NEHEMIAH 2 - DAÜLANGPÜ LAIHING (BSI)

Nehemiah Jerusalemei Shompü

¹ Artaxerxes ong vaipü bong kukhapabü Nisan len kü büpai yiü yingteipü hepak kü ngei yiü yah-ei deiyei büpa kü shuoh. Shelei ngei büpa touei mechemao mongmangpü dhe nehuham.

² Ongpai ngei kü, “Nüng netüngtüngi mehekei nüngei dhe mangnya? Hapayü lebü nevai mongmangpü khih” shei phephüteke. Ngei longi nyem,

³ shejao ngei ongpa kü, “Ongpa nüng yangnyu shoshoei nyutuh! Ngelei obü opa am mahng vüpü chingnyü bendaitü hatü haleipü penyüsha kemei awi hahtüktü tuhtü ngei mekei mongnemangi nyunüng?” shei e.

⁴ Ongpai ngei kü, “Nüng mehe napa?” shei phe. Hahepak kü vangsho Kahvang kü phoptü,

⁵ ngei ongpa kü, “Ongpai hapa kü mongei deihjema, hatü nüngei chongphobü kü bamei deihjema, obü opa mahng vüpü Judah leipü chingnyülei ngei leishihtuh, hatü ngei hapa lingei leihen hih” shei jangei e.

⁶ Hahepak kü ongpai onglanyüao büpa touei uoei yahtü ngei kü, “Leihen hepak meshük yahhen hatü nüng mechem leikahen?” shei phe. Ongpai ngei leishihhen mong; hanangkü ngei hepak itteke.

⁷ Ngei shao büpa kü, “Ongpai hapa mongei deihjema ngei Judah mangngoi thahshi meishi peih-ei daihen shingvaishi Euphrates heshüphi kübü governor kü lai hük nyangei ngei kü yahshih;

⁸ hatü ngei kü phopshem peshaden linghen pü, hatü chingnyü pe linghen hatü ngei nyuhen shem linghen pü shuohtuh shei ongpalei phaü yompü Asaph kao lai hük nyangei yahshih” shei phe, hatü ngei mehe yü, ongpai ha ngei kü shuoh; mehenangkü ngelei Kahvangei phahjipü lak ngei mü nyuteke.

⁹ Hapheikü ngei Euphrates heshüphi leipü governor touei peiyei ongpalei lai shuoh. Ongpai ngei mü veshan lakchongbüthü hatü koyei veshanthü shomteke.

¹⁰ Mechem Horon am Sanballat hatü Ammon am lakchongbü Tobiah nyi-i ha danpa, Israel nanglak kü mei dükhen yemei hanei am peiteke shei nyingei longi mongneongi deih.

Nehemiah-i Bham kü Veiyei Daipü

¹¹ Hanangkü ngei Jerusalemei peiyei halei nyih jem nyu.

¹² Ngei mü shennyak hanei mütü nyak kü dai. Jerusalem shingvaishi ngelei Kahvangi mehe dükhen ngelei mongkü ephopa, ngei üpa kao ha jung ne-eja. Hamphongi yah-ei daipü gadu-ü ngei müei peipü ha mon nyu.

¹³ Ngei nyak kü Kahji Shaden lemei daiyei Dragon Yunglok peih-ei heih-ei Nyüpshük Shaden ngoi, hatü ngei mangdaipü Jerusalem hatü aw hahtükpü peshadenthü thümei dai.

¹⁴ Hapheikü ngei Yunglok Shaden hatü Ong Yungkuk lemei heih, shejao ngei uopü gadu kamei daihen lem neshiüi nyu.

¹⁵ Hanangkü ngei nyak kü kahji lemei aongei bham thümei veiteke. Hapheikü ngei nyokei leiyei Kahji Shaden lem kü shüei lei.

¹⁶ Lakchongbüthüi ngei melei daipa nevaijü mehe dükpa ha nenying; mehenangkü ngei Jehoda am, ngongpathü, mübüthü, lakchongbüthü hatü aopüthü üpa kao mehe dükhen ha ne-eshuoh.

Bham Lingei Leihen Temteipü

¹⁷ Hapheikü ngei jomphong kü, “Jen shanghah kü nyupü ammi veituh; Jerusalemü bendai, hapalei peshaden peü awi hahtükteke. Kei, jen shanghah kü nenyuhen shangmü jeni Jerusalem bham lingei leishah” shei e.

¹⁸ Ngei jomphong kü ngelei Kahvangei phahjipü lak ngei mü nyupü hatü ongpalei shah ngei kü ephopü ejateke. Hahepak kü jomphongi, “Jeni lingei pangshah!” shei e. Hanangkü jomi hapa doumei dükei pang.

¹⁹ Shejao mechem Horon am Sanballat hatü Ammon am lakchongbü Tobiah hatü Arab am Geshem hathüi ha danpa, jomphongi longi yaüeilungei naamei, “Amphongi dükpü hapayü meheang? Amphongü ongpa khüei yaongnyu je?” shei e.

²⁰ Hahepak kü ngei jomphong kü, “Vangsho Kahvangi ham kü aokpü shuohhen, hatü büpa chongphobü hami ha lingei leihen chongpanghen, shejao Jerusalem nangkü shei amphongei phaihan nevaijü ammi ehen nevaijü hapalei büshah eshi dah shakei ehen neshiüpih” shei eteke.