahvang.