NAHUM 3 - DAÜLANGPÜ LAIHING (BSI)

Nineveh am Onyükei

¹ Iythüng anpai, shahshemi maei, aetpüshepai maei nyupü; Mechemao jüteishangteipü nedohpü chingnyü, Onyükei!

² Koyei kü bheipü ngeü, kharila ngeü, koyei phaukteitungteipü!

³ Koyei veshanthüi thep nyükpü, phunghiyan nyeleppü, mahng longi, mahng kü mahngi chettü ne-ieaoki mahmahng longi; mahng kü shennyakthüi huluh shuohnyüke!

⁴ Hathü peü büm yuei pungpüshatpü homei vamnyüke. Pinnyüi büm yupai jatthü peü yawhlangnyüke, hatü pinnyülei thihivam doui nanglakthü aa leitükteke.

⁵ “Ngei nüng khüei nyüpeih” shei Jeiyong Shembüpai enyüke. “Ngei nüngei dhe kü shüng ashak nyiukei jümhühen; Ngei jatlithü kü nüngei bümkong, hatü nüngei veü hushuohhen.

⁶ Ngei nüngü nühinami jümhühen, ngei nüng kü ne-ienelemi nohen, hatü peüi nüng kü naamei veihen.”

⁷ Üami nüng kü veihen, peü nüng toueipü nyaidaihen, hatü “Nineveh-ü mahdaiteke! Üpai pinnyü kü mahng thepshuohhen? Pinnyü nyiushem meihühen üpa danghenang?” shei jomi ehen.

Shahphenhen Shahvüng

⁸ Yungi pe vaitepü, yungnyüi veyomtap vaitepü, pinnyü kü yungi ngeih-ei shonei, Nile kü nyupü Ijip amei Thebes chingnyü mao nüng-üng meipeih shei deihnyu je?

⁹ Ethiopia hatü Ijip nyiyü pinnyülei wong nyuteke; Put hatü Libya nyiyü pinnyülei khüambakpü jatnyuteke.

¹⁰ Shejao pinnyü dangkao wüpküpei yah-ei daiteke, Chingshong shoukhinuk peü kü jomei hashihthü khih mü bheitü jükemteke. Jomei hamhiman peü kü nyiamvüi shateke, hatü vepathüi jom hanlangteke.

Nekeüaokpü Shahphenpü

¹¹ Oh Nineveh, ammao nükchok yiümokei leishasha; Am vepa kübü nyaiyei joshing yemhen.

¹² Ammei veyomdü kemei bhukjükpü leipü bhukjükshüm keiha, Mechem pü kü jenhenshang, hahhen amei jusha kü jiüshi vüpükei nyuhen.

¹³ Veituh, ammei veshanthüyü nyüha kei nyüke; ammei kahdok penyüshayü vepathü shing laiyei aptüktü nyüke. Penyü shalat awi hahtükteke.

¹⁴ Ching shümlang shekü yung sholangtuh, penyüsha wongei linglangtuh, Ashem thukei kahdok nyeütuh, hatü itayaong lingei temtuh!

¹⁵ Ammi mehe mehe shangkü dükjao am aw kü jaktükshasha; vepalei yani am mahshasha, hatü shoukhanbaongi sheili jangtükpükei am thitei yaktükhen. Shoukhanbaong kei am longi daei nyujao neyangaokpih.

¹⁶ Vangsho lithathü mao nyeishi ammi ammei bhei leihpüthü dahüteke, shejao shoukhanbaongthü yang paantü pidaipükei hathü peü lüdaiteke.

¹⁷ Ammei yombüthü hatü mübüthü wohong hepak kü shoukthü bhamei bakshi nyutü, mechem vanghela shathenshang pidaitü melei daipa nenyingpükei nyüke.

¹⁸ Oh Assyria ongpa, nüngei mi yombüthü mükngüh dhaongnyüke; nüngei hampathü shidaiteke, nüngei nanglakthü kahshangthülei haishi nyüke; jom thailanghen üpayao neshiü.

¹⁹ Nüngi ma yahpü meihen mü meheyao neshiü; nüngei makaw nemeiaokpih. Üami nüng lomohdaipü shahjang danpa, jomi mongongpai lak apnyüke; mehenangkü üpai nüngi nemei-i dükshuohpü nepongi nyüpa?