NAHUM 2 - DAÜLANGPÜ LAIHING (BSI)

Nineveh am kü Shahphenhen Tetpü

¹ Oh Nineveh am, am hahtükhen vepa hük vamteke; Penyüsha kü veshanthüi yomhütuh, lemnyüshong yomhütuh, shünglok loktuh; nüngei wong kemei antuh.

² Vepathüi mangtüktü lavüngtoiyei tuhphongjao, hatü jomei nyalingngupai kah mangtükjao, Shembüpai Jakob kü keiha, hatü Israel am kü keiha müknyinshekhang nyokei shuohhen.

³ Büpalei veshanthülei inyüshungü hakpüh-i; büpalei veshanthüyü iyshüm kei hakpü ow owshi nyüke. Jomphongü hokhen temnyüke; jomei vehok koyeithü awlah phaatpükei shü-aong shülei shei mokteinyüke.

⁴ Chingyangshong kü vehok koyeithü, chingnyü shoukhinuk peü kü daitü lei, daitü lei mokteinyüke. Jomphongü bahpü awlom kei nyüke; jomi klang kei lahhan kapnyüke.

⁵ Büpai lakchongbüthü kü nyüknyüke, jom daishingkü huluh shuohnyüke, jomphong penyüsha touei moknyüke, haleiyao inyüshung shaongshi nyüke.

⁶ Yungnyü chüm laiyei shateke, hatü ongching nyempai kheünyüke.

⁷ Haleipü onglanyü bümkong wüpküpei yah-ei daihen, pinnyülei aathü athuba kei jaaba kü daüpei mahng thephen.

⁸ Nineveh-ü yung ngamdaipü yungkuk kei nyuhen, Yaongtuh, yaongtuh shei jomi lenhen, shejao üpayao nyokei neleihen.

⁹ Ngin aetei yahtuh! Hon aetei yahtuh! Hapa chingnyü-ü hon hi ngini maei nyüke.

¹⁰ Nineveh-ü mahtükteke, yaktükteke, hatü lavüngtoiyei tuhphongteke! Nyempai jomei mong laaidaiteke; nenei wong neshiü, dhe haidaiteke.

¹¹ Mailangi cheha kü het ühshing, mailang bihibaong nyiphen lüdaitü chehathü mehe-iyao nebukneshaani yangei nyupü mailang jep keipü chingnyü shaangü melei nyüpa?

¹² Mailangi cheha shing yemhimak changshi jünyüpeih, hatü chenyü shing yemhimak shüknyüpeih. Büpai laophülei dungei heti, hatü laophülei jep phaithüngi mahünyeih.

¹³ “Ngeiyü nüngei vepa hih shei Jeiyong Shembüpai enyüke. Ngei ammei vehok koyeithü jütükhen; ammei veshanthü vehok kü mahtükhen, hatü ammi mih leipü aetpüshepü dou peü ngei yahlanghen, hatü ammei phongmokbüthülei ngeü hajük kü nedanhen.”