NEHEMIAH 3 - DAÜLANGPÜ LAIHING (BSI)

Jerusalem Bham Lingei Leipü

¹ Bham hapakei ling. Ngongchong Eliashib hatü jempü ngongpathü dou düknüng dai hatü Mi Shaden ling. Jomi ha daühü hatü hapalei shaden ling; jomi ha Khohük Shangdü thahshi hatü Hananel Shangdü thahshi daühü.

² Hatü Jeriko ami büpa kü dheanei ling, hatü jom kü dheanei Imrilei cheha Zakkur-i ling.

³ Hassenaahlei hapeüthüi Nyah Shaden ling; jomi pü bhangei hapalei shing kü shaden ling, hatü shaküp shihhen pü mounghibhang shihteke. Jomi pülu lütü ha shangkü pütang shih-ei shadenthü ling.

⁴ Jom mü dheanei Uriahlei cheha Hakkozlei chehü Meremoth-i ling. Jom mü dheanei Berekhiahlei cheha Meshezabelei chehü Meshullami ling. Jom mü dheanei Baanalei cheha Zadoki ling.

⁵ Jom mü dheanei Tekoa ami ling, shejao jomei mübüthüi epü dou kü jomei behethüi lakjaangiyao nehong.

⁶ Paseahlei cheha Joiada hatü Besodeiahlei cheha Meshullam nyi-i Jeshanah Shaden lingteke. Jomi pülu lütü ha shangkü pütang shih-ei shadenthü ling.

⁷ Jom mü dheanei Gibeon am Melatiah hatü Meronoth am Jadon ami lingteke Gibeon hatü Mizpah shennyakthüyü Euphrates heshüphi kübü governorlei moidoi phangkü nyu.

⁸ Jom mü dheanei Harhaiahlei cheha Uzziel, hon shükbüi lingteke. Büpa mü dheanei Hananiah, vong meipü meli lingbüi Longpü Bham thahshi Jerusalem ling.

⁹ Ha mü dheanei Hurlei cheha Rephaiah, Jerusalem kü district bhaoei kü vanglem lembüi ling.

¹⁰ Ha kü hapei Harumaphlei cheha Jedaiah-i büpalei shem kü khangteishi ling, hatü büpa kü dheanei Hashabneiahlei cheha Hattush-i ling.

¹¹ Harimei cheha Malkijah hatü Pahath-Moablei cheha Hasshub nyi-i lebü shing hatü Awdep Shangdü ling.

¹² Jom mü dheanei Halloheshlei cheha Shallumi Jerusalem kü district bhaoei kü vanglem lembüi büpalei yiükhathüi sheüh-ei lingteke.

¹³ Kahji Shadenü Hanun hatü Zanoahlei nyupüthüi ling. Jomi ha lingei leitü ha kü shaküp hatü pü mounghibhang kemei shih. Jomi shao Nyüpshük Shaden longpü thahshi meter 440 ling. Jomi pülu lütü ha shangkü pütang shih-ei shadenthü ling.

¹⁴ Nyüpshük Shaden thahshi Beth-Hakkerem district kü vanglem lempü Rekhabei cheha Malkijah-i ling. Büpai ha lingei leitü ha kü shaküp hatü pü mounghibhang kemei shih.

¹⁵ Yungkuk Shadenü Mizpah district kü vanglem lempü Kolhozehlei cheha Shallumi ling. Büpai ha lingei leitü adok küpei shaküp lingei pü mounghibhang kemei shih. Shao büpai Ongpalei Pe toueipü Siloam yungkuk kübü heihdaipü David chingnyülei yiüpü lateen thahshi ling.

¹⁶ Büpa pheikü Azbukei cheha Nehemiah Beth-Zur district bhaoei kü vanglem lembüi Davidei mahngchong mü khangteipü shing kübü heihdaipü Yungkuk hatü Hampathülei Shem thahshi ling.

Bham Lingpü Levi am

¹⁷ Büpa kü dheanei Banilei cheha Rehumi mütü Levi ami ling. Ha pheikü Keilah district bhaoei kü vanglem lempü Hashabiah-i büpalei district kü ling.

¹⁸ Büpa kü dheanei Keilah district bhaoei aopü kü vanglem lempü Henadadlei cheha Binnui-i mütü halei nyupü ami ling.

¹⁹ Jom mü dheanei Mizpahlei vanglem lempü Jeshualei cheha Ezer-i lebü shing hük phunglang ow tuhshing kübü bham nyokei leipü shing thahshi ling.

²⁰ Büpa kü dheanei Zabbailei cheha Barukh-i bham nyokei leipü shing kübü Eliashib ngongchongei shem thahshi ling.

²¹ Büpa kü dheanei Uriahlei cheha Meremoth, Hakkozlei chehüi Eliashibei shem peshaden kübü dohpü jung thahshi ling.

Bham Lingei Leipü Ngongpathü

²² Hathü ngongpathüi bham shing longi lingei leiteke: Ha mü dheanei Jerusalem shonei nyupü ngongpathüi lingteke.

²³ jomphong pheikü Benjamin hatü Hasshub nyi-i jomei shem chingshe kü jiüpü ling, hatü jom kü dheanei Ananiahlei chehü, Maaseiahlei cheha Azariah-i büpalei shem toueipü ling.

²⁴ Büpa kü dheanei Hanadadlei cheha Binnui-i Azariahlei shem kübü nyokei leipü bham shoukbaong thahshi ling,

²⁵ hatü Uzailei cheha Palal-i ha kü dheanei bham nyokei leipü baong hatü veshanthülei shem yopai leipü dokpa ongshem toueipü shangdü thahshi ling. Büpa kü dheanei Paroshlei cheha Pedaiah,

²⁶ hatü Ophel shangchingei nyupü phopshemei chongphopüthüi heongphi Yung Shaden kü khangpü shing hatü shangdü thahshi ling.

²⁷ Jom kü dheanei Tekoa ami shangdü kübü Ophel bham thahshi ling.

²⁸ Koyei Shaden dok keyü ngongpathüi laophü laophülei shemshe kü jiüpü ling.

²⁹ Jom kü dheanei Immerlei cheha Zadoki büpalei shem kü jiüpü ling. Büpa kü dheanei Heong Shaden yombü, Shekaniahlei cheha Shemaiah-i ling.

³⁰ Büpa kü dheanei Shelemiahlei cheha Hananiah, hatü Zalaphlei ha vokpabü Hanuni nyi-i ling. Jiji kü dheanei Berekhiahlei cheha Meshullami büpa nyupü shem kü jiüpü shing ling.

³¹ Büpa kü dheanei hon shükbü, Malkijah-i phopshemei chongphopüthü hatü bhei leihpüthülei shem Miphkad Shaden mü khangteishi nyupü, hatü bham nyokei leipü baong kübü shem thahshi ling;

³² hatü bham nyokei leipü baong kübü shem toueipü Mi Shaden thahshi hon shükbü hatü bhei leihpüthüi lingei leiteke.