NEHEMIAH 1 - DAÜLANGPÜ LAIHING (BSI)

Nehemiah-i Nanglakthü Shing Phoppü

¹ Hekaliahlei cheha Nehemiahlei shah: Bong kukhapabü Khislev len kü mechem ngei Susa chingnyülei nyupa,

² ngelei jeihinaüthü khongkü hük, Hanani mü Judah leipü shennyak hanei peiküteke, hatü ngei wüpküp leipü yangei leipü Jehoda am hatü Jerusalem nang pheteke.

³ Jomi ngei kü, “Wüpküp leipü yangei leipüthüyü longpü shanghah hatü veüpong kü nyüke; Jerusalem bham mangdai hatü hapalei pe kemei awi hahtükteke” shei ephüteke.

⁴ Mechem ngei hathü shah danpa, ngei uotü nyih longi vangsho Kahvang kü thepeiyoungei, shüaeiyungleyei hatü phopei nyupeih.

⁵ Hahepak kü ngei, “Oh Shembüpa, vangpüshuwpü jiüshangi nopü hatü üami nüng kü bam hatü nüngei shahkung jiüshi düknya, hathü kü bampü hupü longpü hatü nyempühanpü vangsho Kahvang;

⁶ shaang ngei nyakhingai thüngei nüngei chongphopüthüi Israel nanglakthü shing, nüng khüei Israel ami thahpü mang lah-ei phopnyüpeih; nüngei dhaong shaangshih, nüngei müki veishih hatü ngei phoppü danlangshih. Ngei hatü ham shemi mang thahteke.

⁷ Hami nüng huluh shuohhüteke, hatü nüng chongphobü Mosa homei epü nüngei shahkung hatü vanglemthü nedükang.

⁸ Nüngi nüngei chongphobü Mosa homei, ‘Am hingnelemjema, ngei amphong lebü jatthü touei haitükhen;

⁹ shejao amphong mong lepei ngelei shahkung bangei hathü dükjema, amphong kahdoknyü junghijang peü lemei haishi nyujao ngei am thaiyei leiyei ngei kü khümhen jepü shingei tuhhen shei epü shah deih-ei dangnyüke.’

¹⁰ Jomphongü nüngei laklu wong longpai angei leipü nüngei chongphobü hatü nanglakthü.

¹¹ Oh Shembüpa, nüngei chongphobüi phoppü kü, hatü nüngei men kü dhüm shuohpü kü mongongpü chongphobüi phoppü kü nüngei dhaong shaangshih. Shinnyih nüngei chongphobü aokpü danghütuh, hatü ongpai ngei kü bamhütuh!” Hahepak kü ngeiyü ongpalei yungshong nobü nyupeih.