NEHEMIAH 4 - DAÜLANGPÜ LAIHING (BSI)

Nehemiah-i Dousho kü Khüpüthü Neüpü

¹ Ham Jehoda ami bham lingei leinyüke shei mechem Sanballat-i danpa, büpa longi mongshih-ei ham kü yaüeilungei naamshah epeih.

² Büpai büpalei sheühbüthü hatü Samaria leipü veshanthü touei, “Jehoda am patenthüi mehe lingnya? Jomi bham lingei leiaokhen je? Jomi moila shuoh-ei aokhen je? Jomi nyih hük kü temaokhen je? Awi hahtükpü yaongthü khongpü shao mei leiyei lingaokhen je?” shei eteke.

³ Ammon am Tobiah büpa touei yaongshi nyu hatü büpaiyao, “Jomi lingteipü bhamü mahu hük bakei aongshuohjü laamkahen hih!” shei epeih.

⁴ Oh hamei Kahvang, ham kü yaeilungpü banghümao. Jomei shahlong jomei shangjing kü-üng hettuh. Jomi angpü kemei shetei yahtü jom wüpküpei deishihtuh.

⁵ Nüngi jomei mang tejümtük nevaijü nüng toueipü jomei mang tethittük; mehenangkü jomi ha bham lingei leipüthü kü yaüeilungei eteke.

⁶ Hanangkü hami bham lingei leiteke, hatü shaopü kü hükkeishing aongteke; mehenangkü nanglakthü peü kü dou dükhüpü mong nyüke.

⁷ Sanballat, Tobiah, Arab am, Ammon am hatü Ashdod shennyakthüi Jerusalem bham lingpü nedoh-i daipü, hatü vo kemei thapei dainyüke shei danei jom longi mongshih.

⁸ Jom peiyei Jerusalem khüei hokhen hatü halei shanghah vamhühen phaüshah showteke.

⁹ Shejao hami hamei Kahvang kü phop hatü nyakhingai thüngei yombü tuhpeih.

¹⁰ Hahepak kü Judah ami, “Dou dükbüthülei wong kemdaiteke, hatü nyüphinya longi nyupü nangkü hami bham nelingaokhen khih” shei e.

¹¹ Hamei vepathüi, “Jomi jen nyingshekü hatü eeshekü jom touei jen peiyei jom jühen hatü dou nedüki tuhtükhen” shei eteke.

¹² Shejao jom yopailei nyupü Jehoda am ham touei peiyei anpa anpa ham kü, “Jen khüei hokhen jom nyupü shing peü lemeipü peihen temteinyüke” shei ephopeih.

¹³ Hanangkü ngei bham peü mü nyaümpü shing peü eepü shingei phang phang aimü yan, phung, hatü lah notü yaonghüpeih.

¹⁴ Ngei hathü dou veikem pheikü ngei yaongei mübüthü, lakchongbüthü hatü aopü nanglakthü kü, “Jom kü tenyem. Ammei jeihinaü, hapeüthü, nyühathü hatü am shem nangjei hokpü longpü hatü nyempühanpü Shembüpa deih-ei dangtuh” shei eteke.

¹⁵ Mechem hamei vepathüi jomi tempü küpjan hami nyingdaipü danpa, hatü Kahvangi jomi tempü küpjan neaokpü leihüteke shei nyingpa, ham peü laophü laophülei dousho bham lingei dai.

¹⁶ Ha nyih mü pangei nanglak hükkeishing phung, inyü, lahhilaong notü vehok ow temtü yomei yaong, hatü lakchongbüthü jom nyingi bham lingpü Judah nanglakthülei ngaümpheilei yaongteke.

¹⁷ Bham linghen dou shetpüthüiyao lak hüki dou dük, lak hükei lahhilaong notü nyu,

¹⁸ hatü bham lingpüthüao yan laptü dou dük, shejao amit vünghen shennyakü ngei mü nyuteke.

¹⁹ Ngei mübüthü, lakchongbüthü hatü aopü nanglakthü kü, “Dou dükhenü longi taiteishi haishi nyüke hatü bham lingei jen hüki hük mü longi takteishi yanei nyüke.

²⁰ Mechem amit ngeü danhenshang, ngei shonei thaikei. Jenei Kahvangi jenei med kü hokkahen” shei eteke.

²¹ Hanangkü nanglak hükkeishing vanghe aonghinüng phunglang notü litha vampü thahshi yom, hatü ham hükkeishing hapakei dou dük.

²² Hahepak kü ngei nanglakthü kü, “Shennyak peüi laophülei sheühbü omtü yanüngü Jerusalem mongei nyutuh; hathüi yanüng jen yomhen hatü nyihnüng dou dükhen” shei e.

²³ Ngei nevaijü ngelei jeihinaüthü, ngelei chongphobüthü, ngei mü nyupü yombüthü üpaiyao phunglang owhiai nebhühtük; peüi laophülei lahhilaong lakei noshi mon nyu.